ပြည်ထောင်စုသဘောတူစာချုပ် အစိတ်အပိုင်း (၃) ကိုအခြေခံ၍ လာမည့်အနာဂတ် ငြိမ်းချမ်းရေးလုပ်ငန်းစဉ်များ ချမှတ်ရမည်ဟု ငြိမ်းချမ်းရေးလုပ်ငန်းစဉ်ဦးဆောင်အဖွဲ့ PPST ၏ ယာယီအဖွဲ့ခေါင်းဆောင် ရှမ်းပြည်ပြန်လည်ထူထောင်ရေးကောင်စီ PPST ဥက္ကဋ္ဌဗိုလ်ချုပ်ကြီးယွက်စစ်က ပြောကြားသည်။
တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် လက်မှတ်ရေးထိုးထားသော တိုင်းရင်းသားလက်နက်ကိုင်အဖွဲ့အစည်းများ NCA-SEAO မှ ခေါင်းဆောင်များဖြင့် ဖွဲ့စည်းထားသည့် ငြိမ်းချမ်းရေးလုပ်ငန်းစဉ် ဦးဆောင်အဖွဲ့ PPST အစည်းအဝေးကို နိုဝင်ဘာ ၂၅ ရက်တွင် Online Video Conferencing စနစ်ဖြင့် ပြုလုပ်ခဲ့ပြီးအဆိုပါ အစည်းအဝေး အဖွင့်မိန့်ခွန်း ပြောကြားရာတွင် NCA-SEAO ယာယီအဖွဲ့ခေါင်းဆောင် ဗိုလ်ချုပ်ကြီးယွက်စစ်က ထိုသို့ထည့်သွင်းပြောကြားသည်။
“ပြည်ထောင်စုသဘောတူစာချုပ် အစိတ်အပိုင်း (၃) ကိုအခြေခံပြီး လာမယ့် အနာဂတ်ငြိမ်းချမ်းရေး လုပ်ငန်းစဉ်တွေကို ချမှတ်ရမှာဖြစ်ပါတယ်” ဟု ဗိုလ်ချုပ်ကြီးယွက်စစ်က ပြောကြားသည်။
ပြည်ထောင်စုငြိမ်းချမ်းရေးညီလာခံ- (၂၁) ရာစုပင်လုံစတုတ္ထအစည်းအဝေးကျင်းပပြီးနောက် PPST အစည်းအဝေးကို ပြန်လည်ကျင်းပနိုင်ခြင်းဖြစ်သည့်အတွက် ယခုအစည်းအဝေးသည် ငြိမ်းချမ်းရေးရှေ့လုပ်ငန်းစဉ် ချမှတ်ရာတွင် အလွန်အရေးကြီးကြောင်း ဗိုလ်ချုပ်ကြီးယွက်စစ်က ပြောကြားသည်။
ထို့ပြင် ယခုအစည်းအဝေးတွင် လက်ရှိနိုင်ငံရေး၊ ငြိမ်းချမ်းရေး၊ စစ်ရေးအခြေအနေများ၊ ရွေးကောက်ပွဲအလွန် ငြိမ်းချမ်းရေး အခင်းအကျင်း၊ COVID-19 ကပ်ရောဂါကာ ကွယ်တားဆီးထိန်းချုပ် ကုသရေးကိစ္စများနှင့် အခြားသောအရေးကြီးကိစ္စရပ်များကို ဆွေးနွေးသွားမည်ဖြစ်ကြောင်းလည်း ဗိုလ်ချုပ်ကြီးယွက်စစ်က ပြောကြားသည်။
ထို့အတူ ယခုအစည်းအဝေးတွင် NCA_SEAO များ၏ စတုတ္ထအကြိမ် ညီလာခံ (ဒုတိယပိုင်း) ဆက်လက်ကျင်းပနိုင်ရေးကို ညှိနှိုင်းသွားမည်ဖြစ်သကဲ့သို့ ငြိမ်းချမ်းရေးလုပ်ငန်းစဉ်အတွက် တိကျသော မူဝါဒလမ်းညွှန်များကို ချမှတ်ပေးရမည်ဖြစ်ကြောင်းလည်း PPST ယာယီအဖွဲ့ခေါင်းဆောင် ဗိုလ်ချုပ်ကြီးယွက်စစ်က ပြောကြားသည်။
ပြည်ထောင်စုငြိမ်းချမ်းရေးညီလာခံ- (၂၁) ရာစုပင်လုံ စတုတ္ထအစည်းအဝေးကို နေပြည်တော်တွင် သြဂုတ် ၁၉ ရက်မှ ၂၁ ရက်အထိ ကျင်းပခဲ့ပြီးအဆိုပါ အစည်းအဝေးတွင် ပြည်ထောင်စုသဘောတူစာချုပ် အစိတ်အပိုင်း (၃)ကို အပိုင်းသုံးပိုင်းခွဲ၍ ချုပ်ဆိုခဲ့သည်။
ပြည်ထောင်စုသဘောတူစာချုပ် အစိတ်အပိုင်း (၃) ၏ အပိုင်း (၁) တွင် NCA အကောင်အထည်ဖော်မှုဆိုင်ရာ မူဘောင်သဘောတူညီချက် ၁၅ ချက်၊ အပိုင်း (၂) တွင် ၂၀၂၀ အလွန် အဆင့်လိုက်လုပ်ငန်းစဉ်များနှင့် အဆင့်လိုက် အကောင်အထည်ဖော်မှုများ ဇယား (၁) နှင့် အပိုင်း (၃) တွင် ဒီမိုကရေစီနှင့် ဖက်ဒရယ်စနစ်တို့ကိုအခြေခံသည့် ပြည်ထောင်စု တည်ဆောက်ရေးဆိုင်ရာ လမ်းညွှန် အခြေခံမူသဘောတူညီချက် ငါးချက်တို့ ပါဝင်သည်။
