အာဆင်နယ်အသင်း၏ ဂန္ထဝင်နည်းပြဟောင်း အာစင်ဝင်းဂါးက အသင်း၏ ကြယ်ပွင့်တိုက်စစ်မှူး ဗန်ပါစီသည် ၂၀၁၂ ခုနှစ်က မန်ယူအသင်းသို့ ပြောင်းရွှေ့သွားခဲ့ပြီးနောက် ၂၀၁၅ ခုနှစ်တွင် အာဆင်နယ်အသင်းထံသို့ ပြန်လာရန် ဆက်သွယ်ခဲ့သော်လည်း မိမိ ငြင်းဆန်ခဲ့သည်ဟု သူ၏ စာအုပ်သစ်တွင်ရေးသားခဲ့သည်။
ဝင်းဂါးက "ဗန်ပါစီက ၂၀၁၂ မှာ အသင်းနဲ့ စာချုပ်သစ်မချုပ်တော့ဘူးလို့ ဆုံးဖြတ်ခဲ့တယ်။ သူ့ကို ခေါ်ချင်တဲ့ အသင်းတွေအများကြီးရှိပေမဲ့ မန်ယူအသင်းကို ရောင်းဖို့ ကျွန်တော်ဆုံးဖြတ်ခဲ့ပါတယ်။ ဒီအတွက်လည်း ပရိသတ်တွေက ကျွန်တော့်ကို ဒေါသထွက်ခဲ့ကြတယ်။ ဒါပေမဲ့ ကျွန်တော်က စာချုပ်တစ်နှစ်ကျန်ကစားသမားတစ်ဦးအတွက် ပေါင် (၂၄)သန်းဆိုတဲ့ ကမ်းလှမ်းမှုကို ကြိုက်လို့ ရောင်းတာပါ။ ကျွန်တော်နဲ့ ဖာဂူဆန်တို့ကြားက ဆက်ဆံရေးက ကောင်းပေမယ့် ဒီကိစ္စမှာတော့ အသင်းရဲ့အကျိုး အမြတ်အတွက်ပဲ ကျွန်တော်စဉ်းစားခဲ့ပါတယ်။ ဒါပေမဲ့ ၂၀၁၅ ခုနှစ်မှာ ဖာဂူဆန်မရှိတော့တဲ့နောက် ဗန်ပါစီက အာဆင်နယ်ကို ပြန်လာဖို့ ကျွန်တော့်ကို ဆက်သွယ်ခဲ့ပါတယ်။ ကျွန်တော် က လက်မခံခဲ့ပါဘူး။ အဓိကကတော့ သူ့ရဲ့အသက်အရွယ်ကြောင့်ဖြစ်ပြီး လူငယ်တွေကိုပဲ ခေါ်ဖို့ ကျွန်တော်ဆုံးဖြတ်ခဲ့ပါတယ်။ သူ့ရဲ့ (၄)နှစ်သက်တမ်းရဲ့ (၃)နှစ်မြောက်မှာပဲ ဒဏ်ရာပြဿနာတွေကြောင့် မန်ယူအသင်း နည်းပြ လူးဝစ်ဗန်ဟားလ်က သူ့ကို တူရကီကလပ်ဖီနာဘာချီကို ရောင်းထုတ်ခဲ့တာပါ" ဟုဆိုခဲ့သည်။
