တရုတ်နိုင်ငံ၏ အခန်းကဏ္ဍသည် မြန်မာနိုင်ငံ၏ တည်ငြိမ်အေးချမ်းမှု၊ ငြိမ်းချမ်းရေးနှင့် ဖွံ့ဖြိုးတိုးတက်ရေးတို့တွင် အရေးပါပြီး ပြည်တွင်း လက်နက်ကိုင်ပဋိပက္ခ ဖြစ်စေသည့် အဖွဲ့အစည်းများအပေါ် အားပေးကူညီမှု မရှိကြောင်း နိုင်ငံတော်အတိုင်ပင်ခံရုံး ဝန်ကြီးဌာန ညွှန်ကြားရေးမှူးချုပ် ဦးဇော်ဌေး က ပြောကြားသည်။

ပြန်ကြားရေးဝန်ကြီးဌာနတွင် မေ ၂၃ ရက်က ပြုလုပ်သည့် နိုင်ငံတော်အစိုးရ၏ ပြည်သူ့အတွက် ဒုတိယ တစ်နှစ်တာကာလအတွင်း ဆောင်ရွက်မှုများနှင့် ပတ်သက်၍ သတင်းစာရှင်းလင်းပွဲ၌ ဦးဇော်ဌေးက အထက်ပါကဲ့သို့ ပြောကြားခဲ့ခြင်း ဖြစ်သည်။

လက်ရှိ မြန်မာနိုင်ငံအနေဖြင့် ပြည်တွင်း လက်နက်ကိုင်ပဋိပက္ခများ ဖြစ်ပွားနေသည့်အပြင် ဖွံ့ဖြိုးဆဲနိုင်ငံ ဖြစ်နေသည့်အတွက် တရုတ်နိုင်ငံကဲ့သို့ အခြားအိမ်နီးချင်းနိုင်ငံများသည် အရေးကြီးကြောင်း ဦးဇော်ဌေးက ဆိုသည်။

၎င်းက “တရုတ်နိုင်ငံရဲ့အခန်းကဏ္ဍက ကျွန်တော်တို့ မြန်မာနိုင်ငံလို နိုင်ငံမျိုး ပြည်တွင်းလက်နက်ကိုင် ပဋိပက္ခတွေ မပြီးသေးဘူး။ ဖွံ့ဖြိုးဆဲနိုင်ငံ ဖြစ်တယ်။ ဒီမိုကရေစီ ကူးပြောင်းရေးဆိုတဲ့ နိုင်ငံမျိုးမှာ အိမ်နီးချင်းနိုင်ငံတွေ အရေးကြီးပါတယ်။ အိမ်နီးချင်းက ငါးနိုင်ငံစလုံး အရေးကြီးတယ်။ တကယ့် တရုတ်နိုင်ငံရဲ့ အခန်းကဏ္ဍက အရေးကြီးတယ်။ မြန်မာနိုင်ငံ တည်ငြိမ်အေးချမ်းရေး၊ ငြိမ်းချမ်းရေး၊ ဖွံ့ဖြိုးတိုးတက်ရေး အားလုံးမှာ အရေးပါပါတယ်”ဟု ပြောကြားသည်။

မြန်မာနိုင်ငံ ငြိမ်းချမ်းရေးဖြစ်စဉ်တွင် တရုတ်နိုင်ငံမှ အထူးကိုယ်စားလှယ် ထားရှိဆောင်ရွက်နေပြီး ပြီးခဲ့သည့် ၂၁ ရာစု ဒုတိယအကြိမ် ပင်လုံညီလာခံ၌ မြောက်ပိုင်းအဖွဲ့ ခုနစ်ဖွဲ့အား ညီလာခံ တက်နိုင်ရန် ဆောင်ရွက်နိုင်ခဲ့ကြောင်း သိရသည်။

“အခုလည်း မြောက်ပိုင်း ခုနစ်ဖွဲ့နဲ့ တွေ့တယ်။ ကျွန်တော်တို့လည်း ပြောတယ်။ မူဆယ်ဖြစ်စဉ် ဖြစ်တဲ့အချိန်မှာ TNLA က လာတိုက်တာ အရပ်သားတွေ သေတယ်။ တရုတ်နိုင်ငံသားတွေ သေသွားတယ်။ တရုတ်ဘက်ကလည်း သူတို့ရဲ့ စိုးရိမ်ပူပန်မှုကိစ္စကို အစိုးရကို ပြောတယ်။ သူတို့ကလည်း ပြန်ပြောတယ်။ ဒီဘက်ကတော့ ကျွန်တော်တို့ ပြည်သူလူထုတွေ သေတယ်။ လာပြီးသတ်တဲ့ အခါကျတော့ ကာကွယ်တာရှိတယ်။ အစိုးရ စစ်တပ်ကတော့ ကာရမှာပဲ။ လူထုကို အန္တရာယ်ပေးလာပြီဆိုရင် အဲဒီအနေအထားကို ပြောတော့ သူတို့ဘက်ကိုလည်း ထိန်းထိန်းသိမ်းသိမ်း လုပ်ခိုင်းတဲ့အတွက် သူတို့လည်း လုပ်နေတယ်ပေါ့။ သို့သော် ကျန်ခဲ့တဲ့ မြန်မာပဋိပက္ခပိုင်းမှာ ကျန်ခဲ့တဲ့နေရာတွေ ကြည့်လိုက်ရင် တရုတ်၊ မြန်မာ နယ်စပ်တောက်လျှောက်ပါ။ အဲဒီကို အခြေခံပြီး လှုပ်ရှားတာတွေ ရှိတယ်”ဟု ဦးဇော်ဌေးက ဆိုသည်။

