ထူးခြားဆန်းသစ်သည့် စာသားရေးဖွဲ့မှု၊ ဂီတဟန်ပန်များဖြင့် ပရိသတ်လက်ခံအားပေးမှု အများအပြားရရှိခဲ့သူ အဆိုတော်ဝေလကို ၂ဝ၁၄ ခုနှစ် ထင်ရှားကျော်ကြားကဏ္ဍ၏ အောင်မြင်သောအဆိုတော်တစ်ဦးအဖြစ် ရွေးချယ်ဖော်ပြအပ်ပါသည်။ အဆိုတော်ဝေလသည် တေးရေးဆရာတစ်ဦးအဖြစ် ဂီတလောကအတွင်းသို့ စတင်ရောက်ရှိလာခဲ့ခြင်းဖြစ်ပြီး “ဆိုင်းဘုတ်ကိုင်ပြီး လမ်းလျှောက်မယ်” တေးသီချင်းနှင့် ပရိသတ်စတင်အားပေးမှု ရရှိခဲ့သူဖြစ်သည်။ဒုတိယမြောက် တစ်ကိုယ်တော်တေးစီးရီးဖြစ်သည့် “မိတ်ကပ်မကြိုက်သောသီချင်းများ” တေးအယ်လ်ဘမ်သည် ၂ဝ၁၄ ခုနှစ်အတွင်း လူကြိုက်အများဆုံး တေးအယ်လ်ဘမ်တစ်ခုအဖြစ် ရပ်တည်ခဲ့သည်။ ဝေလ၏ “မိတ်ကပ်မကြိုက်သောသီချင်းများ”တးစီးရီးတွင် ပါဝင်သည့် တေးသီချင်းအများစုမှာ အက်ဖ်အမ်ရေဒီယိုလိုင်းများတွင် ပရိသတ်တောင်းဆိုမှုအများဆုံး တေးသီချင်းများစာရင်းတွင် ပါဝင်ခဲ့သည်။ အဆိုတော်ဝေလသည် အောက်တိုဘာလတွင် ပြုလုပ်ခဲ့သည့် မိုးရာသီဂီတဆုပေးပွဲတွင်လည်း  မိုးရာသီ အကောင်းဆုံးရော့ခ်သီချင်းဆုနှင့် အကဲဖြတ်ဒိုင်များက ရွေးချယ်သည့် အကောင်းဆုံးဆုများကို ရရှိခဲ့သည်။“ကျွန်တော်ဖြတ်သန်းခဲ့ရတဲ့ ဂီတခရီးလမ်းက အရမ်းကြမ်းတမ်းပါတယ်။ ဒါပေမဲ့ ကျွန်တော်ယုံကြည်တဲ့ ဂီတခရီးလမ်းမှာ ကူညီပံ့ပိုးပေးတဲ့သူတွေ အများကြီးတွေ့ဆုံခွင့်ရပါတယ်။ သူတို့ရဲ့ ပံ့ပိုးမှုတွေနဲ့ပဲ ဒီနေ့ ဒီနေရာကို ရောက်လာတာပါ။ကျွန်တော့်သီချင်းစာသားတွေကတော့ ကျွန်တော့်စိတ်ထဲမှာ ရေးချင်တဲ့စာသားတွေကို ရေးသားခဲ့တာပါ။ အဲဒါကို ပရိသတ်တွေက လက်ခံခဲ့တယ်ဆိုတော့ ကျွန်တော်ဝမ်းသာရပါတယ်။  နောက်ထပ်ဂီတအလုပ်တွေ ထပ်လုပ်ဖို့အတွက်လည်း ခွန်အားတွေလည်း အများကြီးရလာပါတယ်။ အဓိက ကတော့ သမားရိုးကျလမ်းကြောင်းထဲကခွဲထွက်လာတဲ့ သီချင်းစာသားတွေကို ရေးသားရတာကို အရမ်းသဘောကျပါတယ်။ အဲဒီလိုအကြောင်းအရာမျိုး၊ စာသားမျိုးတွေပဲ ထပ်ရေးဖြစ်မှာပါ” ဟု အဆိုတော်ဝေလက ရှင်းပြသည်။အဆိုတော်ဝေလ၏ မိတ်ကပ်မကြိုက်သောသီချင်းများ အယ်လ်ဘမ်၏ ဗွီစီဒီကို စတင်ရိုက်ကူးနေပြီဖြစ်ပြီး ၂ဝ၁၅ နှစ်ဆန်းပိုင်းအတွင်း ထွက်ရှိနိုင်ရန် စီစဉ်သွားမည်ဟု သိရသည်။ ဝေလသည် တေးသီချင်းအသစ်နှစ်ပုဒ်ကိုလည်း ဒီဇင်ဘာလအတွင်း အွန်လိုင်းမှ ဖြန့်ချိခဲ့သည်။