သူသည် ရုရှားနိုင်ငံသားဖြစ်သည်။ သူ့ချစ်သူမိန်းကလေးသည် ယူကရိန်းနိုင်ငံသူဖြစ်သည်။

သူတို့နှစ်ဦးသည် အွန်လိုင်းပေါ်တွင် တွေ့ပြီး ချစ်သူများဖြစ်ခဲ့ကြသည်။ သို့သော် သူတို့နှစ်နိုင်ငံအကြား စစ်ပွဲဖြစ်ပွားခဲ့ချိန်တွင် သူတို့၏ ဆက်ဆံရေးအပေါ် အနည်းငယ်သက်ရောက်မှုရှိခဲ့သော်လည်း ငယ်ရွယ်သည့် သူတို့စုံတွဲ၏ အချစ်ရေးအတွက် ကြီးမားသည့် ပြဿနာတစ်ခု မဟုတ်ခဲ့ပေ။

အသက် ၂၃ နှစ်အရွယ် ကိုယ်စီရှိကြသည့် အီယီရီကူရော့ချ်ကင်နှင့် မာရီယာဗီဟီစကာတို့သည် အွန်လိုင်းပေါ်တွင် ဂိမ်းကစားရင်း မေတ္တာမျှခဲ့ကြခြင်းဖြစ်သည်။

သို့သော် ရုရှားက ၎င်း၏အိမ်နီးချင်း ယူကရိန်းကို ကျူးကျော်မှုသည် သူတို့အချစ်ရေးအတွက် ခြိမ်းခြောက်မှုတစ်ခုဖြစ်ခဲ့သည်။

မည်သို့ပင်ဆိုစေ သူတို့နှစ်ဦးလုံးသည် ၎င်းတို့၏ နိုင်ငံများအတွင်း ပျံ့နှံ့နေသည့် စစ်ပွဲ၏ ရန်လိုမှုများကို ကျောခိုင်းပြီး အတူနေထိုင်ရန် ရွေးချယ်ခဲ့ကြသည်။

ဗီဟီစကီသည် ယူကရိန်းမြို့တော် ကိယက်ဗ်အနီးရှိ ဇက်ဗယာဂယ်မြို့တွင် နေထိုင်ပြီး ကူရော့ချ်ကင်သည် ရုရှားနိုင်ငံ စိန့်ပီတာစဘတ်မြို့တွင် နေထိုင်သည်။

သူတို့နှစ်ဦးအကြား မိုင်ပေါင်းများစွာ ကွာဝေးလှသော်လည်း ယင်းစုံတွဲသည် လက်လျှော့ခဲ့ခြင်း မရှိပေ။

“ဒါသိပ်တော့ မခက်ပါဘူး။ ကျွန်မဘာကိုမှ မကြောက်ပါဘူး။ ကျွန်မ ပျော်ရွှင်နေပါတယ်။ ဘာလို့လဲဆိုတော့ ကျွန်မက ချစ်မိသွားလို့ပါ” ဟု ဗီဟီစကီက အပြုံးများဖြင့် ပြောကြားခဲ့သည်။

ကူရော့ချ်ကင်ကလည်း သူတို့နှစ်ဦးအပြင်တွင် လူချင်းတွေ့ဆုံရန် စီစဉ်ခဲ့ရပုံများကို ပြန်ပြောင်းပြောပြခဲ့သည်။

“ပြီးခဲ့တဲ့ တစ်နှစ်လောက်ကပေါ့။ ကျွန်တော်ဟာ ယူကရိန်းမှာရှိတဲ့ မာရီယာကို သွားတွေ့ဖို့ ပတ်စ်ပို့လျှောက်ခဲ့ပါတယ်။ အဲဒီပတ်စ်ပို့ဟာ ဇန်နဝါရီလထဲမှာ ရခဲ့ပါတယ်။ ဒါပေမဲ့ ခင်ဗျားသိတဲ့အတိုင်းပဲ ဖေဖော်ဝါရီလထဲမှာ စစ်ပွဲစတင်ဖြစ်ပွားခဲ့တော့ ကျွန်တော်တို့ အစီအစဉ်တွေအားလုံး ပျက်စီးသွားခဲ့ပါတယ်” ဟု ကူရော့ချ်ကင်က ပြောကြားခဲ့သည်။

ယူကရိန်းတွင် ရုရှားတပ်များ၏ ပြင်းထန်သည့် တိုက်ခိုက်မှုများ၊ ကမ္ဘာ့နိုင်ငံအသီးသီး၏ ဝေဖန်ရှုတ်ချမှုများနှင့် နိုင်ငံအတွင်းမှ ထွက်ပြေးခဲ့ကြသည့် ယူကရိန်းစစ်ဘေးဒုက္ခသည်များအကြားတွင် သူတို့နှစ်ဦး တွေ့ဆုံရေးမျှော်လင့်ချက်များအားလုံး အငွေ့ပြန်သွားခဲ့သည်။

