၂ဝ၁၄ ခုနှစ်အတွင်း ပရိသတ်များကြားတွင် အပျံ့နှံ့ဆုံးတေးသီချင်းဖြစ်လာခဲ့သည့် “မျှော်လင့်ချက်တစ်စုံတစ်ရာ” သီချင်းနှင့် ပရိသတ်အားပေးမှု လက်ခုပ်သံများ သိမ်းပိုက်နိုင်ခဲ့သူ အဆိုတော်နီနီခင်ဇော်အား ထင်ရှားကျော်ကြားကဏ္ဍ၏ အောင်မြင်သည့် အဆိုရှင်တစ်ဦးအဖြစ်  ရွေးချယ်ဖော်ပြအပ်ပါသည်။ အဆိုတော်နီနီခင်ဇော်သည် “မာရီယို” တေးအယ်လ်ဘမ်ထွက်ရှိခဲ့ရာ၌ ယင်းတေးစီးရီးတွင် ပါဝင်သော “မျှော်လင့်ချက်တစ်စုံတစ်ရာ” တေးသီချင်းသည် ပရိသတ်အားပေးမှု များပြားခဲ့သည်။ “မာရီယို” တေးစီးရီး၏ အမ်တီဗွီကို ၂ဝ၁၄ ခုနှစ်အတွင်း ဖြန့်ချိ ခဲ့ရာ၌လည်း ရောင်းအားအကောင်းဆုံးအမ်တီဗွီအဖြစ် ရပ်တည်နိုင်ခဲ့သည်။ “မာရီယို” တေးစီးရီးအမ်တီဗီတွင် “ မျှော်လင့်ချက်တစ်စုံတစ်ရာ” တေးသီချင်းအား အဆိုတော်နီနီခင်ဇော် သရုပ်ဆောင်ခဲ့မှုနှင့် ပတ်သက်၍ ပရိသတ်အားပေးမှု များပြားသကဲ့သို့ ဝေဖန်မှုအချို့လည်း ထွက်ပေါ်ခဲ့သည်။“နီနီ့ရဲ့သီချင်းတွေကို ပရိသတ်တွေက အားပေးကြတဲ့အတွက် နီနီ အတိုင်းမသိပျော်ရပါတယ်။ အထူးသဖြင့်တော့ မျှော်လင့်ချက်တစ်စုံတစ်ရာ သီချင်းလေးက နီနီတို့အားလုံးချစ်ရတဲ့သူအတွက် ရည်ရွယ်ပြီးသီဆိုဖြစ်တာပါ။ ဒီသီချင်းလေးကို ပရိသတ်တွေက အားပေးခဲ့ကြသလို အမ်တီဗွီထွက်လာတဲ့အခါမှာလည်း အားပေးခဲ့ကြတဲ့အတွက် အရမ်းပျော်ရပါတယ်” ဟု အဆိုတော် နီနီခင်ဇော်က ဆိုသည်။အဆိုတော်နီနီခင်ဇော်၏ “မျှော်လင့်ချက်တစ်စုံတစ်ရာ” တေးသီချင်းသည် ပထမဆုံးအကြိမ်ပြုလုပ်ခဲ့သည့် မိုးရာသီဂီတဆုပေးပွဲတွင်လည်း မိုးရာသီအကောင်းဆုံး ပေါ့ပ်သီချင်းဆုနှင့် ပွဲသို့တက်ရောက်လာသည့် ဂီတပညာရှင်များနှင့် ဂီတလောကသားများက ရွေးချယ်သည့် အကောင်းဆုံးသီချင်းဆုများကို ရရှိခဲ့သည်။