သြဂုတ်လ(၃၀)ရက်က ဝုလ်ဗ်အသင်းမှ စပါးအသင်းသို့ အပြီးသတ်ပြောင်းရွှေ့လာသည့် နောက်ခံလူ ဒိုဟာတီသည် လွန်ခဲ့သည့်(၇)နှစ်ခန့်က မြောက်လန်ဒန်ဒါဘီပြိုင်ဘက် အာဆင်နယ်ပရိသတ်ဟု ဝန်ခံခဲ့ဖူးကြောင်း သိရသည်။
ဒိုဟာတီသည် ၂၀၁၃ စက်တင်ဘာလအတွင်းက သူ၏ Twitter စာမျက်နှာတွင် မိမိမှာ အာဆင်နယ်အသင်း၏ အမာခံပရိသတ်ဖြစ်သည်ဟု ဝန်ခံခဲ့ဖူးသူဖြစ်ရာ ၎င်းအားခေါ်ယူမှုအတွက် စပါးပရိသတ်အချို့အကြား ဝေဖန်မှုများရှိခဲ့သည်။
ပြီးခဲ့သည့်သြဂုတ် (၃၀) ရက်နေ့က ထွက်ပေါ် ခဲ့သောသတင်းများအရ ဒိုဟာတီသည် သူ၏ Twitter စာမျက်နှာတွင် ဖော်ပြခဲ့သော ယင်းပို့စ်အား ပြန်လည်ပယ်ဖျက်ခဲ့ကြောင်း သိရှိရသည်။
စပါးအသင်းသည် ဝုလ်ဗ်အသင်း၏ အိုင်ယာလန်လက်ရွေးစင်နောက်ခံလူ မက်ဒိုဟာတီ (၂၈ နှစ်) အား ပြောင်းရွှေ့ကြေး ပေါင်(၁၅)သန်းဖြင့် ခေါ်ယူခဲ့ကြောင်း သိရှိရသည်။
ဒိုဟာတီသည် စပါးအသင်းတွင် နံပါတ်(၂)အကျႌကို ဝတ်ဆင်သွားမည် ဖြစ်ပြီး ၎င်းအား ၂၀၂၄ ခုနှစ်အထိ စာချုပ်ချုပ်ဆိုခဲ့သည်။
စပါးအသင်းသည် ယခုနွေရာသီအပြောင်းအရွှေ့ကာလအတွင်း ဒိန်းမတ်ကွင်းလယ်လူ ဟူဘယက်၊ အင်္ဂလန်ဝါရင့်ဂိုးသမား ဂျိုးဟတ်တို့ကို ခေါ်ယူထားပြီး ဒိုဟာတီကို ထပ်မံ ခေါ်ယူခဲ့ခြင်းဖြစ်သည်။
ဒိုဟာတီသည် ပြီးခဲ့သည့်ရာသီက ဝုလ်ဗ်အသင်းအတွက် ပြိုင်ပွဲစုံ ပွဲ (၅၀)အထိ ကစားပေးခဲ့ပြီး (၇)ဂိုးသွင်းယူပေးခဲ့သည်။
ပြီးခဲ့သည့်ရာသီက ဝုလ်ဗ်အသင်း ပရီးမီးယားလိဂ်ပြိုင်ပွဲတွင် အဆင့်(၇)၌ ရပ်တည်နိုင်ခြင်းနှင့် ယူရိုပါလိဂ် ကွာတားဖိုင်နယ်အဆင့်သို့ တက်ရောက်နိုင်ခဲ့ခြင်းများ၌ ဒိုဟာတီ၏စွမ်းဆောင်မှုများ ပါဝင်ခဲ့ကြောင်း Daily Mail က ဖော်ပြခဲ့သည်။
ဒိုဟာတီသည် ၂၀၁၀ ခုနှစ်ကတည်းက ဝုလ်ဗ်အသင်းတွင် ကစားခဲ့သူဖြစ်သည်။