ဗီဟီစကီနှင့် ကူရော့ချ်ကင်တို့သည်လည်း ကြံရာမရဖြစ်ခဲ့ရသည်ဟု ဆိုသည်။ စစ်ပွဲစတင်ဖြစ်ပွားခဲ့ပြီးနောက် မကြာမီအချိန်အတွင်း ဗီဟီစကီသည် ချက်နိုင်ငံသို့ ပြောင်းရွှေ့ခဲ့ပြီး ကူရော့ချ်ကင်သည် ရုရှားတွင် နေထိုင်ဆဲဖြစ်သည်။

သို့သော်လည်း သူတို့နှစ်ဦးလုံးသည် အတူတကွနေထိုင်ရန် နည်းလမ်းအချို့ကို စဉ်းစားခဲ့ကြသည်ဟု ကူရော့ချ်ကင်က ပြောကြားခဲ့သည်။

အဖြေမှာ ဆားဘီးယားနိုင်ငံဖြစ်သည်။  ဘော်လ်ကန်ဒေသရှိ ဆလပ်ဗ်နိုင်ငံဖြစ်သည့် ဆာဘီးယားသည် ရုရှားနှင့် ရင်းနှီးသည့်ဆက်ဆံရေးရှိနေဆဲဖြစ်ပြီး ရုရှားနိုင်ငံသားများသည် ဗီဇာမလိုဘဲ ဆားဘီးယားနိုင်ငံအတွင်း ဝင်ရောက်နိုင်သည်။

ထို့ကြောင့် ဗီဟီစကာနှင့် ကူရော့ချ်ကင်တို့အတွက် ပထမဆုံး လူချင်းတွေ့ဆုံခဲ့သည့် နေရာသည် ဆားဘီးယား၏မြို့တော် ဘဲလ်ဂရိတ်ဖြစ်ခဲ့သည်။

“ကျွန်တော်က ဆာဘီးယားကို ဧပြီ ၂၇ ရက်က ရောက်ခဲ့တာပါ။ သူ့ကို ရက်အနည်းငယ်စောင့်ခဲ့ရတာပေါ့။ သူကတော့ ချက်နိုင်ငံကနေ ဒီကိုရောက်ရှိလာခဲ့ပြီး ကျွန်တော်တို့နှစ်ဦးဟာ ဘတ်စ်ကားဂိတ်မှာ တွေ့ဆုံခဲ့ကြပါတယ်” ဟု ကူရော့ချ်ကင်က ပြောကြားခဲ့သည်။

ဗီဟီစကာကလည်း ကူရော့ချ်ကင်သည် သူ့စိတ်ကူးထဲက ပုံစံနှင့် တစ်ထပ်တည်းကျခဲ့သည်ဟု ဆိုသည်။

“အဲဒီအခိုက်အတန့်က မယုံကြည်နိုင်လောက်အောင်ကောင်းမွန်တဲ့ ပျော်ရွှင်မှုဖြစ်ခဲ့ပါတယ်။ ကျွန်မဟာ ၁၆ နာရီလောက် လုံးဝမအိပ်ဘဲ ခရီးထွက်လာခဲ့တာပါ။ အိပ်လည်းမပျော်ပါဘူး။ အဲဒါကြောင့် ကျွန်မ ကားပေါ်ကဆင်းတဲ့အချိန်မှာ သူ့လက်ထဲကို လဲပြိုကျသွားခဲ့ပါတယ်” ဟု ဗီဟီစကာက ပြောကြားခဲ့သည်။

ယင်းအချိန်မှစပြီး သူတို့နှစ်ဦးသည် ဘဝသစ်တစ်ခုကို အတူတကွ ထူထောင်ခဲ့ကြသည်။

သူတို့သည် ဘဲလ်ဂရိတ်မြို့ဆင်ခြေဖုံးတွင် တိုက်ခန်းအသေးစားတစ်ခု ရှာမတွေ့မီအချိန်အထိ တည်းခိုဆောင်တစ်ခုတွင် နေထိုင်ခဲ့ကြသည်။

သူတို့သည် စိန့်ပီတာစဘတ်တက္ကသိုလ်တွင် IT ပညာရပ်များကို အွန်လိုင်းမှတစ်ဆင့် သင်ယူနေသကဲ့သို့ များပြားသည့် အလုပ်များကိုလည်း ရှာဖွေလုပ်ကိုင်ခဲ့ကြသည်။

အတူနေထိုင်သည့် ဘဝတွင် ပြဿနာများလည်း ကြုံတွေ့ခဲ့ရသည်။ ပြီးခဲ့သည့် ဇူလိုင်လက ရုရှားလိုလားသည် အစွန်းရောက်များသည် ရုရှား၏ကျူးကျော်မှုသင်္ကေတဖြစ်သည့် အင်္ဂလိပ်အက္ခရာ Z ကို ၎င်းတို့နှစ်ဦး နေထိုင်သည့် တိုက်တွင် ရေးဆွဲခဲ့ကြပြီး တိုက်ခိုက်သူများသည် ၎င်းတို့တိုက်ခန်းအတွင်း ချိုးဖျက်ဝင်ရောက်ခဲ့ကြသည်။

