ဒေါ်အောင်ဆန်းစုကြည်အား ရွှေနှင့် ဒေါ်လာများ ပေးခဲ့ရသည်ဆိုသော ရန်ကုန်တိုင်းဒေသကြီး ဝန်ကြီးချုပ်ဟောင်း ဦးဖြိုးမင်းသိန်း၏ ထွက်ဆိုချက်များအရ အဂတိလိုက်စားမှုတိုက်ဖျက်ရေးဥပဒေပုဒ်မ ၅၅ ဖြင့် စွဲချက်တင်ထားသည့် အမှုနှင့်ပတ်သက်၍ ပြန်ခေါ်သက်သေများဖြစ်သည့် ဦးဖြိုးမင်းသိန်းအပါအဝင် လေးဦးအား စစ်ဆေးခဲ့ကြောင်း အမှုနှင့်ပတ်သက်၍ ထွက်ပေါ်လာသည့် သတင်းများအရ သိရသည်။
နေပြည်တော်ကောင်စီဝန်းအတွင်းရှိ အထူးတရားရုံးတွင် မတ် ၇ ရက်က အဂတိလိုက်စားမှုတိုက်ဖျက်ရေး ဥပဒေများဖြင့် တရားစွဲဆိုခြင်းခံထားရသည့် အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်အား ရုံးထုတ်ခဲ့ကြောင်း အမှုနှင့်ပတ်သက်၍ ထွက်ပေါ်လာသည့် သတင်းများအရ သိရသည်။
ဒေါ်အောင်ဆန်းစုကြည်အား ရန်ကုန်တိုင်းဒေသကြီး ဝန်ကြီးချုပ်ဟောင်း ဦးဖြိုးမင်းသိန်းမှ ရွှေနှင့် ဒေါ်လာများပေးခဲ့ရသည်ဆိုသော ထွက်ဆိုချက်အရ တရားစွဲဆိုထားသည့် ရာဇဝတ်ကြီးအမှုအမှတ်(၂)အတွက် ပြီးခဲ့သည့်ရုံးချိန်းတွင် ဒေါ်အောင်ဆန်းစုကြည်အား စွဲချက်တင်ကြောင်း တရားရုံးက အမိန့်ချမှတ်ခဲ့သဖြင့် စွပ်စွဲခံသူများဘက်မှ ပြန်ခေါ်သက်သေများအဖြစ် ဦးဖြိုးမင်းသိန်းနှင့် ၎င်း၏ဇနီးဖြစ်သူ ဒေါ်ခင်မိမိကြွယ်အပါအဝင် လေးဦးအား တင်ပြခဲ့ခြင်းဖြစ်ကြောင်း အမှုနှင့်ပတ်သက်၍ ထွက်ပေါ်လာသည့် သတင်းများအရ သိရသည်။
မတ် ၇ ရက်ရုံးချိန်းတွင် ပြန်ခေါ်သက်သေများအဖြစ် တင်ပြထားသည့် ဦးဖြိုးမင်းသိန်းနှင့် ၎င်း၏ဇနီးဖြစ်သူ ဒေါ်ခင်မိမိကြယ် ဦးရဲထက်၊ ဦးမောင်မောင်ကြည်တို့အား စွပ်စွဲခံရသူ၏ရှေ့့နေများက ပြန်လှန်စစ်မေးခြင်းများ ဆောင်ရွက်ခဲ့ကြောင်း အမှုနှင့်ပတ်သက်၍ ထွက်ပေါ်လာသည့် သတင်းများအရ သိရသည်။
ထို့ပြင် အပတ်စဉ်တနင်္လာတိုင်း ဒေါ်အောင်ဆန်းစုကြည် အဂတိဖြင့်စွဲဆိုထားသည့်အမှုများတွင် ၎င်းတစ်ဦးတည်းအား သီးခြားစစ်ဆေးရန် သတ်မှတ်ထားသော်လည်း မတ် ၇ ရက်ရုံးချိန်းတွင် ကျန်အဂတိအမှုများဖြစ်သည့် နေပြည်တော်တွင် ဒေါ်ခင်ကြည်ဖောင်းဒေးရှင်းအတွက် မြေကွက်များရယူမှု၊ ရန်ကုန်မြို့တွင် ဒေါ်ခင်ကြည်ဖောင်ဒေးရှင်းရုံးချုပ်မြေနေရာနှင့်အဆောက်အဦး ငှားရမ်းမှု၊ နေပြည်တော်လရောင်တောတွင် တစ်ထပ်အဆောက်အဦးဆောက်လုပ်မှုတို့နှင့်ပတ်သက်၍ တရားစွဲဆိုထားသည့် အမှုများကို စစ်ဆေးခဲ့ခြင်းမရှိကြောင်း အမှုနှင့်ပတ်သက်၍ ထွက်ပေါ်လာသည့်သတင်းများအရ သိရသည်။
အထက်ပါအမှုများအား မတ် ၁၄ ရက်တွင် ထပ်မံရုံးထုတ်စစ်ဆေးရန် ချိန်းဆိုထားကြောင်း အမှုနှင့်ပတ်သက်၍ ထွက်ပေါ်လာသည့် သတင်းများအရ သိရသည်။