ဓာတ်ပုံ - တပ်မတော်ကာကွယ်ရေးဦးစီးချုပ်ရုံး

ကုလသမဂ္ဂသည် အကျိုးရှိပြီး အပြုသဘောဆောင်သော ဆက်ဆံရေးဖြစ်အောင် ဆောင်ကြဉ်းပေးရန် လေးလေးနက်နက် တိုက်တွန်းလိုကြောင်း ဇွန် ၁၄ ရက်တွင် နေပြည်တော်ရှိ ဘုရင့်နောင်ရိပ်သာ ဧည့်ခန်းမဆောင် ၌ ကုလသမဂ္ဂအထွေထွေ အတွင်းရေးမှူးချုပ်၏ မြန်မာနိုင်ငံဆိုင်ရာ အထူးကိုယ်စားလှယ် Ms. Christine Schraner Burgener အား လက်ခံတွေ့ဆုံစဉ် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားခဲ့ကြောင်း တပ်မတော်ကာကွယ်ရေးဦးစီးချုပ်ရုံးက ထုတ်ပြန်သည်။

မြန်မာနိုင်ငံသည် ကုလသမဂ္ဂ၏ အဖွဲ့ဝင်နိုင်ငံ တစ်နိုင်ငံဖြစ်ပြီး နိုင်ငံခြားရေး မူဝါဒသည်လည်း နိုင်ငံအားလုံးနှင့် မိတ်ဝတ်မပျက် ဆက်ဆံရေးပင် ဖြစ်ကြောင်း၊ နိုင်ငံတကာတွင် ဖြစ်ပျက်လျက်ရှိသော အခြေအနေ အရပ်ရပ်တွင် မှန်ကန်သည့်ဘက်မှ ရပ်တည်လျက်ရှိကြောင်း၊ ကုလသမဂ္ဂနှင့် ပူးပေါင်း ဆောင်ရွက်လျက်ရှိကြောင်း၊ ကုလသမဂ္ဂ၏ ရပ်တည်ချက်များအပေါ် မြန်မာနိုင်ငံ အပါအဝင် နိုင်ငံငယ်များက ယုံကြည်မှုရှိရန် လိုအပ်နေကြောင်း၊ အပြုသဘောဆောင်သည့် ကူညီဆောင်ရွက်မှုများ ဖြစ်စေလိုကြောင်း တပ်မတော်ကာကွယ်ရေးဦးစီးချုပ်က ပြောကြားသည်။

ထို့ပြင် အကြီးအကဲတစ်ဦး၊ ခေါင်းဆောင်တစ်ဦးသည် ခိုင်မာမှုမရှိသည့် သတင်း အချက်အလက်များ၊ ဖြစ်စဉ်များ၊ မဟုတ်မမှန်သော ဖြစ်စဉ်ဖြစ်ရပ်များအား ထုတ်ဖော်ပြောကြားခြင်းများသည် အပြုသဘော မဆောင်သော လုပ်ဆောင်ချက်များဖြစ်ပြီး မုန်းတီးမှုများ၊ အထင်အမြင် လွဲမှားမှုများ ဖြစ်ပေါ်စေကာ ပူးပေါင်းဆောင်ရွက်မှုများတွင် အခက်အခဲများ ဖြစ်ပေါ်စေကြောင်း၊ “ချစ်စကိုရှည်စေ၊ မုန်းစကိုတိုစေ”၊ “ကြီးတဲ့အမှု ငယ်အောင်၊ ငယ်တဲ့အမှု ပပျောက်အောင်”ဆိုသည့် မြန်မာဆိုရိုး စကားပုံနှင့် ဆန့်ကျင်လျက် မုန်းစကို ရှည်စေသော၊ ငယ်သောအမှုကို ကြီးစေသော ဆောင်ရွက်ချက်များကို တွေ့မြင်နေရကြောင်း၊ မိမိအနေဖြင့် ပြီးခဲ့သည့် ဧပြီ ၃၀ ရက်က ကုလသမဂ္ဂ လုံခြုံရေးကောင်စီ အမြဲတမ်းအဖွဲ့ဝင် နိုင်ငံကိုယ်စားလှယ်များနှင့် တွေ့ဆုံခဲ့ရာတွင် အပြုသဘောဆောင်သည့် ဆက်ဆံမှုရှိသော နိုင်ငံများ ရှိသကဲ့သို့ နားလည်မှုလွဲမှားစွာ ဆက်ဆံမှုရှိသော နိုင်ငံများကိုလည်း တွေ့မြင်ရကြောင်း၊ ကုလသမဂ္ဂ၏ အကျိုးရှိပြီး အပြုသဘောဆောင်သော ဆက်ဆံရေး ဖြစ်အောင် ဆောင်ကြဉ်းပေးရန် လေးလေးနက်နက်တိုက် တွန်းလိုကြောင်း ဆွေးနွေးပြောကြားသည်။

