၂ဝ၁၄ ခုနှစ်အတွင်း လူငယ်ပရိသတ်များအကြား လက်ခံအားပေးမှု များပြားလာပြီး ဇာတ်ကားရိုက်ကူးထွက်ရှိမှု များပြားလာသည့် လူငယ်သရုပ်ဆောင် ဇေရဲထက်ကို ထင်ရှားကျော်ကြားကဏ္ဍ၏ တက်သစ်စ အနုပညာရှင်တစ်ဦးအဖြစ် ရွေးချယ်ဖော်ပြအပ်ပါသည်။ လူငယ်သရုပ်ဆောင် ဇေရဲထက်သည် ၂ဝ၁၃ ခုနှစ်အတွင်းတွင် ခေါင်းဆောင်မင်းသားအဖြစ် ဇာတ်ကားများ စတင်ရိုက်ကူးလာသူဖြစ်ပြီး ၂ဝ၁၄ ခုနှစ်အတွင်းတွင် ပရိသတ်လက်ခံအားပေးမှု များပြားလာသူဖြစ်သည်။ သရုပ်ဆောင်ဇေရဲထက်သည် ဟာသဇာတ်ကား၊ ရိုးမန့်စ်ဖန်စီ ဇာတ်ကားများနှင့် ပရိသတ်သဘောကျနှစ်သက်ခဲ့ပြီး ကြော်ငြာများလည်း လက်ခံရိုက်ကူးခွင့်ရရှိလာသူဖြစ်သည်။ ဇေရဲထက်သည် ပထမဆုံးရိုက်ကူးခဲ့သည့် “ပြောလို့မဖြစ်ဘူး” ဇာတ်ကားနှင့် ပရိသတ်စတင်သတိထားမိကာ ၂ဝ၁၄ ခုနှစ်အတွင်း ထွက်ရှိခဲ့သည့် ဖေဖော်ဝါရီ ၃ဝ ၊ တစ်ကျပ်ဖိုးသုံးကောင်၊ ဝှက်ဖဲ၊ ဧပရယ်ညွှန်းစာဖွဲ့ဇာတ်ကားများ နှင့် ပရိသတ်အားပေးမှု ရရှိလာသူဖြစ်သည်။“အနုပညာကို ချစ်တဲ့စိတ်တစ်ခုတည်းနဲ့ပဲ ဒီလောကထဲကို ရောက်လာတာပါ။ နယ်ကနေ တစ်ယောက်တည်းလာလုပ်တာဖြစ်တဲ့အတွက် အခက်အခဲတွေ အများကြီးရှိပါတယ်။ အချိန်အတိုင်းအတာတစ်ခုအတွင်းမှာ အောင်မြင်အောင်ကြိုးစားမယ်ဆိုတဲ့စိတ်နဲ့ ကြိုးစားရင်း ပရိသတ်လက်ခံလာတာပါ။ ကျွန်တော်ပါဝင်ခဲ့တဲ့ ဇာတ်ကားတွေကို ပရိသတ်တွေက သဘောကျနှစ်သက်တယ်ဆိုတော့လည်း ကြိုးစားရကျိုးနပ်တာပေါ့လေ။ ဇာတ်ကောင်စရိုက်စုံအောင်တော့ ကြိုးစားနေပါတယ်”ဟု သရုပ်ဆောင် ဇေရဲထက်က ဆိုသည်။ဇေရဲထက်သည် Lavender ၊ အောင်သီရိ၊ Green Hill ၊ နယူးထိပ်တန်းရုပ်ရှင်နှင့် ဗီဒီယိုထုတ်လုပ်ရေးများနှင့်လက်တွဲကာ ဇာတ်ကားများ ရိုက်ကူးနေခြင်းဖြစ်ပြီး ၂ဝ၁၄ ခုနှစ်အတွင်း ရုပ်ရှင်ကားကြီး၌လည်း ပါဝင်ခွင့်ရရှိခဲ့ကြောင်း သိရသည်။