သန်လျင်တံတားအဆင်း သန်လျက်ဘက်ခြမ်း၊ သာကေတ တိုင်းရင်းသားကျေးရွာအနီး မီးပွိုင့်နှင့် ထန်းတပင်တာဆုံတို့တွင် ပစ်ခတ်မှုများ ဖြစ်ပွားပြီး သေဆုံးမှုနှင့် ထိခိုက်ဒဏ်ရာရရှိမှုများ ရှိဟု သတင်းများ ထွက်ပေါ်လျက်ရှိသည်။
သန်လျင်တံတားအဆင်း သန်လျက်ဘက်ခြမ်းနှင့် သာကေတဘက်ခြမ်း တိုင်းရင်းသားကျေးရွာ အနီးမီးပွိုင့်တို့တွင် နိုဝင်ဘာ ၁၅ ရက် နံနက် ၁၁ နာရီခန့်က အပြန်အလှန်ပစ်ခတ်မှု ဖြစ်ပွားခဲ့ကြောင်း ဒေသခံများထံမှ သိရသည်။
ထို့ပြင် ယင်းအပြန်အလှန်ပစ်ခတ်မှုတွင် လုံခြုံရေးတပ်ဖွဲ့ဝင်များအနက် ၁၀ ဦးခန့်ဒဏ်ရာရရှိကာ ၅ ဦး ခန့်သေဆုံးနိုင်ဟု သတင်းများ ထွက်ပေါ်လျက်ရှိကြောင်း သိရသည်။
သာကေတမြို့နယ် တိုင်းရင်းသားကျေးရွာအနီးနေထိုင်သူတစ်ဦးက “ သေနတ်ပစ်သံတွေက ၁၅ ချက် အချက် ၂၀ လောက် တရစပ်ကြားရတယ်။ လာပစ်တဲ့သူတွေက ကားနဲ့လာပစ်ပြီးပြေးတော့ အနောက်ကနေ စစ်သားတွေ၊ ရဲတွေက လိုက်ပစ်ကြတယ်။ ရုပ်ရှင်ထဲကလိုပဲ။ သေနတ်သံကြားတော့ ကျွန်တော်တို့လည်း လမ်းဘေးတွေမှာ ဆင်းပြီး ဝပ်နေကြရတယ် ” ဟု ပြောကြားခဲ့သည်။
တိုင်းရင်းသားကျေးရွာအနီး မီးပွိုင့် ပစ်ခတ်မှုတွင် ယာဉ်ထိန်းရဲ ၃ ဦးခန့် ထိမှန်ဒဏ်ရာရဖွယ်ရှိကြောင်း၊ သန်လျင်တံတားအဆင်း သန်လျက်ဘက်ခြမ်း ပစ်ခတ်မှုတွင် စစ်ဆေးရေးစခန်းများကို ပစ်ခတ်ခဲ့ကြောင်းနှင့် ၁၀ ဦးခန့် ထိမှန်ဒဏ်ရာရဖွယ်ရှိကြောင်း၊ အဆိုပါပစ်ခတ်နှစ်ခုတွင် ငါးဦးခန့် သေဆုံးဖွယ်ရှိကြောင်း သတင်းများ ထွက်ပေါ်လျက်ရှိသည်။
ထို့ပြင် ထန်းတပင်မြို့နယ် တာဆုံရဲကင်းစခန်းအား မော်တော်ယာဉ်ပေါ်မှ သေနတ်ဖြင့် ပစ်ခတ်တိုက်ခိုက်မှု နိုဝင်ဘာ ၁၅ ရက် နံနက် ၁၁ နာရီခွဲခန့်က ဖြစ်ပွားခဲ့ကြောင်း အဆိုပါမြို့နယ်နေသူများထံမှ သိရသည်။
အဆိုပါ ပစ်ခတ်မှုတွင် ရဲကင်းမှ လုံခြုံရေးတပ်ဖွဲ့ဝင် ၃ ဦးခန့် သေဆုံးကာ ထိခိုက်ဒဏ်ရာရသူများရှိနိုင်ကြောင်း ကနေဦးသိရပြီး အတည်ပြုချက်ရယူရန် စုံစမ်းလျက်ရှိပါသည်။
လူမှုကွန်ယက် Facebook ပေါ်တွင် ထန်းတပင်တာဆုံ ရဲကင်းဟု ခေါ်သည့် နေရာအား မော်တော်ယာဉ်ပေါ်မှ သေနတ်ဖြင့် တရစပ်ပစ်ခတ်နေသည့် ဗီဒိုယိုဖိုင်တစ်ခု ပျံ့နှံလျက်ရှိကြောင်း သိရသည်။
ပုံစာ- ပစ်ခတ်မှုများဖြစ်ပွားပြီးနောက် သန်လျင်တံတားအဆင်း သာကေတဘက်ခြမ်း သန်လျင်မီးပွိုင့်အနီး ပတ်ဝန်းကျင်တွင် လုံခြုံရေးရယူထားမှုကို တွေ့ရစဉ်။
