ချယ်လ်ဆီးအသင်းသည် လက်စ တာအသင်းမှ အင်္ဂလန်နောက်ခံလူ ဘင်ချီဝဲလ်ကို ပေါင်သန်း(၅၀)ဖြင့် သြဂုတ်(၂၆) ရက်တွင် ခေါ်ယူခဲ့ပြီးနောက် ယခုနွေရာသီအပြောင်းအရွှေ့ကာလတွင် ကစားသမားသစ်ခေါ်ယူမှုအတွက် ပေါင် (၁၃၆)သန်းကျော် အသုံးပြုထားကြောင်း သိရသည်။
ချယ်လ်ဆီးအသင်းသည် အသက် (၂၃)နှစ်အရွယ်ရှိ ဘင်ချီဝဲလ်ကို ၂၀၂၄ ခုနှစ်အထိသက်တမ်းရှိ စာချုပ်တစ်ရပ် ချုပ်ဆိုခဲ့ပြီး ၎င်းအနေဖြင့် တစ်ပတ်လစာ ပေါင် (၁၉၀၀၀၀) ရရှိမည်ဖြစ်ကြောင်း သိရှိရသည်။
ဘင်ချီဝဲလ်သည် ယခုနွေရာသီ အပြောင်းအရွှေ့ကာလတွင် ချယ်လ်ဆီးအသင်း၏ (၇)ဦးမြောက် ကစားသမားခေါ်ယူမှုဖြစ်လာခဲ့သည်။
ချယ်လ်ဆီးအသင်းသည် ဘင်ချီဝဲလ်မတိုင်မီ အဓိကကစားသမားခေါ်ယူမှုအဖြစ် အေဂျက်စ်အသင်းမှ မော်ရိုကိုတောင်ပံကစားသမား ဇီယာ့ရှ်ကို ပေါင် (၃၇)သန်း၊ လိုက်ပ်ဇစ်အသင်းမှ ဂျာမန်တိုက်စစ်မှူး တီမိုဗာနာကို ပေါင် (၄၉)သန်းဖြင့် ခေါ်ယူထားသည်။
ဘင်ချီဝဲလ်သည် ချယ်လ်ဆီးနည်းပြ လမ်းပတ်၏ နံပါတ်(၁) ပစ်မှတ်ကစားသမားဖြစ်ပြီး ချယ်လ်ဆီးအသင်းနှင့်အတူ ချန်ပီယံဆုများကို စိန်ခေါ်သွားမည်ဖြစ်ကြောင်း ပြောကြားခဲ့သည်။
ဘင်ချီဝဲလ်က ''ချယ်လ်ဆီးအသင်းဟာ စိတ်လှုပ်ရှားစရာအနာဂတ်ကို ပိုင်ဆိုင်ထားတဲ့အသင်းဖြစ်ပြီး ဒီအသင်းကို ပြောင်းရွှေ့ခွင့်ရခဲ့တဲ့အတွက် ကျွန်တော် အရမ်းဝမ်းသာပါတယ်။ ကျွန်တော့်အနေနဲ့ နည်းပြ ဖရန့်လမ်းပတ်ရဲ့ ဦးဆောင်မှုနဲ့အတူ ချယ်လ်ဆီးအသင်းက လူငယ်တွေနဲ့ လာမယ့်ရာသီမှာ ချန်ပီယံဆုတွေကို စိန်ခေါ်သွားဖို့ အသင့်ရှိနေပါတယ်။ ကျွန်တော့်အဖို့ ချယ်လ်ဆီးအသင်းအတွက် ပွဲကစားဖို့မစောင့်နိုင်အောင် ဖြစ်နေပြီး သိပ်မကြာခင်မှာ စတမ်းဖို့ဒ်ဘရစ်ချ်ကွင်းထဲကို ပရိသတ်ဝင်ခွင့်ရဖို့ မျှော်လင့်ပါတယ်''ဟု ပြောကြားခဲ့သည်။
အင်္ဂလန်နောက်ခံလူ ဘင်ချီဝဲလ်သည် လက်စတာအသင်းတွင် ပရော်ဖက်ရှင်နယ်ကစားသမားဘဝ စတင်ခဲ့သူဖြစ်ပြီး ပြိုင်ပွဲစုံ (၁၂၃)ပွဲတွင် (၄)ဂိုးသွင်းယူပေးခဲ့သည်။
ထို့ုပြင် ဘင်ချီဝဲလ်သည် အင်္ဂလန်လက်ရွေးစင်အသင်းအတွက်လည်း (၁၁) ပွဲပါဝင်ကစားပေးထားသည်။
ချယ်လ်ဆီးအသင်းသည် ယခုနွေရာသီအပြောင်းအရွှေ့တွင် ပေါင်(၁၃၆)သန်းကျော် သုံးစွဲထားပြီးဖြစ်သော်လည်း အပြောင်းအရွှေ့့ကို ရပ်တန့်ဦးမည်မဟုတ်ဘဲ ကစားသမားသစ်များကို ဆက်လက်ခေါ်ယူရန် စီစဉ်နေကြောင်း သိရှိရသည်။
