KNU အနေဖြင့် NCA မူဘောင်များအတိုင်း တိကျစွာ လိုက်နာကျင့်သုံးမည်ဖြစ်ပြီး KNLA တပ်ဖွဲ့ဝင်အားလုံးအနေဖြင့် စစ်စည်းကမ်းနှင့်အညီ တိကျစွာလိုက်နာကြရန် ကရင်အမျိုးသားအစည်းအရုံး (KNU) က ဇွန် ၉ ရက်တွင် ထုတ်ပြန်ကြေညာခဲ့သည်။
ယင်းကြေညာချက်တွင် ကရင်အမျိုးသားအစည်းအရုံး (KNU) ၊ ကရင်အမျိုးသားလွတ်မြောက်ရေးတပ်မတော် (KNLA) သည် ကရင့်တော်လှန်ရေးသမိုင်းတစ်လျှောက် တရားသော ခုခံစစ်ကို ကရင်အမျိုးသားများ၏ လွတ်လပ်ရေး၊ တန်းတူရေးတို့အတွက် အသက်ပေးတိုက်ပွဲဝင်လျက်ရှိကြောင်း ပါရှိသည်။
ထို့ပြင် မြန်မာ့သမိုင်းစဉ်တစ်လျှောက်လုံးတွင်လည်း ဒီမိုကရေစီအရေးနှင့် လူ့အခွင့်အရေးတို့အတွက် အရေးပါသော အဓိကနေရာမှ ပါဝင်ခဲ့ကြောင်း ဖော်ပြထားသည်။
ကရင်အမျိုးသားလွတ်မြောက်ရေးတပ်မတော် (KNLA) သည် ကရင်အမျိုးသားအစည်းအရုံး (KNU) ၏ နိုင်ငံရေးဦးဆောင်လမ်းညွှန်မှုကို အစဉ်ခံယူလိုက်နာလျက် ဒီမိုကရေစီရေး၊ တန်းတူရေးနှင့် ကရင်အမျိုးသားရေးကို အစဉ်ဆောင်ရွက်လာခဲ့ရာ ၂၀၂၁ ခုနှစ် မေ ၁၀ ရက်က ထုတ်ပြန်ခဲ့သော KNU ဥက္ကဋ္ဌ စောမူတူးစေးဖော၏ သဘောထားအတိုင်း လိုက်နာခံယူသွားမည်ဖြစ်ကြောင်း KNU ၏ ထုတ်ပြန်ချက်တွင် ဖော်ပြထားသည်။
ထို့အတူ ကရင်အမျိုးသားအစည်းအရုံး (KNU) မှ သဘောတူလက်မှတ်ရေးထိုးထားသော NCA မူဘောင်များအတိုင်း တိကျစွာ လိုက်နာကျင့်သုံးသွားမည်ဖြစ်ပြီး ကရင်အမျိုးသားလွတ်မြောက်ရေးတပ်မတော် (KNLA) တပ်ဖွဲ့ဝင်အားလုံးအနေဖြင့် စစ်စည်းကမ်းများနှင့်အညီ တိကျစွာလိုက်နာကြရန် သဘောထားထုတ်ပြန်အပ်ကြောင်း ဖော်ပြပါရှိသည်။
