မော်လမြိုင်မြို့မှ ဆိုင်ကယ် Taxi မောင်းနှင်သူတစ်ဦးမှာ နိုဝင်ဘာ ၃ ရက် ညပိုင်းက မော်လမြိုင်မြို့နယ် ကော့ခနိကျေးရွာအနီးရှိ လယ်ကွင်းဘေးရေမြောင်းအတွင်း အသတ်ခံရပြီး မော်တော်ဆိုင်ကယ်အား လုယက်ခံခဲ့ရကြောင်း သတင်းရရှိသည်။
အသတ်ခံခဲ့ရသည့် ဆိုင်ကယ် Taxi မောင်းနှင်သူမှာ မော်လမြိုင်မြို့ သာယာအေးရပ်ကွက် ဘဲကုန်းရပ်မှဖြစ်ကြောင်း၊ ၎င်း၏ ရုပ်အလောင်းအား ကော့ခနိကျေးရွာနှင့် တောင်ကုန်းကျေးရွာဘက်သို့ ဆက်သွယ်ထားသည့် လယ်ယာကုန်ထုတ်လမ်းဘေးရေမြောင်းအတွင်းမှ တွေ့ရှိခဲ့ရကြောင်း နှင့် ၎င်း၏ ရင်ဘတ်တွင် ထိုးသွင်းဒဏ်ရာများတွေ့ရကြောင်း ဒေသခံများ၏ ပြောကြားချက်များအရ သိရသည်။
“ရေမြောင်းထဲမှာ လူတစ်ယောက် ထိုးသွင်းဒဏ်ရာတွေနဲ့သေဆုံးနေတာကိုတွေ့ရလို့ လူမှုကူညီကယ်ဆယ်ရေးအဖွဲ့တွေကို အကြောင်းကြားပေးခဲ့ပါတယ်။ သက်ဆိုင်ရာက စစ်ဆေးပြီးတဲ့အခါမှာ ရုပ်အလောင်းကို လူမှုကယ်ဆယ်ရေးအဖွဲ့တွေက မော်လမြိုင်ပြည်သူ့ဆေးရုံကြီး ရင်ခွဲရုံကို ပို့ဆောင်ပေးခဲ့ကြပါတယ်” ဟု ဒေသခံတစ်ဦး က ပြောကြားသည်။
မော်လမြိုင်မြို့တွင် ပြီးခဲ့သည့် ဧပြီလ (၂၅) ရက်ကလည်း ဆိုင်ကယ် Taxi မောင်းနှင်သူတစ်ဦးမှာ မော်လမြိုင်မြို့၊ မင်းရွာကျေးရွာရှိ ရော်ဘာခြံအတွင်း အသတ်ခံရကာ ဆိုင်ကယ်လုယက်ခံခဲ့ရသည့် ဖြစ်စဉ် ဖြစ်ပွားခဲ့ဖူးကြောင်း သိရသည်။
ထို့အပြင် လက်ရှိကာလတွင်လည်း မော်လမြိုင်မြို့အနှံ့မော်တော်ဆိုင်ကယ် ခိုးယူခံရမှုများ နေ့စဉ်လိုလိုဖြစ်ပွားလျှက်ရှိကြောင်း နှင့် ကျူးလွန်သူများကိုလည်း ဖမ်းဆီးရမိခြင်းမရှိသေးကြောင်း မော်တော်ဆိုင်ကယ်ခိုးယူခံရသူများ၏ပြောကြားချက်များအရ သိရသည်။
