မက်ဆီကိုခေါ်ယူရန် ဂွါဒီယိုလာကိုင်တွယ်နေသည့် မန်စီးတီးအသင်းက ရေပန်းအစားဆုံးဖြစ်နေပြီး လီဗာပူးလ်အသင်းနည်းပြ ယာဂန်ကလော့ပ်ကလည်း မိမိတို့တွင် အခွင့်အရေးမရှိကြောင်း ဝန်ခံပြောကြားခဲ့သည်။

ကွန်မြူနတီဒိုင်းပြိုင်ပွဲအကြို သတင်းစာရှင်းလင်းပွဲတွင် မက်ဆီ ကိုခေါ်ယူရန် စိတ်ဝင်စားခြင်းရှိမရှိ သတင်းထောက်များက မေးမြန်းရာ ယာဂန်ကလော့ပ် က " စိတ်ဝင်စားလားလို့ မေးတာလား။ ဘယ်သူက ကိုယ့်အသင်းမှာ မက်ဆီကိုမရှိစေချင်မှာလဲ။ ဒါပေမဲ့ အခွင့်အရေးတော့မရှိပါဘူး။ သူသာ မန်စီးတီးကိုရောက်လာရင် သူတို့ကို အနိုင်ယူဖို့ ပိုပြီးခက်သွားမှာပါ။ ပရီးမီးယားလိဂ်အတွက်တော့ ပိုကောင်းတာပေါ့။ တခြားလိဂ်မှာ မက်ဆီကစားတာကို မြင်ရဖို့ဆိုတာ စိတ်ဝင်စားစရာပါပဲ" ဟု ဖြေကြားခဲ့သည်။

မက်ဆီသည် ဘာစီလိုနာအသင်းတွင်ဆက်လက်မကစားလိုတော့ဘဲ အသင်းပြောင်းရွှေ့ခွင့်တောင်းဆိုထားကြောင်း သိရသည်။