အင်္ဂလိပ်ဘာသာစကားတွင် Doublespeak ဟူသော စကားရပ်တစ်ခုရှိသည်။ Doublespeak ဟူသည် စကားလုံးတို့၏ အဓိပ္ပာယ်များကို တမင်ရည်ရွယ်ချက်ရှိရှိ ရုပ်ဖျက်ခြင်း၊ အချိုးဖျက်ခြင်း သို့မဟုတ် ပြောင်းပြန်လှန်ထားခြင်းတို့ ပြုလုပ်သည့် ဘာသာစကားတစ်မျိုးဖြစ်သည်။ တစ်ခါတစ်ရံတွင် Doublespeak သည် နားခံသာအောင်သုံးစွဲသည့် ဘာသာစကားပုံစံ (Euphemism) ဖြစ်သည်။ ဥပမာအားဖြင့် အလုပ်သမားများအား အလုပ်ဖြုတ်ပစ်ခြင်းကို လုပ်ငန်းအရွယ်အစား လျှော့ချခြင်း၊ ဗုံးကြဲခြင်းကိုပင် ပစ်မှတ်ကို ထမ်းဆောင်ခြင်းဟုသုံးစွဲခြင်းဖြစ်သည်။ သို့သော် Doublespeak ကို ရည်ရွယ်ချက်ရှိရှိဖြင့် အဓိပ္ပာယ်ထွေပြားသွားအောင် သုံးစွဲခြင်းနှင့် အဓိပ္ပာယ်ကို တမင်ပြောင်းပြန်လှန်ပစ်ခြင်းတို့လည်း ရှိသည်။ ယင်းကဲ့သို့သော ကိစ္စမျိုး၌ Doublespeak သည် အမှန်တရား၏ သဘောသဘာဝကို ရုပ်ဖျက်ပစ်လိုက်သည်။ ဥပမာအားဖြင့် စစ်ဖြစ်နေသည့် အနေအထားတစ်ရပ်ကိုပင် ငြိမ်းချမ်းရေးဆောင်ရွက်ခြင်းဟု သုံးစွဲခြင်းဖြစ်သည်။ မည်သို့ပင်ဆိုစေကာမူ Doublespeak သည် နိုင်ငံရေးဘာသာစကားနှင့် ပတ်သက်ဆက်နွှယ်မှု အရှိဆုံးဖြစ်သည်။

Doublespeak ဟူသည့် အသုံးအနှုန်းကို ဂျော့အိုဝယ်၏ Nineteen Eighty Four စာအုပ်မှ မြစ်ဖျားခံလာသည်ဟု ယူဆကြသည်။ Doublespeak ဟူသည့် စကားလုံးကို အဆိုပါစာအုပ်ထဲ၌ သုံးစွဲခဲ့ခြင်း မရှိသော်လည်း ယင်းစာအုပ်၌ အဓိကကျသော သဘောတရားတစ်ရပ်ဖြစ်သည့် Doublethink နှင့် အနီးကပ် ဆက်နွှယ်လျက်ရှိသည်။ အခြားမူကွဲ စကားရပ်ဖြစ်သည့် Doubletalk ဟူသည့် စကားလုံးကို မိန့်ခွန်းများအား တမင်အဓိပ္ပာယ်ဝေ၀ါးအောင် သို့မဟုတ် အဓိပ္ပာယ်နှစ်ခွထွက်အောင် ပြောဆိုခြင်းအား ရည်ညွှန်းသုံးစွဲမှုသည် ဂျော့အိုဝယ် သူ၏စာအုပ်ကို ရေးသားခဲ့စဉ်က ရှိနှင့်ပြီးသားဖြစ်သော်လည်း Doublespeak နှင့် Doubletalk စကားနှစ်ရပ်စလုံးသည် ဂျော့အိုဝယ်၏ Nighty Eighty Four  စာအုပ် ထွက်ရှိခဲ့ပြီးမှ ထင်ရှားလာခြင်းဖြစ်သည်။ ဂျော့အိုဝယ်သည် နိုင်ငံရေးရည်ရွယ်ချက်များဖြင့် ဘာသာစကားကို ရုပ်ဖျက်ထားမှုအကြောင်း သူ၏ထင်ရှားသော အက်ဆေးတစ်ပုဒ်ဖြစ်သည့် Politics and English Language တွင် ဆွေးနွေးတင်ပြထားသည်။

