လိုက်ပ်ဇစ်အသင်း အားကစားဒါရိုက်တာဖြစ်သူ မက်စ်အီဘာလ်က ခရိုအေးရှားနောက်ခံလူ ဂါဗာဒီယိုလ်၏အပြောင်းအရွှေ့အတွက် မန်စီးတီးအသင်းနှင့် သဘောတူညီမှု မရသေးကြောင်း တုံ့ပြန်ပြောကြားခဲ့သည်။
မန်စီးတီးအသင်းသည် အသက် ၂၁ နှစ်အရွယ် ကြယ်ပွင့်ကစားသမား ဂီဗာဒီယိုလ်ကို ခေါ်ယူရန် သဘောတူညီမှုရရှိထားပြီး ပြီးခဲ့သည့် ဗုဒ္ဓဟူးနေ့တွင် ပထမအဆင့် ဆေးစစ်မှုပြုလုပ်ခဲ့ကြောင်း ဗြိတိန်သတင်းဌာနများစွာက ဖော်ပြခဲ့ကြသည်။ သို့သော် မက်စ် အီဘာလ်က ၎င်းအတွက် သဘောတူညီမှု မရသေးသလို ဆေးစစ်မှုပြုလုပ်ခဲ့ခြင်းလည်း မရှိကြောင်း ငြင်းဆန်ခဲ့ခြင်းဖြစ်သည်။
"ယော်စကိုနဲ့ပတ်သက်လို့ နောက်ဆုံးသိရတဲ့ အချက်အလက်တွေကို အများကြီး ရေးသားဖော်ပြနေကြပြီး အဲဒါတွေအားလုံးက ကျွန်တော်တို့ကို အံ့အားသင့်စေပါတယ်။ လောလောဆယ်မှာ ကျွန်တော်တို့နဲ့ အဝေးကြီးလိုပါသေးတယ်။ ယော်စကို ဒီမှာရှိနေတာ ခင်ဗျားလည်း တွေ့နေတာပဲ။ အဲဒီသတင်းတွေက အမှန်မဟုတ်ပါဘူး။ သူ့အနေနဲ့ ဆေးစစ်မှုလည်း မလုပ်ခဲ့ပါဘူး။ ကျွန်တော်တို့သိထားတာ အဲဒီလို မဟုတ်ပါဘူး။ ပြီးတော့ သူက ကျွန်တော်တို့နောက်ကွယ်မှာ အဲဒီလိုလုပ်ခဲ့တယ်လို့လည်း မထင်ပါဘူး။ ဘာဖြစ်လို့လဲဆိုတော့ သူက ပရော်ဖက်ရှင်နယ်ပီသတဲ့သူ ဖြစ်လို့ပါ။ သဘောတူညီမှု မရသေးပါဘူး" ဟု ၎င်းက ပြောကြားခဲ့သည်။
ဂီဗာဒီယိုလ်သည် ဥရောပ၏ အထွန်းတောက်ဆုံး လူငယ်တစ်ဦးအဖြစ် သတ်မှတ်ခံထားရပြီး ခံစစ်အတွင်းလူနေရာအပြင် ဘယ်နောက်ခံလူအဖြစ်ပါ ကစားနိုင်သူဖြစ်သည်။ မန်စီးတီးအသင်းအနေဖြင့် ၎င်းအတွက် ပြောင်းရွှေ့ကြေး ပေါင် ၈၇ သန်း (ယူရိုသန်း ၁၀၀) အထိ ပေးချေရဖွယ်ရှိပြီး ယင်းပမာဏမှာ နောက်ခံလူများအတွက် ကမ္ဘာ့စံချိန်သစ်အဖြစ် မှတ်တမ်းဝင်မည်ဖြစ်သည်။
ဂီဗာဒီယိုလ်သည် လိုက်ပ်ဇစ်အသင်းနှင့် ၂၀၂၇ ခုနှစ်အထိ သက်တမ်းတိုးစာချုပ် ချုပ်ဆိုထားပြီး စာချုပ်လျော်ကြေးတန်ဖိုး ယူရိုသန်း ၁၁၀ အဖြစ် ထည့်သွင်းထားသော်လည်း လာမည့် ၂၀၂၄ ခုနှစ်မှသာ စတင်အကျုံးဝင်မည်ဖြစ်ကြောင်း သိရသည်။
