ရန်ကုန်မြို့၌ ဧပြီ ၁၉ ရက်က ပြည်ထောင်စုဝန်ကြီး ဒေါက်တာဝင်းမြတ်အေး ဦးဆောင်သော ကိုယ်စားလှယ်အဖွဲ့ ဘင်္ဂလားဒေ့ရှ်နိုင်ငံသို့ သွားရောက်ခဲ့သည့် ခရီးစဉ်နှင့်ပတ်သက်၍ မီဒီယာများအား ရှင်းလင်းပြောကြားနေစဉ်
ဘင်္ဂလားဒေ့ရှ်နိုင်ငံဘက်သို့ ရောက်ရှိနေပြီး မြန်မာနိုင်ငံ၌နေခဲ့ကြောင်း အထောက်အထားရှိသူမှန်သမျှကို နှစ်နိုင်ငံသဘောတူညီစာချုပ်ပါအတိုင်း အမြန်ဆုံးပြန်လည်လက်ခံရန် ဆန္ဒရှိကြောင်း ပြည်ထောင်စုဝန်ကြီးများက ရှင်းလင်းပြောကြားသည်။
ရန်ကုန်မြို့ရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) ၌ ဧပြီ ၁၉ ရက်ကပြုလုပ်သည့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေး ခေါင်းဆောင်သော မြန်မာကိုယ်စားလှယ်အဖွဲ့ ဧပြီ ၁၁ ရက်မှ ၁၃ ရက်အထိ ဘင်္ဂလားဒေ့ရှ်နိုင်ငံ ကော့ခ်ဘဇားနှင့် ဒါကာသို့ သွားရောက်ခဲ့သည့် ခရီးစဉ်နှင့်ပတ်သက်၍ သတင်းစာရှင်းလင်းပွဲတွင် ပြည်ထောင်စုဝန်ကြီးများက အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။
“ကျွန်တော်တို့ အမြန်ဆုံးပြန်လည်လက်ခံဖို့ ကျွန်တော်တို့မှာ ဆန္ဒရှိတယ်။ ဒီမှာနေခဲ့ဖူးတဲ့ လူမှန်သမျှကိုလည်း ဦးရေသတ်မှတ်ချက် မဟုတ်ဘဲနဲ့ ကျွန်တော်တို့သတ်မှတ် နှစ်နိုင်ငံသဘောတူစာချုပ်ထဲမှာပါတဲ့အတိုင်း ကျွန်တော်တို့ ချက်ချင်းပြန်လက်ခံချင်တဲ့ ဆန္ဒရှိတယ်။ ဒီရာသီဥတုကလည်း မုတ်သုံရာသီကလည်း ဝင်တော့မယ်။ ဒါကြောင့် ကျွန်တော်တို့ အဲဒီဘက်ကိုသွားတယ်။ သွားတယ်ဆိုတာ ဘာလဲဆိုတော့ ပြန်လည်လက်ခံဖို့ နှောင့်နှေးနေတဲ့အတွက်ကြောင့် နှောင့်နှေးနေတဲ့အချက်တွေ ဘာတွေရှိလဲ။ ဘာကြောင့်နှောင့်နှေးရလဲဆိုတာကို သိအောင်လို့ ကိုယ်တိုင်သွားတာဖြစ်ပါတယ်။ သွားတဲ့အခါကျတော့ အခုပြောတဲ့အတိုင်းပဲ တကယ်ပဲနှောင့်နှေးကြောင်းက ပုံစံတွေကို သူတို့ ပုံစံတကျ ဖြည့်ထားတာမရှိဘူး။ ဖြည့်ပြီးတော့ ပို့တဲ့ပုံစံတွေကလည်း ပုံစံမကျလို့ ကျွန်တော်တို့မှာစစ်ဆေးရတာ ခက်တယ်။ ဒါကြောင့် ကြန့်ကြာတယ်။ ဆိုတော့ အဖြေကထွက်ခဲ့ပါတယ်” ဟု ဒေါက်တာဝင်းမြတ်အေးက ရှင်းလင်းပြောကြားသည်။
