ဒေါ်အောင်ဆန်းစုကြည်အား ရွှေနှင့် ဒေါ်လာများပေးခဲ့ရသည်ဆိုသော ဦးဖြိုးမင်းသိန်း၏ထွက်ဆိုချက်အရ အဂတိလိုက်စားမှုတိုက်ဖျက်ရေးဥပဒေပုဒ်မ ၅၅ ဖြင့် တရားစွဲဆိုခဲ့ပြီး စွဲချက်တင်ထားသည့်အမှုအတွက် စွပ်စွဲခံရသူ အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်ကိုယ်တိုင် သက်သေအဖြစ် ထွက်ဆိုခဲ့ကြောင်း အဆိုပါအမှုနှင့်ပတ်သက်၍ ထွက်ပေါ်လာသည့်သတင်းများအရ သိရသည်။
နေပြည်တော်ကောင်စီဝန်းအတွင်းရှိ အထူးတရားရုံးတွင် မတ် ၁၄ ရက်က အဂတိလိုက်စားမှုတိုက်ဖျက်ရေးဥပဒေများဖြင့် တရားစွဲဆိုခြင်းခံထားရသည့် ဒေါ်အောင်ဆန်းစုကြည်အား ရုံးထုတ်စစ်ဆေးခဲ့ပြီး ၎င်းကိုယ်တိုင်ခံပြသက်သေအဖြစ် ထွက်ဆိုခဲ့ကြောင်း အမှုနှင့်ပတ်သက်၍ ထွက်ပေါ်လာသည့် သတင်းများအရ သိရသည်။
ပြီးခဲ့သည့် မတ် ၇ ရက် ရုံးချိန်းတွင် အထက်ပါအမှုနှင့်ပတ်သက်၍ ပြန်ခေါ်သက်သေများအဖြစ် တင်ပြထားသည့် ဦးဖြိုးမင်းသိန်းနှင့် ၎င်း၏ဇနီးဖြစ်သူ ဒေါ်ခင်မိမိကြွယ်၊ ဦးရဲထက်၊ ဦးမောင်မောင်ကြည်တို့အား စွပ်စွဲခံရသူ၏ရှေ့နေများက ပြန်လှန်စစ်မေးခြင်းများ ဆောင်ရွက်ခဲ့ကြောင်း သိရသည်။
ဒေါ်အောင်ဆန်းစုကြည်အား ရွှေနှင့် ဒေါ်လာများပေးခဲ့သည်ဆိုသော ဦးဖြိုးမင်းသိန်း၏ ထွက်ဆိုချက်များပါဝင်သည့် ရုပ်သံဖိုင်အား နစက၏ သတင်းစာရှင်းလင်းပွဲတွင် ထုတ်ပြန်ခဲ့ပြီး ၂၀၂၁ ခုနှစ် အောက်တိုဘာ ၁ ရက်ရုံးချိန်းတွင် ဦးဖြိုးမင်းသိန်းက ရုံးတော်သို့ လာရောက်၍ ထွက်ဆိုရာတွင် ရုပ်သံဖိုင်ပါ အချက်အလက်များအတိုင်း ဒေါ်အောင်ဆန်းစုကြည်အား ဒေါ်လာနှင့်ရွှေများပေးခဲ့သည်ဟု ထွက်ဆိုခဲ့ကာ ယင်းသို့ထွက်ဆိုချက်များသည် မဟုတ်မဟတ်ဖြစ်ကြောင်း ဒေါ်အောင်ဆန်းစုကြည်က All Absurd ဟု သုံးနှုန်းကာ အောက်တိုဘာ ၄ ရက်ရုံးချိန်းတွင် တုံ့ပြန်ခဲ့သည်။