နယ်နိမိတ်အရ အသွားအလာ အဆင်ပြေမှုနှင့် ဒေသအလိုက် လိုအပ်ချက်ကြောင့်သာ တရုတ်စာ၊ တရုတ်စကား သုံးစွဲနေခြင်းဖြစ်ပြီး တရုတ်၏ လွှမ်းမိုးမှု မရှိကြောင်း ‘၀’ သွေးစည်း ညီညွတ်ရေးပါတီ (UWSP/UWSA) ဒုတိယဥက္ကဋ္ဌ ဦးကျောက်ကော်အန်းက ပြောကြားသည်။
ဧပြီ ၁၈ ရက်က ရှမ်းပြည်နယ်ရှိ ‘၀’ အဖွဲ့၏ ထိန်းချုပ်ဒေသဖြစ်သော ပန်ဆန်းမြို့၌ ပြုလုပ်သည့် သတင်းစာ ရှင်းလင်းပွဲတွင် မီဒီယာများ မေးမြန်းမှုနှင့် ပတ်သက်၍ ဦးကျောက်ကော်အန်းက ယင်းသို့ထည့်သွင်း ပြောဆိုခြင်းဖြစ်သည်။
“သမိုင်းအရ အစိုးရကနေ ဒီနယ်ကို ထိထိရောက်ရောက်ကို ဖွံ့ဖြိုးဆောင်ရွက်ခဲ့တာ မရှိခဲ့ဘူး။ ကျွန်တော်တို့က ဗကပ (ဗမာပြည်ကွန်မြူနစ်ပါတီ) ကနေ ခွဲထွက်လာတယ်။ ဗကပမတိုင်မီ သဘောပြောမယ်ဆိုရင် ဂျပန်ခေတ်ဖြစ်ဖြစ်၊ အင်္ဂလိပ် အုပ်ချုပ်တဲ့ခေတ်ဖြစ်ဖြစ် ဒါသမိုင်းအရ၊ နယ်နိမိတ်အရကို ကျွန်တော်တို့ရဲ့ လက်ရှိမြန်မာနိုင်ငံရဲ့ တစ်ပိုင်းတစ်စိတ်တော့ဟုတ်တယ်။ ဒါပေမဲ့ တချို့ရဲ့ယဉ်ကျေးမှုနဲ့ နီးစပ်မှုက မတူကြဘူးဆိုတော့ လူမျိုးကြောင့်လည်းဆိုင်တယ်။ နယ်နိမိတ်နဲ့လည်း ဆိုင်တယ်။ ပထဝီကြောင့် ကျွန်တော်တို့က ဥပမာတစ်ခု ပြောမယ်ဆိုရင် ဒီဟာကို နီးစပ်အောင် လုပ်မယ်ဆိုတော့ တစ်ဖက်သားကနေ ဆောင်ရွက်လို့မရဘူး။ ဒါနှစ်ဖက်စလုံးရဲ့ ကြိုးစားအားထုတ်မှုနဲ့ သက်ဆိုင်တယ်” ဟု ဦးကျောက်ကော်အန်းက ဆိုသည်။
မိမိတို့အပေါ် တရုတ်၏ သြဇာလွှမ်းမိုးမှု ရှိသည်ဟု အချို့က ဝေဖန်ကြကြောင်း၊ သို့သော် တရုတ်သြဇာလွှမ်းမိုးမှု မရှိကြောင်း ဦးကျောက်ကော်အန်းက ဆိုသည်။
“တချို့တော့ ဝေဖန်ကြတယ်။ ကျွန်တော်တို့က တရုတ်သြဇာပေါ့။ တရုတ်ရဲ့ လွှမ်းမိုးမှုလို့ ပြောကြတယ်။ ကျွန်တော်တို့ တရုတ်စာပဲ ပြောတယ်။ တရုတ်စကားပဲ ပြောတယ်။ လွှမ်းမိုးမှုတော့ မရှိပါဘူးဆိုတော့ ပြောလို့ရတယ်။ နယ်နိမိတ်အရကို အသွားအလာ အဆင်ပြေမှုနဲ့ ဒေသအလိုက်ရဲ့ လိုအပ်ချက်ကြောင့်မို့လို့ ကျွန်တော်တို့ ဒီလိုဖြစ်တာပေါ့။ လွှမ်းမိုးမှုရှိတာတော့ မဟုတ်ဘူး” ဟု ဦးကျောက်ကော်အန်းက ပြောကြားသည်။
ပန်ဆန်းမြို့တွင် တရုတ်လူမျိုးများ စီးပွားရေးများ လာရောက်လုပ်ကိုင်လျက် ရှိကြသလို ဒေသတစ်ခုလုံးတွင် တရုတ်တယ်လီဖုန်းလိုင်း၊ တရုတ်ငွေကြေးကိုသာ သုံးစွဲလျက်ရှိပြီး ဂုဏ်ပြုပွဲသို့ လာရောက်သူများအတွက် MyTel အော်ပရေတာကို တပ်ဆင်ထားသည်။
ယခင်က တရားဝင် ရုံးသုံးဘာသာစကားအဖြစ် တရုတ်ဘာသာစကားကို သတ်မှတ်ထားပြီး လက်ရှိတွင် ‘၀’ ဘာသာစကားကို အဓိကထား အသုံးပြုနိုင်ရန် လွန်ခဲ့သည့်နှစ်နှစ်ခန့်က စတင်လုပ်ဆောင်နေကြောင်း ‘၀’ အဖွဲ့ လားရှိုးဆက်ဆံရေးရုံး ဒုတိယတာဝန်ခံ ဦးဟေးလူက ဆိုသည်။
“အဲဒါတော့ အခုစလုပ်နေပြီ။ ဒါပေမဲ့ ရုံးမှာပြောနေတာ အရင်ကတော့ တရုတ်ဘာသာစကားကို အဓိက ပြောနေတယ်နော်။ နောက်ပိုင်းကျတော့ ကိုယ့်လူမျိုးရဲ့ ဘာသာစကားကို အဓိကဖြစ်ဖို့ လူကြီးရဲ့ လမ်းညွှန်ချက်အတိုင်း အခုလိုက်လုပ်နေပြီ” ဟု ဦးဟေးလူက ပြောကြားသည်။
UWSP/UWSA အပါအဝင် မြောက်ပိုင်းတိုင်းရင်းသား လက်နက်ကိုင် ခုနစ်ဖွဲ့ဖြင့် ဖွဲ့စည်းထားသည့် ပြည်ထောင်စုနိုင်ငံရေး ဆွေးနွေးညှိနှိုင်းရေး ကော်မတီ (FPNCC) နှင့် အစိုးရတို့ ငြိမ်းချမ်းရေးနှင့် ပတ်သက်သည့် ဆွေးနွေးရာတွင်လည်း တရုတ်နိုင်ငံက အဓိကကြားဝင် ဆောင်ရွက်ပေးနေပြီး ဧပြီ ၁၇ ရက်က ပြုလုပ်သည့် ‘၀’ အဖွဲ့၏ နှစ် (၃၀) ပြည့် ငြိမ်းချမ်းရေး တည်ဆောက်မှု ဂုဏ်ပြုပွဲသို့ တရုတ်နိုင်ငံ၏ အာရှရေးရာ အထူးကိုယ်စားလှယ် မစ္စတာဆွန်းကော့ရှန် တက်ရောက်ခဲ့သည်။
