နာပိုလီအသင်း၏ ဆလိုဗက်ကီးယားဝါရင့်ကွင်းလယ်လူ ဟမ်ဆစ်သည် တရုတ်စူပါလိဂ်ကလပ် ဒါလီယန်ယီဖန်းအသင်းသို့ (၃)နှစ်စာချုပ်ဖြင့် ပြောင်းရွှေ့သွားခဲ့ပြီဖြစ်ကြောင်း သိရသည်။
ဒါလီယန်ယီဖန်းအသင်းသည် အသက် (၃၁)နှစ်ရှိပြီဖြစ်သည့် ဟမ်ဆစ်အား ခေါ်ယူရန် နာပိုလီအသင်းကို ပေါင်(၁၇.၆)သန်းပေးချေခဲ့ရပြီး ဟမ်ဆစ်အနေဖြင့် တစ်နှစ်လစာ ပေါင်(၇.၉)သန်းရရှိမည်ဖြစ်ကြောင်း တရုတ်နိုင်ငံအခြေစိုက်မီဒီယာများ က ဖော်ပြခဲ့သည်။
ဟမ်ဆစ်သည် နာပိုလီအသင်းတွင် (၁၁)နှစ်ခွဲကြာ ပါဝင်ကစားပေးခဲ့ကာ အသင်းအတွက် ပွဲအများဆုံး ကစားထားသူအဖြစ်လည်းကောင်း၊ အထင်ကရတိုက်စစ်မှူးဟောင်း မာရာဒိုနာကို ကျော်ဖြတ်ကာ အသင်းအတွက် ဂိုးအများဆုံးသွင်းယူထားသူအဖြစ်လည်းကောင်း ရပ်တည်နေသူဖြစ်သည်။
နာပိုလီအသင်းဥက္ကဋ္ဌ ဒီလော်ရန်းတစ်က "တရုတ်မှာ ဟမ်ဆစ် ပျော်ရွှင်ပါစေ။ သူ့အတွက် ဒီမှာ အမြဲတမ်းတံခါးဖွင့်ထားပါတယ်"ဟု ဆိုခဲ့သည်။
ဟမ်ဆစ်သည် နာပိုလီအသင်း အတွက် ပွဲပေါင်း (၅၂၀)ကစားခဲ့ကာ (၁၂၁)ဂိုး သွင်းယူပေးခဲ့သည်။