တရုတ် ဗဟိုအစိုးရအနေဖြင့် မြန်မာနိုင်ငံ၏ ပြည်တွင်းလက်နက်ကိုင် ပဋိပက္ခဖြစ်စေသည့် အဖွဲ့များအား ထောက်ခံခြင်း မရှိသလို အားပေးကူညီမှု မရှိကြောင်း ဦးဇော်ဌေးက ဆိုသည်။

၎င်းက “သို့သော် အောက်ခြေမှာကျတော့ နယ်နိမိတ်ပိုင်း ဟိုဘက်ဒီဘက် ကူးလူးဆက်ဆံမှုတွေမှာ နည်းနည်းလေးတွေ ရှိတယ်။ အဲဒီတော့ တရုတ်နိုင်ငံရဲ့ အခန်းကဏ္ဍက အရေးကြီးပါတယ်။ သို့သော် သူသည် မြန်မာနိုင်ငံအစိုးရက လုပ်နေတဲ့ ငြိမ်းချမ်းရေးဖြစ်စဉ်ကို ပံ့ပိုးကူညီတဲ့ သဘောနဲ့ပဲ သူတို့လုပ်တာပါ”ဟု ဆက်လက် ပြောကြားသည်။

ထို့ပြင် NCA အား အစိုးရသဘောဖြင့် ပြင်ဆင်၍ မရဘဲ NCA တွင် မပါသည့်ကိစ္စများ ပေါ်ပါက အခြေခံမူဘောင်အတိုင်းသာ သွားရမည်ဖြစ်ကြောင်း ဦးဇော်ဌေး ဆိုသည်။

မေ ၂၃ ရက်က ပြန်ကြားရေးဝန်ကြီးဌာနတွင် ပြုလုပ်သည့် နိုင်ငံတော်အစိုးရ၏ ပြည်သူ့အတွက် တစ်နှစ်တာအတွင်း ဆောင်ရွက်မှုများနှင့် ပတ်သက်၍ သတင်းစာရှင်းလင်းပွဲတွင် သတင်းထောက်တစ်ဦးက “အစိုးရအနေဖြင့် “ဝ” ဘက်မှ တောင်းဆိုလာပါက NCA အား ပြင်ပေးမလား ” ဟုမေးမြန်းမှုအပေါ် ဦးဇော်ဌေးက အထက်ပါကဲ့သို့ ပြန်လည် ဖြေကြားခဲ့ခြင်း ဖြစ်သည်။

“ NCA က အစိုးရကပဲ ပိုင်တာ မဟုတ်ဘူး။ NCA က Joint Ownership ဖြစ်ပါတယ်။ NCA သည် EAO နဲ့ အစိုးရ။ အစိုးရပိုင်းမှာ အစိုးရ၊ တပ်မတော်၊ လွှတ်တော် ပါတယ်။ NCA ကို အစိုးရသဘောနဲ့ ပြင်လို့မရဘူး။ NCA ရဲ့ သဘောတရား။ သို့သော် NCA ပြဋ္ဌာန်းချက်မှာ ပြန်ကြည့်လိုက်ရင် NCA ပြင်ဆင်ခြင်းဆိုတာ မပါဘူး။ NCA သဘောတူစာချုပ်မှာ လွှမ်းခြုံနိုင်ခြင်းမရှိတဲ့ ကိစ္စတွေပေါ်လာရင် ဆိုလိုတာက စာချုပ်ထဲမှာ မပါတဲ့ကိစ္စတွေ ပေါ်လာရင် ဘယ်လိုလုပ်မလဲဆိုတဲ့ဟာ ပါတယ်။ အဲဒါက NCA ရဲ့ ပြင်ဆင်ခြင်း အပါအဝင် ကျန်တဲ့ကိစ္စတွေကို စဉ်းစားတဲ့အခါမှာ ဆွဲယူလို့ရတဲ့ဟာ။ အဲဒါက နံပါတ် ၁ အချက်ပေါ့”ဟု ဦးဇော်ဌေးက ပြောကြားသည်။

