မန္တလေးမြို့၊ ပြည်ကြီးတံခွန်မြို့နယ်တွင် ရွှေဆိုင်ဓါးပြတိုက်မှုဖြစ်ပွားပြီး ရွှေတစ်ပိသာကျော် ယူဆောင်သွားမှု ဇူလိုင်လ ၂၄ ရက် (ယနေ့) မွန်းလွဲနှစ်နာရီခန့်က ဖြစ်ပွားခဲ့ကြောင်း သတင်းရရှိသည်။
ပြည်ကြီးတံခွန်မြို့နယ်၊(စ)ရပ်ကွက်၊ ၁၂၅လမ်း၊ ၅၈လမ်းနှင့်၅၉ လမ်းကြားရှိ မော့သစ်ရွှေဆိုင်သို့ အမျိုးသား နှစ် ဦးမှ ဆိုင်ကယ် ၁ စီးဖြင့် ရောက်ရှိလာပြီး ဆိုင်အတွင်းသို့ ဝင်ရောက်၍ ပစ္စတိုသေနတ်ဖြင့် ၃ ချက်ခန့်ပစ်ခတ်ပြီး ရွှေများအား ယူဆောင် သွားခြင်းဖြစ်ကြောင်း သိရသည်။
အဆိုပါ ပစ်ခတ်မှုကြောင့် ရွှေဆိုင်လုံခြုံရေး ဝန်ထမ်းတစ်ဦး ခြေဖမိုးတွင် ကျည်ဖောက်ဝင်ဒဏ်ရာ ရရှိခဲ့ကြောင်းနှင့် ဆိုင်မှရွှေထည်ပစ္စည်း တစ်ပိသာကျော်နှင့် ငွေသားသိန်းခြောက်ဆယ်ခန့်အား ယူဆောင်သွားခဲ့ကြောင်း သိရသည်။
ယင်းမောသစ်ရွှေဆိုင်သည် ၂၀၂၁ ခုနှစ်ကုန်ပိုင်းကလည်း ဓါးပြတိုက်ခံရမှုဖြစ်ပွားခဲ့ပြီး ရွှေများ ပါသွားခဲ့သေးသည်။
ယခုအကြိမ်နှင့်ဆိုလျှင် ဒုတိယအကြိမ် ဓါးပြတိုက်ခံရခြင်းဖြစ်သည်။
