ဂျူဗင်တပ်စ်အသင်းတိုက်စစ်မှူး စီရော်နယ်လ်ဒိုသည် ယနေ့ညတွင် ကစားမည့် ဘရက်စီယာနှင့်ပွဲတွင် ပါဝင်မည်မဟုတ်ကြောင်း သိရသည်။ 

အသက် (၃၄) နှစ်အရွယ်ရှိ ပေါ်တူဂီအသင်းခေါင်းဆောင် စီရော်နယ်လ်ဒိုသည် ဂျူဗင်တပ်စ်အသင်းအတွက် (၇) ရက်အတွင်း (၃)ပွဲပါဝင်ကစားခဲ့ပြီး ယင်းပွဲစဉ်များတွင် ပွဲတိုင်းပွဲချိန်ပြည့်ပါဝင်ကစားခဲ့သည်။

ထို့ကြောင့် စီရော်နယ်လ်ဒို၏ ကြွက်သားများမှာ နာကျင်နေသည့်အတွက် ဘရက်စီယာနိုအသင်းနှင့် ကစားမည့်ပွဲစဉ်တွင် အသင်းလူစာရင်းမှ ချန်လှပ်ခဲ့ခြင်းဖြစ်ကြောင်း နည်းပြ ဆာရီက ပြောကြားခဲ့သည်။

ဘရက်စီယာနှင့် ပွဲမတိုင်ပြုလုပ်သည့် သတင်းစာရှင်းလင်းပွဲတွင် ဆာရီက "ဗီရိုနာနဲ့ပွဲအပြီးမှာ စီရော်နယ်လ်ဒို ကြွက်သားတွေ နာကျင်နေခဲ့တယ်လို့ ဆိုပါတယ်။ ဒါက ကစားသမားတွေ ဖြစ်နေကျပါပဲ။ (၇)ရက်အတွင်း (၃)ပွဲ ကစားခဲ့တာဆိုတော့ ဒါမျိုးတွေ ဖြစ်နိုင်ပါတယ်"ဟု ပြောကြားခဲ့သည်။ 

စီရော်နယ်လ်ဒိုသည် ယခုရာသီတွင် ဂျူဗင်တပ်စ်အသင်းအတွက် ပြိုင်ပွဲစုံ (၅)ပွဲကစားထားပြီး (၂)ဂိုး သွင်းယူထားသည်။ 

ဂျူဗင်တပ်စ်အသင်းသည် စီးရီးအေပွဲစဉ် (၅) အဖြစ် ယနေ့ည (မြန်မာစံတော်ချိန် ဗုဒ္ဓဟူးနေ့နံနက် ၁:၃၀ နာရီ)တွင် ဘရက်စီယာအသင်းကို အဝေးကွင်းတွင် သွားရောက်ရင်ဆိုင်ရမည်ဖြစ်သည်။