ဒီတစ်ပတ်ကတော့ FA ဖလား ကွာတားဖိုင်နယ်ပွဲစဉ်တွေ ဝင်လာတာကြောင့် ပရီးမီးယားလိဂ်က  (၄)ပွဲသာ ယှဉ်ပြိုင်ကစားရမယ့်အခြေအနေ ဖြစ်သွားပါတယ်။ ပရီးမီးယားလိဂ်ပရိသတ်တွေအတွက်တော့ FA ဖလားပြိုင်ပွဲကို ပြောင်းလဲခံစားကြရမယ့်သဘောပါ။ FA ဖလား ကွာတားဖိုင်နယ်အဆင့်ကို ရောက်ရှိလာတဲ့ အသင်း(၈)သင်းထဲမှာ ပရီးမီးယားလိဂ်ထိပ်သီး(၄)သင်းဖြစ်တဲ့ မန်စီးတီး၊ လီဗာပူးလ်၊ မန်ယူ၊ ချယ်လ်ဆီးတို့ ပါဝင်နေသလို၊ မန်ယူ - လီဗာပူးလ်၊ မန်စီးတီး - နယူးကာဆယ်တို့လို ပွဲကောင်းတွေပါဝင်နေတာကြောင့် စိတ်လှုပ်ရှားရင်ခုန်စရာတော့ ကောင်းနေပါတယ်။ အထူးသဖြင့် မန်ယူနဲ့ လီဗာပူးလ်အသင်းတို့ရဲ့ အင်္ဂလန်အနောက်မြောက်ဒါဘီပွဲစဉ်က ပရိသတ်တွေကို ညှို့ယူနေပါတယ်။