ဒေါ့မွန်အသင်းအားကစားဒါရိုက်တာ မိုက်ကယ်ဇော့က မန်ယူအသင်း ခေါ်ယူရန်ပစ်မှတ်ထားနေသည့် အင်္ဂလန်တောင်ပံကစားသမား ဆန်ချိုအား အသင်းတွင် ဆက်ရှိစေချင်သည်ဟု ပြောကြားခဲ့သည်။
မန်ယူအသင်းသည် ယခုနွေရာသီအပြောင်းအရွှေ့ကာလတွင် အသက် (၂၀)နှစ်အရွယ်ရှိ ဆန်ချိုအား ခေါ်ယူရန် ကြိုးပမ်းလျက်ရှိနေပြီး ပြောင်းရွှေ့ကြေးမြင့်မားမှုကြောင့်သာ အပြောင်းအရွှေ့ကြန့်ကြာနေခြင်းဖြစ်သည်ဟု မီဒီယာများက ဖော်ပြနေကြသည်။
သို့သော် မိုက်ကယ်ဇော့က လာမည့် ၂၀၂၀-၂၁ ရာသီတွင် အသင်း၌ ဆန်ချို ဆက်ရှိနေမည်ဆိုပါက ပျော်ရွှင်လိမ့်မည်ဟု ပြောကြားခဲ့ခြင်းဖြစ်သည်။
မိုက်ကယ်ဇော့က "ဆန်ချိုဟာ တကယ်တော်တဲ့ ကစားသမားပါ။ သူ့အသက်အရွယ်မှာ သူ့ထက်ပိုကောင်းတဲ့ ကစားသမား မရှိပါဘူး။ လက်ရှိ အသက် (၂၀) ဝန်းကျင် ကစားသမားတွေထဲမှာ ဆန်ချို အကောင်းဆုံးဆိုတာကို အားလုံး မြင်တဲ့အတိုင်းပါပဲ။ ဆန်ချိုအနေနဲ့ လာမယ့်ရာသီမှာ ကျွန်တော်တို့နဲ့အတူ ဆက်ရှိနေမယ်ဆိုရင် ကျွန်တော် ပျော်ရွှင်မိမှာပါ"ဟု ပြောကြားခဲ့သည်။
ဆန်ချိုသည် ဒေါ့မွန်အသင်းနှင့် ၂၀၂၂ ခုနှစ်၊ ဇွန်လ (၃၀)ရက်အထိ စာချုပ်သက်တမ်းရှိနေသူဖြစ်ပြီး ဒေါ့မွန်အသင်းက ပေါင် (၁၀၉)သန်းရမှသာ ၎င်းကို အသင်းမှထွက်ခွာခွင့်ပေးဖွယ်ရှိသည်ဟု မီဒီယာများက ဖော်ပြနေကြသည်။
ဆန်ချိုသည် ၂၀၁၈-၁၉ ရာသီတွင် ဒေါ့မွန်အသင်းနှင့် စတင်တောက်ပလာသူဖြစ်ပြီး အသင်းအတွက် (၃)ရာသီအတွင်း ပြိုင်ပွဲစုံ (၉၉)ပွဲတွင် (၃၄)ဂိုး သွင်းယူပေးထားသည်။
