ပြီးခဲ့သည့် ဧပြီ ၂၊ ၃ ရက်က ယှဉ်ပြိုင်ကစားခဲ့သည့် ၂၀၁၉ ရာသီ AFC Cup ပြိုင်ပွဲ အုပ်စုပွဲစဉ် (၃) တွင် လက်စွမ်းပြခဲ့သည့် ရန်ကုန်အသင်းဂိုးသမား ကျော်ဇင်ထက်ကို AFC Cup ပြိုင်ပွဲ၏ Facebook စာမျက်နှာတွင် ဂုဏ်ပြု ဖော်ပြခဲ့ကြောင်း သိရသည်။
ရန်ကုန်အသင်းသည် အုပ်စုပွဲစဉ် (၃) အဖြစ် ဗီယက်နမ်ကလပ် ဟနွိုင်းအသင်းနှင့် အဝေးကွင်းယှဉ်ပြိုင်ခဲ့ရာ (၁-၀) ဂိုးဖြင့် အနိုင်ရခဲ့သည်။ ယင်းပွဲတွင် ကျော်ဇင်ထက်သည် ဟနွိုင်းအသင်းသွင်းယူသည့် ဂိုးသွင်းခွင့်များစွာကို ကာကွယ်နိုင်ခဲ့သည်။
၎င်းအနေဖြင့် ယင်းပွဲတွင် ဂိုးကာကွယ်မှု ရှစ်ကြိမ်အထိ ပြုလုပ်နိုင်ခဲ့သောကြောင့် AFC Cup Facebook တွင် ဂုဏ်ပြုဖော်ပြခြင်းဖြစ်သည်။
ကျော်ဇင်ထက်သည် ယခုနောက်ပိုင်းနှစ်များ တွင် လက်စွမ်းကစားပြလျက်ရှိပြီး မြန်မာ့လက်ရွေးစင်အသင်းတွင်လည်း ၂၀၁၆ ခုနှစ်က ပြန်လည်ရွေးချယ်ခံထားရသလို ပုံမှန်ကစားခွင့်ရနေကြောင်း သိရသည်။
