လားရှိုးမြို့နယ်တွင် ကျပ်သိန်း ၁၇၀ ခန့်တန်ဖိုးရှိ မူးယစ်ဆေးဝါးများနှင့် လက်နက်များ ဖမ်းဆီးရမိကြောင်း မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့၏ ထုတ်ပြန်ချက်အရ သိရသည်။
ထုတ်ပြန်ချက်အရ ဧပြီ ၂၁ ရက် နံနက် ၈ နာရီခန့်တွင် ရှမ်းပြည်နယ်ရဲတပ်ဖွဲ့သည် သတင်းအရ သက်သေများနှင့်အတူ လားရှိုးမြို့နယ်၊ ဟိုနားပန်ကျမ်းကျေးရွာနေ ရန်လူ၏ တောင်ယာတဲအား ဝင်ရောက်ရှာဖွေခဲ့ကြောင်း သိရသည်။
ထိုသို့ရှာဖွေရာ ၎င်းနှင့်အတူ မပါးရီး(ခ)မရင်ကော့အား တွေ့ရှိပြီး တဲအတွင်းမှ ကျပ် ၈၈ ဒသမ ၅ သိန်းခန့်တန််ဖိုးရှိ ဘိန်းဖြူအလေးချိန် သုည ဒသမ ၅၉ ကီလို၊ ကျပ်သိန်း ၁၅၀ ခန့်တန်ဖိုးရှိ စိတ်ကြွရူးသွပ်ဆေးပြား ၃၀၀၀၀ ပြား၊ ကျပ် ၂၄ သိန်းခန့်တန်ဖိုးရှိ ဘိန်းစိမ်းအလေးချိန် ၃ ကီလို၊ လက်လုပ်သေနတ် လေးလက်နှင့် မြန်မာငွေကျပ် ၇၈ သိန်းတို့အား တွေ့ရှိသိမ်းဆည်းရမိခဲ့ကြောင်း သိရသည်။
အဆိုပါဖြစ်စဉ်နှင့်ပက်သတ်၍ ဖမ်းဆီးရမိသူများအား ရန်လူ(၅၃)နှစ်နှင့် မပါးရီး(ခ)မရင်ကော့(၅၃)နှစ်တို့အား လားရှိုးမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့၏ ထုတ်ပြန်ချက်အရ သိရသည်။
