PSG အသင်း၏ အဓိကတိုက်စစ်မှူး(၃)ဦးဖြစ်သည့် နေမာ၊ ဘာပေနှင့် ကာဗာနီတို့သည် ယခုတစ်ပတ် ယှဉ်ပြိုင်က စားရမည့် ရီးယဲလ်အသင်းနှင့် ချန်ပီယံလိဂ်ပွဲတွင် ပါဝင်နိုင်မည်မဟုတ်ကြောင်း သိရှိရသည်။

ဘရာဇီးလ်တိုက်စစ်မှူး နေမာသည် ပြီးခဲ့သည့်ရာသီက မန်ယူအသင်းကို ရှုံးနိမ့်ခဲ့သည့်ပွဲတွင် ဒိုင်လူကြီးအား ဝေဖန်ခဲ့သည့်အတွက် (၃)ပွဲပယ်ပြစ် ဒဏ်ကျခံထားရခြင်းကြောင့်ဖြစ်ပြီး ဘာပေနှင့် ကာဗာနီတို့မှာ ဒဏ်ရာပြဿနာများကြောင့်ဖြစ်သည်။

PSG အသင်းက အဆိုပါကစားသမားများ ရီးယဲလ်နှင့်ပွဲကို လွဲချော်မည်ဖြစ်ကြောင်း တနင်္လာနေ့က အတည်ပြုခဲ့ပြီး ဘာပေနှင့် ကာဗာနီတို့သည် လာမည့်ရက်သတ္တပတ်အကုန်မှသာ လေ့ကျင့်မှုပြန်လည်ပြုလုပ်နိုင်မည်ဟုလည်း ဆိုခဲ့သည်။

ထို့ ကြောင့် အီကာဒီနှင့် ချူပိုမိုတင်းတို့သာ ပွဲထွက်ရဖွယ်ရှိနေကြောင်း သိရှိရသည်။