ဆက်လက်ပြီး ဘင်္ဂါလီများနှင့် ပတ်သက်ပြီး မိမိတို့အနေဖြင့် ရခိုင်ပြည်နယ်တွင် လာရောက် နေထိုင်ကြသူများကို ဘင်္ဂါလီဟုသာ လက်ခံထားကြောင်း၊ ရိုဟင်ဂျာဆိုသည့် အသုံးအနှုန်းမှာ ၎င်းတို့ လုပ်ကြံ ဖန်တီးထားသည့် အခေါ်အဝေါ် တစ်ခုသာဖြစ်ကြောင်း၊ မြန်မာနိုင်ငံသားများက ၎င်းရိုဟင်ဂျာဆိုသည့် အသုံးအနှုန်းကို လုံးဝလက်သင့် မခံကြောင်း၊ သန်းခေါင်စာရင်း အထောက်အထားများအရ ရှီးရိုက်၊ ပထန်နှင့် မွတ်စလင်ဟုသာ သုံးနှုန်းထားပြီး ရိုဟင်ဂျာဟု မပါရှိကြောင်း၊ ထို့ကြောင့် မြန်မာနိုင်ငံသားများအတွက် ပြဿနာဖြစ်စေနိုင်သော အသုံးအနှုန်းကို မသုံးစွဲဘဲ ရှောင်ကြဉ်ပေးစေလိုကြောင်း၊ ဘင်္ဂါလီများနှင့် ပတ်သက်ပြီး ထိုက်သင့်သူများကို ပြန်လည်လက်ခံမည်ဟု ပြောကြားခဲ့ပြီး ဖြစ်ကြောင်း၊ ၁၉၈၂ ခုနှစ် နိုင်ငံသား ဥပဒေနှင့်အညီ စိစစ်လက်ခံမည် ဖြစ်ကြောင်း၊ နိုင်ငံတကာမှ ဝိုင်းဝန်း ဖိအားပေးနေမည့်အစား ဝိုင်းဝန်းကူညီ ဖြေရှင်းသည့် နည်းလမ်းကိုသာ ဆောင်ရွက်စေလိုကြောင်း တပ်မတော်ကာကွယ်ရေးဦးစီးချုပ်က ပြောကြားသည်။

အဆိုပါ တွေ့ဆုံမှုတွင် ကုလသမဂ္ဂ၏ ငယ်ရွယ်သူ ကလေးစစ်သားများ အသုံးပြုသည့်နိုင်ငံစာရင်းမှ ပယ်ဖျက်ရေးဆိုင်ရာ ကိစ္စရပ်များ၊ ရခိုင်ပြည်နယ်အရေးနှင့် ပတ်သက်၍ အချက်အလက် ရှာဖွေရေးအဖွဲ့နှင့် စားပွဲဝိုင်း ဆွေးနွေးရေးဆိုင်ရာ ကိစ္စရပ်များ၊ အနာဂတ်ကာလတွင် ကုလသမဂ္ဂနှင့် ပူးပေါင်းဆောင်ရွက်မှု မြှင့်တင်ရေးဆိုင်ရာကိစ္စရပ်များအား ရင်းနှီးပွင့်လင်းစွာ အပြန်အလှန် ဆွေးနွေးကြပြီး ကုလသမဂ္ဂ အထွေထွေအတွင်းရေးမှူးချုပ်၏ မြန်မာနိုင်ငံဆိုင်ရာ အထူးကိုယ်စားလှယ်က ယခုရှင်းပြသည့် အချက်အလက်များကို ကုလသမဂ္ဂသို့ ပြန်လည် သယ်ဆောင်ပြောကြားပေးမည် ဖြစ်ကြောင်း ပြောကြားခဲ့သည်။

ဂျာမနီနိုင်ငံဆိုင်ရာ ဆွစ်ဇာလန် သံအမတ်ဟောင်း ဘာဂျန်နာသည် ဧပြီလအတွင်း ယခုတာဝန်၌ ခန့်အပ်ခံရခြင်းဖြစ်ပြီး ၎င်းသည် မြန်မာနိုင်ငံသို့ လာရောက်ပြီးနောက် ဘင်္ဂါလီ မွတ်စလင် ဒုက္ခသည်ပေါင်း ၇၀၀,၀၀၀ ခိုလှုံနေသည့် ဘင်္ဂလားဒေ့ရှ်နိုင်ငံသို့လည်း သွားရောက်မည်ဖြစ်သည်။

လွန်ခဲ့သည့် သီတင်းပတ်အတွင်းက ကုလသမဂ္ဂနှင့် မြန်မာနိုင်ငံသို့ ရေးထိုးခဲ့သည့် သဘောတူညီချက် တစ်ရပ်အရ ကုလသမဂ္ဂအေဂျင်စီများကို ရခိုင်ပြည်နယ်သို့ ဝင်ရောက် ခွင့်ပြုမည် ဖြစ်သည်။