ထို့ပြင် ၎င်းတို့နှစ်ဦးသည် ဆိုးသွမ်းသည့် လူတစ်စု၏ တိုက်ခိုက်မှုကိုလည်း ခံခဲ့ရသည်ဟု ကူရော့ချ်ကင်က ပြောကြားခဲ့သည်။

ပြီးခဲ့သည့်နှစ်အတွင်း ရုရှားနိုင်ငံသား ၂၀၀,၀၀၀ ခန့်နှင့် ယူကရိန်းနိုင်ငံသား ၂၀,၀၀၀ ခန့်သည် ဆားဘီးယားနိုင်ငံအတွင်း သို့ ဝင်ရောက်ခဲ့ကြသည်။

ဥရောပသမဂ္ဂအဖွဲ့ဝင်နိုင်ငံဖြစ်ရန် ကြိုးပမ်းနေသည့်တိုင် ရုရှားအား ပိတ်ဆို့မှုများ ချမှတ်သည့် အနောက်နိုင်ငံများနှင့် ပူးပေါင်းရန် ငြင်းဆိုခဲ့သည့် ဆားဘီးယားနိုင်ငံသို့ ရောက်ရှိသည့် ရုရှားနိုင်ငံသားအများစုသည် ယင်းဘော်လ်ကန်နိုင်ငံအတွင်း စီးပွားရေးလုပ်ငန်းများ ထူထောင်ခဲ့ကြသည်။

လက်ရှိအချိန်တွင် ယူကရိန်းစစ်ပွဲသည် ကမ္ဘာလုံးဆိုင်ရာ မဟာမိတ်ဖွဲ့မှုအခြေအနေကို ပုံစံအသစ်သွင်းခဲ့ပြီး ယခင်က  စိုးရိမ်ပူပန်မှုများကို ပြန်လည်ပေါ်ပေါက်လာစေခဲ့ကာ နေတိုးအပါအဝင် အမေရိကန်နှင့် ဥရောပအကြား ချည်နှောင်ထားသည့် ကတိကဝတ်များအပေါ် အနည်းငယ်သက်ရောက်မှုရှိခဲ့သည်။

ထို့ပြင် ယူကရိန်းစစ်ပွဲသည် ရုရှား၊ တရုတ်၊ အီရန်နှင့် မြောက်ကိုရီးယားအကြား ဆက်ဆံရေးများ ပိုမိုနီးစပ်သွားစေခဲ့သည်ဟုလည်း ထင်မြင်ယူဆချက်များ ထွက်ပေါ်နေသည်။

“တစ်ခါတလေ စစ်ပွဲနဲ့ပတ်သက်ပြီး ကျွန်တော်တို့ဆွေးနွေးခဲ့ပေမဲ့ ကျွန်တော်တို့ကြားမှာ ဘာပြသနာမှ မရှိခဲ့ပါဘူး။ အခြားသူတွေလိုပဲ ကျွန်တော်တို့လည်း အမြင်အမျိုးမျိုးရှိပါတယ်။ လူတွေအများကြီးဆိုရင် ရှုထောင့်တွေအများကြီး ရှိနေပါလိမ့်မယ်။ ဒါတွေအားလုံးကို ထိန်းဖို့မဖြစ်နိုင်ပါဘူး” ဟု ကူရော့ချ်ကင်က ပြောကြားခဲ့သည်။

ဗီဟီစကာအတွက်မူ သူ့အချစ်ရေးကို သူ့မိသားစုက မကန့်ကွက်သည့်တိုင် အခြားယူကရိန်းနိုင်ငံသားများကို လက်ခံနိုင်စေရန် မည်သို့လုပ်ဆောင်ရမည်ဆိုခြင်းသည် အကြီးမားဆုံး စိုးရိမ်စရာကိစ္စဖြစ်သည်။

“ဘာတွေဆက်ဖြစ်မလဲဆိုတာ ကျွန်မတို့ စောင့်ကြည့်ရမှာပဲ။ မနက်ဖြန် ဘာဖြစ်မလဲဆိုတာ ကျွန်မတို့မှ မသိတာ။ နျူကလီးယားစစ်ပွဲအထိတောင် ဖြစ်ချင်လည်း ဖြစ်နိုင်ပါလိမ့်မယ်။ သူတို့ဟာ ကျွန်မတို့ကို ခြောက်လှန့်နေပါတယ်။ ကျွန်မအနေနဲ့ အဝေးကြီးကို တွေးမထားနိုင်ပါဘူး” ဟု ဗီဟီစကီက ပြောကြားခဲ့သည်။

ကူရော့ချ်ကင်ကလည်း သူတို့ဆီရောက်လာမည့် အခက်အခဲများကို ရင်ဆိုင်သွားမည်ဟု ဆိုသည်။

“ကျွန်တော်တို့ ပျော်ရွှင်ပါတယ်။ ဘာလို့လဲဆိုတော့ ကျွန်တော်တို့ အတူရှိနေလို့ပါပဲ” ဟု ကူရော့ချ်ကင်က ပြောကြားခဲ့သည်။

Ref:AP