ဆက်လက်၍ “ NCA ပြင်ပေးမှာလား ဆိုရင် အစိုးရသဘောနဲ့ ပြင်လို့မရဘူး။ NCA ထိုးပြီးသား ၁၀ ဖွဲ့ရှိတယ်။ ၁၀ ဖွဲ့ရဲ့ သဘောထားနဲ့ ပြင်ဆင်ခြင်းအခန်း မပါဘူးဆိုတာကို ကျွန်တော်တို့က ပြင်ချင်ပါတယ်လို့ ပြောတာ မဟုတ်ဘူး။ အဲဒီအဖွဲ့တွေနဲ့လည်း ဆွေးနွေးရမယ်။ NCA ပြင်သင့်၊ မပြင်သင့်။ အဲဒီ NCA က လွှမ်းခြုံမှုမရှိတဲ့ ဒီလိုကိစ္စတွေပေါ်လာရင် ဘယ်လိုလုပ်မလဲ။ သို့သော် အဲဒီလိုမျိုး ဆွေးနွေးနိုင်မှုသည် NCA ထဲရောက်မှရမယ်။ NCA အပြင်ကနေ ဒီ NCA ကြီး ဒါပြင်ပေးပါဆိုရင် ကျွန်တော်တို့ အစိုးရသဘောနဲ့ ပြောလို့မရဘူး။ NCA ထဲ ရောက်လာပြီဆိုရင် အဲဒီမှာရှိတဲ့ ခေါင်းဆောင်တွေနဲ့ ထိုးပြီးသား အဖွဲ့တွေရော သူတို့နဲ့ပေါင်းပြီးတော့ အစိုးရနဲ့ပေါင်းပြီးတော့ NCA က လွှမ်းခြုံမှုမရှိတဲ့ ကိစ္စတွေပေါ်လာရင် ညှိနှိုင်းဆွေးနွေးမယ်ဆိုရင် NCA မှာပါတယ်။ ခေါင်းဆောင်တွေ ညှိနှိုင်းဆွေးနွေးရမယ်။ နှစ်ဖက် ညှိနှိုင်းဆွေးနွေးရမယ်။ ဆွေးနွေးဖို့ပဲ ရှိတယ်။ အဲဒါက NCA ပြင်ပေးမလားဆိုရင် ကျွန်တော်တို့ အစိုးရသဘောတည်းနဲ့ ပြင်လို့မရဘူး။ NCA မပါတဲ့ ကိစ္စတွေပေါ်လာရင် ဘယ်လိုလုပ်မလဲဆိုတဲ့ Frame Work က ရှိပြီးသား ဒီတိုင်းသွားရမယ်”ဟု ပြောကြားသည်။

ယခု ၂၈ ရက်မှ ၃၀ ရက်အထိ EAO နှင့် နိုင်ငံရေး၊ လုံခြုံရေး အလွတ်သဘော ဆွေးနွေးမှုနှစ်ပွဲ ပြုလုပ်မည်ဖြစ်ပြီး တွေ့ဆုံမှုအပေါ် မူတည်ပြီး ၂၁ ရာစုပင်လုံ တတိယအကြိမ် အစည်းအဝေးပြုလုပ်ရန် ဆွေးနွေးမည် ဖြစ်ကြောင်း သိရသည်။

“၂၁ ပင်လုံ တတိယအစည်းအဝေး ဘယ်တော့လုပ်မလဲ ဆိုတော့ ကျွန်တော်တို့ အစတုန်းက ဇန်နဝါရီလ မှန်းထားတယ်။ မဖြစ်လာဘူး။ JICM ဆုံးဖြတ်ချက် ရှိတယ်။ ပြီးခဲ့တဲ့ အလွတ်သဘောမှ မေလကုန်ဆိုပြီး ထပ်လုပ်တယ်။ အဲဒါ အဆင်မပြေဘူး။ ဒီလ ၂၈၊ ၂၉ ၊ ၃၀ မှာ EAO နဲ့ နိုင်ငံရေး၊ လုံခြုံရေး အလွတ်သဘော နှစ်ပွဲတွေ့မယ်။ တွေ့တဲ့အပေါ်မှာ မူတည်ပြီးတော့ ညီလာခံ ကျင်းပရက်ကို ကျွန်တော်တို့ဘက်ကတော့ ဇွန်လထဲမှာ လုပ်စေချင်တယ်။ ဒါပေမဲ့ ရက်တော့ မသတ်မှတ်နိုင်သေးဘူး။ ဇွန်လထဲကတော့ ဖြစ်အောင် ကျွန်တော်တို့ ကြိုးစားမယ်”ဟု ဦးဇော်ဌေးက ပြောကြားသည်။