စီးပွားရေးကြော်ငြာလောကတွင် ကြော်ငြာများအပေါ် သုံးစွဲသူတို့၏ ဆန့်ကျင်မှုများ အမြစ်တွယ်ခိုင်မာလာသည့်အခါ ကြော်ငြာသူများက ၎င်းတို့၏ စီးပွားရေးဆိုင်ရာ ရည်ရွယ်ချက်ကို မျက်နှာဖုံးတပ် ဖုံးကွယ်ရန် Doublespeak များကို အသုံးပြုကြသည်။ အချို့က ကြော်ငြာသမားများ ကျင့်သုံးလာသည့် လုပ်ကြံဖန်တီးထားသည့် မရိုးမသားနည်းလမ်းများကို မီးမောင်းထိုးပြရန် ကွဲပြားခြားနားသည့် ရှုထောင့်များနှင့် အချက်အလက်များကို ပေးနိုင်မည့် နည်းစနစ်ပေါင်းများစွာဖြင့် တုံ့ပြန်ရန် ကြိုးပမ်းလာကြသည်။ ယင်းနှင့်ပတ်သက်၍ ပြင်သစ်တွေးခေါ်ရှင်နှင့် လူမှုဗေဒပညာရှင် ဂျက်အီလူးက “ရည်ရွယ်ချက်က သက်ဆိုင်ရာအကြောင်းအရာနဲ့ပတ်သက်တဲ့ လူတွေရဲ့ထင်မြင်ချက်အပေါ် လွှမ်းမိုးဖို့တောင် မဟုတ်ပါဘူး။ လူတွေရဲ့ လုပ်ဆောင်ပုံနည်းလမ်းတွေမှာ လိုက်လျောညီထွေမှုရယူဖို့ပါ” ဟု ဆိုသည်။ သူက ယင်းနှင့်ပတ်သက်၍ ဆေးဝါးကြော်ငြာကို နမူနာအဖြစ် ထုတ်ပြခဲ့သည်။ ကြော်ငြာများတွင် Doublespeak ကို အသုံးပြုခြင်းကြောင့် Aspirin ဆေးဝါး ထုတ်လုပ်မှုနှုန်းသည် ၁၉၆၀ ပြည့်နှစ်တွင် ပေါင် ၂၃ သန်းကျော် ရှိရာမှ ၁၉၇၀ ပြည့်နှစ်တွင် ပေါင် ၃၅ သန်းကျော်အထိ ရာခိုင်နှုန်း ၅၀ နီးပါး မြင့်တက်ခဲ့ကြောင်း ၎င်းက ထောက်ပြခဲ့သည်။

နိုင်ငံရေးဆိုင်ရာ စီးပွားရေးပညာရှင်နှင့် မီဒီယာလေ့လာသုံးသပ်သူ အက်ဒဝပ်အက်စ်ဟာမန်းက ခေတ်သစ်လူ့အဖွဲ့အစည်းအတွင်းမှ Doublespeak နှင့် Doubletalk များကို ဥပမာအချို့ဖြင့် အထူးပြုဖော်ပြခဲ့သည်။ ဟာမန်းသည် သူ၏စာအုပ်ဖြစ်သော Beyond Hypocrisy တွင် Doublespeak ၏ အဓိကစရိုက်လက္ခဏာရပ်များကို ဖော်ပြထားသည်။ Doublespeak လောက၌ အမှန်တကယ် အရေးကြီးသည်မှာ သိလျက်နှင့်ဖြစ်စေ သတိမမူမိဘဲဖြစ်စေ လိမ်လည်နိုင်စွမ်းနှင့် Doublespeak ကို အသုံးပြုကာ ရှောင်ထွက်သွားနိုင်စွမ်း၊ အကြောင်းအရာတစ်ရပ်/ စီမံကိန်းတစ်ခု၌ အံမဝင်သော အချက်အလက်များကို တမင်ပိတ်ဆို့ဖုံးကွယ်လျက် မုသားများကို အသုံးပြုနိုင်စွမ်းနှင့် အချက်အလက်များကို တမင်ရွေးချယ်လျက် ကောက်နုတ်ပုံသွင်းနိုင်စွမ်းတို့ ဖြစ်သည်ဟုဆိုသည်။

ဂျော့အိုဝယ်တို့ခေတ်နှင့် များစွာခြားခဲ့ပြီဖြစ်သော ယခုခေတ်တွင် Doublespeak ကို အသုံးပြုထားသည့် နိုင်ငံရေးဆိုင်ရာ မိန့်ခွန်းများ/ အရေးအသားများနှင့် စီးပွားရေးကြော်ငြာများတွင် တရားမျှတမှု မရှိသည်များနှင့် မသမာမှုများကို အကြီးအကျယ် တွေ့ရှိလာရသည်။ နိုင်ငံရေးသမားများနှင့် စီးပွားရေးကြော်ငြာသမားများ သုံးစွဲသည့် ဘာသာစကားများ၌ Euphemism များ၊ မေးခွန်းတောင်းဆိုသော စကားလုံးများနှင့် အမှန်တရားကို ဝေ၀ါးအောင် ပြုလုပ်သော စကားလုံးများ အကြီးအကျယ် ပါဝင်လာသည်။ ရှင်းလင်းသော ဘာသာစကားတစ်ရပ်၏ အကြီးမားဆုံးရန်သူသည် မရိုးသားမှုဖြစ်သည်။ နိုင်ငံရေးသမားတစ်ဦးက ပြောကြားလိုက်သောစကားနှင့် တကယ့်အမှန်တရားတို့အကြား ကြီးမားသော ချောက်ကမ်းပါးကြီးက ခြားလျက်ရှိသည်။ စီးပွားရေးသမားများ၏ နားလှည့်ပါးရိုက်၊ နှစ်ပေါက်တစ်ပေါက်ရိုက်သည့် ကြော်ငြာများသည်လည်း ယုံလွယ်သူ သုံးစွဲသူများအား မလိုလားအပ်သော အန္တရာယ်များ ကျရောက်စေသည်။

ထို့ကြောင့် နိုင်ငံရေးသမားအချို့နှင့် စီးပွားရေးသမားအချို့တို့က လူထုကို လှည့်စားရန် ရည်ရွယ်လျက် အသုံးပြုသော Doublespeak များကို အထူးသတိပြုရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။

ဇန်နဝါရီ ၃ ရက်ထုတ် The Daily Eleven သတင်းစာ၏ အယ်ဒီတာ့အာဘော်