မွန်ပြည်နယ် ဘီးလင်းမြို့နယ် ရွှေရောင်ပြကျေးရွာ လမ်းဆုံအနီး ရန်ကုန် - မော်လမြိုင်ကားလမ်းတွင် ဇူလိုင်လ ၂၅ ရက် နံနက် ၁၁ နာရီခန့်က Probox ယာဉ်တစ်စီးပစ်ခတ်ခံရပြီး အမျိုးသားတစ်ဦး ထိခိုက်ဒဏ်ရာရရှိခဲ့ကြောင်း ဒေသခံများ၏ ပြောကြားချက်များအရ သိရသည်။
အဆိုပါ Probox ယာဉ်မှာ ရန်ကုန် မှ ထားဝယ်ဘက်သို့ သွားမည့်ယာဉ်ဖြစ်ကြောင်း နှင့် ယာဉ်ပေါ်တွင် ယာဉ်မောင်းတစ်ဦးနှင့် ခရီးသည်နှစ်ဦး လိုက်ပါလာသည်ဟု သိရကြောင်း ဒေသခံတစ်ဦးက ပြောကြားသည်။
“ပစ်ခတ်ခံခဲ့ရတဲ့ Probox ယာဉ်ပေါ်မှာ မောင်ကိုကိုနိုင် နဲ့ ဒေါ်စန်း ဆိုတဲ့ အမျိုးသမီးတစ်ဦးလိုက်ပါလာတာလို့ သိရတယ်။ ဒေါ်စန်း ကတော့ ဘာမှ မဖြစ်ဘူး။ မောင်ကိုကိုနိုင် မှာက ညာဘက်ပေါင်မှာ ကျည်ဖောက်ဝင်ဒဏ်ရာ (၂) ချက်ရရှိခဲ့တယ်လို့ သိရတယ်” ဟု ၎င်းဒေသခံက ဆက်လက်ပြောကြားသည်။
ကျည်ထိမှန်ဒဏ်ရာရရှိခဲ့သည့် အမျိုးသားအား လူမှုကူညီကယ်ဆယ်ရေးအဖွဲ့က သထုံခရိုင်ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။
ဘီးလင်းမြို့နယ် ရွှေရောင်ပြကျေးရွာအနီး ရန်ကုန် - မော်လမြိုင်ကားလမ်းတွင် မော်တော်ယာဉ်များ မကြာခဏပစ်ခတ်ခံရကြောင်း နှင့် ပြီးခဲ့သည့် မေလ (၃၀) ရက်၊ နံနက် (၈) နာရီအချိန်ခန့်ကလည်း (၆) ဘီးကုန်တင်ယာဉ်တစ်စီး ပစ်ခတ်ခံရပြီး အမျိုးသမီးတစ်ဦး ထိခိုက်ဒဏ်ရာရရှိခဲ့သေးကြောင်း ဒေသခံများ၏ ပြောကြားချက်များအရ သိရသည်။
