ပိုချက်တီနိုနဲ့ ချယ်လ်ဆီးရဲ့ နိမ့်မြင့်တက်ကျ ခရီးလမ်းက မပြီးဆုံးနိုင်သေးပါဘူး။ နိုင်တစ်ခါ၊ ရှုံးတစ်လှည့်သံသရာအကြားမှာ စတမ်းဖို့ဒ်ဘရစ်ချ်ဟာ မျှော်လင့်ချက်တွေနဲ့ နီးလာလိုက်၊ ဝေးသွားလိုက် ဖြစ်နေတယ်။ ပြီးခဲ့တဲ့ (၂)ရာသီအတွင်း ပိုင်ရှင်သစ်၊ နည်းပြသစ်၊ ကစားသမားသစ်တွေနဲ့ အရာရာအသစ်ဖြစ်နေတဲ့အသင်းတစ်သင်းကို အချိန်ပေးရဦးမယ်ဆိုရင်တောင် လက်ရှိရပ်တည်မှုတွေ၊ ရလဒ်တွေက ချယ်လ်ဆီးလို ဥရောပချန်ပီယံဟောင်း၊ ကမ္ဘာ့ချန်ပီယံဟောင်းအသင်းတစ်သင်းအတွက် လက်ခံနိုင်စရာမဟုတ်တာအသေအချာပါပဲ။ ဒီအတွက်လည်း မတည်ငြိမ်ခြင်းဖြတ်သန်းမှုတွေအကြား အချိန်တိုအတွင်းမှာပဲ ချယ်လ်ဆီးနဲ့ သက်ဆိုင်သူအားလုံးအပေါ် ဝေဖန်မှုတွေ၊ ဖိအားတွေအပြင်းအထန်ကျရောက်လာခဲ့တယ်။