အာဆင်နယ်ကစားသမားသစ် ဝီလီယံက တိုက်စစ်မှူး အူဘာမီယန်းအား အသင်းတွင် ဆက်ထိန်းထားရန် တောင်းဆိုခဲ့သည်။
အသက် (၃၁)နှစ်အရွယ်ရှိ ဂါဘွန်တိုက်စစ်မှူး အူဘာမီယန်းသည် ၂၀၁၈ ခုနှစ်တွင် ဒေါ့မွန်အသင်းမှ အာဆင်နယ်အသင်းသို့ ပေါင် (၅၆)သန်းဖြင့် ပြောင်းရွှေ့လာခဲ့ပြီး အသင်းအတွက် ပြိုင်ပွဲ (၁၀၉)ပွဲတွင် ဂိုး (၇၀)အထိ သွင်းယူထားသူဖြစ်သည်။
အူဘာမီယန်းနှင့် အာဆင်နယ်အသင်း၏ လက်ရှိစာချုပ်မှာ ၂၀၂၁ ခုနှစ်တွင် သက်တမ်းကုန်ဆုံးမည်ဖြစ်ပြီး ဝီလီယံက ၎င်းမှာ အသင်းအတွက် အလွန်အရေးပါသူဖြစ်ကြောင်း ပြောကြားခဲ့သည်။
ဝီလီယံက "အာဆင်နယ်အသင်းကို ကျွန်တော် ပြောင်းရွှေ့လာခဲ့တာ အသင်းအနေနဲ့ ချန်ပီယံဆုတွေကို စိန်ခေါ်နိုင်စွမ်းရှိလို့ပါ။ အူဘာမီယန်းဟာ အာဆင်နယ်အသင်းအနေနဲ့ ဆုဖလားတွေကို စိန်ခေါ်ဖို့အတွက် အရေးကြီးတဲ့အခန်းကဏ္ဍက ပါဝင်သူပါ။ အသင်းမှာ သူ ဆက်ရှိနေဖို့ လိုပါတယ်။ ဒါက အရမ်းအရေးကြီးပါတယ်"ဟု ပြောကြားခဲ့သည်။
အာဆင်နယ်အသင်းသည် အူဘာမီယန်းအား စာချုပ်သစ်ချုပ်ဆိုရန် ကြိုးပမ်းနေပြီး တစ်ပတ်လစာ ပေါင် (၂၅၀၀၀၀)ဖြင့် သဘောတူညီမှုရရှိခဲ့ပြီဖြစ်ကြောင်း ဗြိတိန်သတင်းစာ Daily Mail က ဖော်ပြခဲ့သည်။
အာဆင်နယ်အသင်းနည်းပြ အာတီတာက အူဘာမီယန်းအနေဖြင့် အသင်းတွင် ဆက်လက်ကစားမည်ဆိုပါက အသင်း၏ဂန္ထဝင်ကစားသမားဖြစ်လာမည်ဟု ပြောကြားခဲ့သည်။
