ကချင်ပြည်နယ် နမ္မတီးမြို့ လမ်းခွအသင်းတော်၏ ခရစ်ယာန်ဓမ္မဆရာဟောင်း ခွန်ဂျော်လီ (Sr. Nammye Hkun Jaw Li) အား မတ် ၁၁ ရက် မွန်းလွဲ ၂ နာရီဝန်းကျင်တွင် နေအိမ်တွင်း၌ အမည်မသိလူသုံးဦးက ဆိုင်ကယ်ဖြင့် လာရောက်ပစ်သတ်ခဲ့ကြောင်း သိရသည်။
“၂ နာရီ မထိုးခင်လေးဖြစ်တာပေါ့။ မိတ္တူဆိုင်ဖွင့်ထားတာ။ ဆိုင်ကယ်တစ်စီးနဲ့ လူသုံးယောက် အိမ်ထဲမှာကို လာပစ်သွားတာ။ အခုလောလောဆယ်တော့ ဆရာ့ကိုရင်ခွဲရုံကနေ ဆေးစစ်ချက်ယူပြီး အိမ်ပို့ထားပြီ။ ဦးခေါင်းတစ်ချက်၊ ကိုယ်လေးချက် ထိထားတယ်။ ဘာကြောင့် ခုလိုလုပ်သွားမှန်းမသိဘူး။ လန့်နေကြတာ။ တခြားအဖွဲ့တွေကို ရိုးမယ်ဖွဲ့တာလည်း မကောင်းပါဘူး။ သူနဲ့ သူတို့မိသားစုက အသိဆုံးဖြစ်မှာ” ဟု ကူညီသူတစ်ဦးက ပြောကြားသည်။
ဆရာခွန်ဂျော်လီသည် သေဆုံးချိန်တွင် အသက် (၄၀ နှစ်) ရှိပြီဖြစ်ပြီး နမ္မတီးကချင်နှစ်ခြင်း ခရစ်ယန်အသင်းတော် (KBC) က အမှုတော်ဆောင်ဟောင်းတစ်ဦးဖြစ်ကာ လူထုအခြေပြုမူးယစ်ဆေးဝါးနှိမ်နင်းရေးအဖွဲ့ (Pat Jasan) နှင့် ရပ်ရွာအကျိုးလှုပ်ရှားရေး၌ တက်ကြွစွာ ပူးပေါင်းပါဝင်ခဲ့ကြောင်း ယင်းနှင့်နီးစပ်သူများက ဆိုသည်။
