စေပိုင်ကုမ္ပဏီပိုင်ရှင် ဦးမောင်ဝိတ်ထံမှ အမေရိကန်ဒေါ်လာငါးသိန်းခွဲရယူခဲ့သည်ဟုဆိုကာ အဂတိလိုက်စားမှုတိုက်ဖျက်ရေးဥပဒေဖြင့် တရားစွဲဆိုထားသည့် အမှုနှစ်မှုဖြင့် ဒေါ်အောင်ဆန်းစုကြည်ကို စွဲချက်တင်လိုက်ကြောင်း အမှုနှင့်ပတ်သက်၍ ထွက်ပေါ်လာသည့် သတင်းများအရ သိရသည်။
နေပြည်တော်အချုပ်ထောင်ရှိ အထူးတရားရုံးတွင် ဇူလိုင် ၂၅ ရက်က အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်အား ရုံးထုတ်စစ်ဆေးခဲ့ပြီး ရာဇဝတ်ကြီးအမှုအမှတ် ၃/၂၀၂၂ နှင့် ၄/၂၀၂၂ တို့ဖြင့် စွဲချက်တင်ကြောင်း အမိန့်ကိုတရားရုံးက ချမှတ်ခဲ့ကြောင်းသိရသည်။
အထက်ပါ အမှုနှစ်မှုနှင့်ပတ်သက်၍ ပြန်ခေါ်သက်သေအဖြစ် တရားလိုဖြစ်သူ အဂတိလိုက်စားမှုတိုက်ဖျက်ရေးကော်မရှင်မှ ဦးရဲထက်အား စွပ်စွဲခံရသူ၏ ရှေ့နေများက တင်ပြခဲ့ကြောင်းနှင့် ဇူလိုင် ၂၆ ရက်တွင် ပြန်ခေါ်သက်သေအား စတင်စစ်ဆေးမည်ဖြစ်ကြောင်း သိရသည်။
ဦးမောင်ဝိတ်အနေဖြင့် ၂၀၁၇ ခုနှစ်တွင် ဒေါ်အောင်ဆန်းစုကြည်၏နေအိမ်တွင် အလုပ်လုပ်နေသည့် ဒေါ်ခင်ခင်ဦးနှင့် ရင်းနှီးခဲ့ကြောင်း၊၂၀၁၈ ခုနှစ် မေလခန့်တွင် ဒေါ်ခင်ခင်ဦး၏အကူအညီဖြင့် ဒေါ်အောင်ဆန်းစုကြည်ကို သွားရောက်ကန်တော့ခဲ့ပြီး ဒေါ်ခင်ကြည်ဖောင်ဒေးရှင်းအတွက် အမေရိကန်ဒေါ်လာတစ်သိန်းကို စက္ကူလက်ဆောင် အိတ်အနက်ထဲသို့ထည့်သွင်း၍ ဦးရှောက်ဆန်းနှင့် ဦးလှမျိုးတို့ရှေ့၌ ဒေါ်အောင်ဆန်းစုကြည်ကို ကိုယ်တိုင်ပေးအပ်ခဲ့ကြောင်း ထွက်ဆိုထားသည့် ဦးမောင်ဝိတ်၏ ရုပ်သံဖိုင်အား ၂၀၂၁ ခုနှစ် မတ် ၁၇ ရက်တွင် နစကသတင်းထုတ်ပြန်ရေးအဖွဲ့က ထုတ်ပြန်ခဲ့သည်။
အဆိုပါရုပ်သံဖိုင်တွင် ဦးမောင်ဝိတ်၏ ပြောကြားချက်အရ ၎င်းအနေဖြင့်ဒေါ်အောင်ဆန်းစုကြည်အား၂၀၁၉ ခုနှစ်တွင် အမေရိကန်ဒေါ်လာတစ်သိန်းခွဲကို စက္ကူလက်ဆောင် အိတ်အနက်ထဲသို့ထည့်၍ ကိုယ်တိုင်ပေးအပ်ခဲ့ကြောင်း၊ ၂၀၂၀ ခုနှစ် ဖေဖော်ဝါရီတွင်လည်း အမေရိကန်ဒေါ်လာငါးသောင်းကို ထပ်မံပေးအပ်ခဲ့ကြောင်း၊ ဧပြီလတွင်လည်း အမေရိကန်ဒေါ်လာ နှစ်သိန်းခွဲကို ပေးအပ်ခဲ့ကြောင်းနှင့် ယင်းသို့ပေးအပ်ချိန်၌ အနားတွင် မည်သူမျှရှိမနေကြောင်း ထည့်သွင်းထွက်ဆိုထားသည်။
စေပိုင်ကုမ္ပဏီပိုင်ရှင် ဦးမောင်ဝိတ်၏ ထွက်ဆိုချက်များအရ ဒေါ်အောင်ဆန်းစုကြည်အား အဂတိလိုက်စားမှုတိုက်ဖျက်ရေးဥပဒေဖြင့် တရားစွဲဆိုထားသည့် ရာဇဝတ်ကြီး အမှုအမှတ် ၃/၂၀၂၂ နှင့် ၄/၂၀၂၂ တို့အား ဇူလိုင် ၂၆ ရက်တွင် ထပ်မံရုံးထုတ်စစ်ဆေးရန် ချိန်းဆိုထားကြောင်း သိရသည်။
လက်ရှိတွင် ဒေါ်အောင်ဆန်းစုကြည်အား တရားစွဲဆိုထားသည့် အမှုများအနက် စစ်ဆေးပြီးစီးသွားသည့် အမှုများအတွက် ထောင်ဒဏ် ၁၁ နှစ်ချမှတ်ထားပြီး နေပြည်တော်အချုပ်ထောင်တွင် သီးခြားထားရှိကြောင်း သိရသည်။
