မန်ယူအသင်းကို ဝယ်ယူရန်အတွက် လက်ရှိအချိန်တွင် ကာတာ၏အကြီးဆုံးဘဏ်ဖြစ်သော QIB ၏ ဥက္ကဋ္ဌဖြစ်သူ ရှိတ်ဂျက်ဆင်ဘင်ဟာမက်အယ်လ်သာနီနှင့် ဗြိတိန်၏ အချမ်းသာဆုံးပုဂ္ဂိုလ် ဆာဂျင်ရက်ကလစ်ဖ်တို့ အပြိုင်ကြိုးပမ်းနေပြီး အစောဆုံးအဖြစ် မေလဝန်းကျင်မှသာ အရောင်းအဝယ်အပြီးသတ်နိုင်ဖွယ်ရှိကြောင်း သိရသည်။
မန်ယူအသင်းကို ၂၀၀၅ ခုနှစ်ကတည်းက ပိုင်ဆိုင်ထားသည့် အမေရိကန်သူဌေး ဂလေဇာမိသားစုက အသင်းအား ပြန်လည်ရောင်းချရန် အမေရိကန်နိုင်ငံ နယူးယောက်မြို့ အခြေစိုက် Raine Group ရင်းနှီးမြှုပ်နှံမှုဘဏ်ထံ တာဝန်လွှဲအပ်ထားပြီး ဝယ်ယူလိုသူများအနေဖြင့် သောကြာနေ့ ဗြိတိန်စံတော်ချိန် ည (၁၀) နာရီ နောက်ဆုံးထား၍ တရားဝင်ကမ်းလှမ်းမှုပြုလုပ်ခဲ့ရသည်။
ယင်းသို့ ကမ်းလှမ်းရာတွင် ကာတာဝန်ကြီးချုပ်ဟောင်း ဟာမက်ဘင်ဂျက်ဆင်ဘင်ဂျာ ဘာအယ်လ်သာနီ၏သားဖြစ်သူ QIB(ကာတာအစ္စလာမ် မစ်ဘဏ်) ဥက္ကဋ္ဌ ရှိတ်ဂျက်ဆင်ဘင်ဟာမက်အယ်လ်သာနီက ၎င်း၏ Nine Two ဖောင်ဒေးရှင်းမှတစ်ဆင့် ဝယ်ယူရန် ကမ်းလှမ်းခဲ့သလို၊ ဗြိတိန်၏ အချမ်းသာဆုံးပုဂ္ဂိုလ် ဆာဂျင်ရက်ကလစ်ဖ်ကလည်း ၎င်းင်း၏ INEOS ကုမ္ပဏီမှတစ်ဆင့်ဝယ်ယူရန် ကမ်းလှမ်းခဲ့သည်။
ထို့ပြင် အေစီမီလန်အသင်း၏ ပိုင်ရှင်ဟောင်းဖြစ်သော အမေရိကန်ရင်းနှီးမြှုပ်နှံမှုကုမ္ပဏီ Elliott ကလည်း ကမ်းလှမ်းမှု ဝင်ရောက်ပြုလုပ်ခဲ့ကြောင်း သိရသည်။ Elliott က သတ်မှတ်ထားသည့် ဈေးကွက်ပိတ် ချိန်မတိုင်မီ ဝင်ရောက်ကမ်းလှမ်းခဲ့ခြင်းဖြစ်ကြောင်း မီဒီယာ အချို့က ဖော်ပြခဲ့သော်လည်း ကမ်းလှမ်းသည့် ငွေကြေးပမာဏကိုမူ ဖော်ပြခြင်းမရှိခဲ့ပေ။
၎င်းတို့၏ ကမ်းလှမ်းမှုမှာ အနည်းဆုံးဖြစ်နိုင်သည့်အတွက် ရှိတ်ဂျက်ဆင်နှင့် ဆာဂျင်ရက်ကလစ်ဖ်တို့သာ အပြိုင်လုရဖွယ်ရှိကြောင်း သုံးသပ်မှုများလည်းရှိခဲ့သည်။ ရှိတ်ဂျက်ဆင်က မန်ယူအသင်းကို ဝယ်ယူရန် ပေါင်(၄.၅)ဘီလီယံဖြင့် ကမ်းလှမ်းခဲ့ပြီး ဆာဂျင်ရက်က လစ်ဖ်က ပေါင်(၄)ဘီလီယံဖြင့် ကမ်းလှမ်းခဲ့ခြင်းဖြစ်ကြောင်း သိရသည်။
ဂလေဇာမိသားစုသည် မန်ယူအသင်းကို ၂၀၀၅ ခုနှစ် တွင် ပေါင်သန်း(၈၀၀)ဝန်းကျင်ဖြင့် ဝယ်ယူခဲ့ခြင်းဖြစ်ပြီး (၁၈)နှစ်ဝန်းကျင်အကြာ၌ ပြန်လည်ရောင်းထုတ်ရန် စီစဉ်ရာတွင်မူ အားကစားအသင်းအရောင်းအဝယ်များ၌ ကမ္ဘာ့ စံချိန်တင်ဖြစ်စေမည့် တန်ဖိုးနှုန်းထားအထိ ရရှိရန် မျှော်မှန်းထားကြောင်း သိရသည်။
အစောပိုင်းသတင်းများအရ ဂလေဇာမိသားစုသည် မန်ယူအသင်းကို ပေါင်(၆)ဘီလီယံရရှိမှသာ ရောင်းထုတ်ရန် ဆန္ဒရှိနေသည်ဟု သိရှိရသော်လည်း နောက်ပိုင်းတွင် မိသားစုဝင်များအတွင်း သဘောထားကွဲလွဲမှုများ ရှိလာခဲ့ပြီး လက်ရှိအချိန်၌ ပေါင်(၅)ဘီလီယံဝန်းကျင်ဖြင့် ရောင်းထုတ်နိုင်ရန် လိုလားနေကြောင်း သိရသည်။
၂၀၂၂ ခုနှစ်အတွင်း Forbes ၏ ထုတ်ပြန်မှုအရ မန်ယူအသင်း၏ တန်ဖိုးမှာ ပေါင်(၃.၇)ဘီလီယံသာရှိသော်လည်း ဂလေဇာမိသားစုက ၎င်းတို့အလိုရှိသည့် ကြိုက်ဈေးရရှိမှသာ ရောင်းထုတ်ဖွယ်ရှိကြောင်းသိရသည်။
သို့သော် လက်ရှိအချိန်တွင် ကာတာသူဌေးများ၏လက်အောက်သို့ မန်ယူအသင်း ရောက်ရှိသွားရန် အလားအလာများနေကြောင်း ခန့်မှန်းမှုများလည်း ရှိနေပြီး ရှိတ်ဂျက်ဆင်သည် မန်ယူအသင်း၏ အိုးလ်ထရက်ဖို့ဒ်ပွဲစဉ်များကို လာရောက်ကြည့်ရှုနေပြီဖြစ်ကြောင်း သိရသည်။
မန်ယူအသင်း၏ အရောင်းအဝယ်ကိစ္စမှာ အစောဆုံးအဖြစ် မေလဝန်းကျင်မှသာ အပြီးသတ်နိုင်ဖွယ်ရှိကြောင်းလည်း ကျွမ်းကျင်သူများက သုံးသပ်ထားသည်။
