စပါးအသင်းအနေဖြင့် ယခုရာသီတွင် ပရီးမီးယားလိဂ်ချန်ပီယံဆုကို ဆွတ်ခူးနိုင်ကြောင်း အသင်းနည်းပြဟောင်း ဟယ်ရီရပ်နက်ပ်က ပြောကြားခဲ့သည်။
စပါးအသင်းသည် ယခုနွေရာသီအပြောင်းအရွှေ့ကာလတွင် ဂါရတ်ဘေးလ်၊ ရယ်ဂီလွန်၊ ကားလို့စ်ဗင်နီစီယပ်စ်၊ ဒိုဟာတီ၊ ဟူဘယက်စ် စသည့် ကစားသမားများခေါ်ယူခဲ့သည်။
ထို့ကြောင့် စပါးအသင်း၏လူစာရင်းမှာ အလွန်အင်အားတောင့်တင်းနေပြီး ချန်ပီယံဆုကိုပင် စိန်ခေါ်နိုင်စွမ်းရှိနေကြောင်း ဟယ်ရီရပ်နက်ပ်က ထောက်ခံပြောဆိုခဲ့ခြင်းဖြစ်သည်။
ဟယ်ရီရပ်နက်ပ်က "တကယ်လို့ ကျွန်တော့်ကိုသာ ဒီရာသီမှာ စပါးအသင်း ဘယ်အဆင့်မှာ ရပ်တည်မလဲလို့ တစ်ယောက်ယောက်က မေးလာခဲ့မယ်ဆိုရင် သူတို့အနေနဲ့ အဆင့်(၄)အတွင်း ဝင်လိမ့်မယ်လို့ ဖြေမှာပါ။ ဒါပေမဲ့ ကျွန်တော့်အနေနဲ့ ဒီရာသီမှာ စပါးအသင်း ပရီးမီးယားလိဂ် ချန်ပီယံဖြစ်နိုင်တယ်လို့တောင် ထင်ပါတယ်။ လူတွေကတော့ ဒီစကားပြောလို့ ကျွန်တော့်ကို ရူးနေပြီလို့ ထင်ကြပါလိမ့်မယ်။ ဒါပေမဲ့ သူတို့ရဲ့လူစာရင်းကို ကြည့်ပါဦး။ ပြီးတော့ မန်ယူနဲ့ပွဲမှာ အနိုင်ရတာကို ကြည့်ကြည့်လိုက်ပါ။ စပါးအသင်းဟာ အကောင်းဆုံးလူစာရင်းကို ပိုင်ဆိုင်ထားပါပြီ"ဟု ပြောကြားခဲ့သည်။
စပါးအသင်းသည် ယခုရာသီ ပရီးမီးယားလိဂ်ပွဲစဉ် (၄)အပြီးတွင် (၂)ပွဲနိုင်၊ (၁)ပွဲသရေ၊ (၁)ပွဲရှုံး ရလဒ်ထွက်ပေါ်ထားကာ ရမှတ် (၇)မှတ်ဖြင့် အဆင့်(၆)နေရာ၌ ရပ်တည်နေသည်။