“ကျွန်တော်တို့မှာ ပုံစံရှိပါတယ်။ ဘယ်သူရယ်၊ ဘယ်ဝါရယ်ဆိုပြီးတော့ လက်ခံတာ မဟုတ်ပါဘူး။ အဲဒီပုံစံမှာ သူကြိုက်တာသူဖြည့်။ ကျွန်တော်တို့က သဘောတူထားတာက ဘာကိုသဘောတူထားလဲဆိုတဲ့ အခါကျတော့ ဒီနိုင်ငံမှာ နေခဲ့ဖူးတဲ့လူ ဖြစ်ရမယ်။ ဒီနိုင်ငံသားဖြစ်စရာမလိုဘူး။ ဒီနိုင်ငံမှာ နေခဲ့ဖူးတဲ့ အထောက်အထားရှိတယ်ဆိုရင် အဲဒီလူအနေနဲ့ လက်ခံမှာပဲ။ ကျွန်တော်တို့ အနေနဲ့အခုနတုန်းက ဘင်္ဂါလီလို့ခေါ်တာ။ ရိုဟင်ဂျာလို့ ခေါ်တာဆိုတဲ့ဟာက စိတ်ဝမ်းကွဲစေတဲ့ကိစ္စကြောင့်မို့လို့ ကျွန်တော်တို့ နိုင်ငံတော်အတိုင်ပင်ခံက အဲဒီမှာရှိတဲ့ လူတွေအားလုံးကို ရခိုင်ပြည်မှာရှိတဲ့ မွတ်စလင် Community ကလူတွေလို့ သတ်မှတ်ထားတယ်” ဟု နိုင်ငံတော်အတိုင်ပင်ခံရုံးဝန်ကြီးဌာန ပြည်ထောင်စုဝန်ကြီး ဦးကျော်တင့်ဆွေက ပြောကြားသည်။
ထို့ပြင် သတင်းစာရှင်းလင်းပွဲ၌ နှစ်နိုင်ငံ သဘောတူညီချက်အရ ပြန်လာလိုသူများအနေဖြင့် ဖြည့်သွင်းရမည့် သတ်မှတ်ပုံစံကွဲလွဲနေခြင်းများနှင့် ပတ်သက်၍ ဝန်ကြီး ဒေါက်တာဝင်းမြတ်အေးက နှစ်ဦးနှစ်ဖက်ဆွေးနွေး သဘေားထားသည့်ပုံစံ Hard Copy Soft Copy များ ဘင်္ဂလားဒေ့ရှ်ဘက်သို့ ပေးလိုက်သော်လည်း ၎င်းတို့ပြန်ပို့လိုက်သည့် ပုံစံသည် လုံးဝမတူသည့်ပုံစံဖြစ်နေကြောင်း ပြောကြားသည်။
“အဓိက ကတော့ ဘာတွေမပါဘူးလဲဆိုတော့ ဓာတ်ပုံမပါဘူး။ လက်မှတ်မပါဘူး။ လက်မှတ်ပါဖို့က ဘာလို့အရေးကြီးသလဲဆိုတော့ လက်မှတ်ထိုးတဲ့အခါကျမှ သူတို့တွေဟာ နယ်စပ်ဖြတ်ကျော်လာတဲ့သူတွေဆိုတာကို စိစစ်လို့ရမယ်။ လက်ဗွေမပါဘူး။ ဓာတ်ပုံတို့မပါဘူး။ အဲဒါတွေပါတယ်ဆိုရင် ကျွန်တော်တို့ဆီမှာ မှတ်တမ်းတွေယူထားတာရှိတယ်။ အဲဒါတွေနဲ့ ယှဉ်ကြည့်လိုက်ရင် အကုန်လုံးထွက်လာစရာရှိတယ်။ အဲဒီတော့ မြန်မာဘက်က ဘာမှထပ်ပို့စရာမလိုဘူး” ဟု ဒေါက်တာဝင်းမြတ်အေးက ပြောကြားသည်။
ထိုသို့ ဘင်္ဂလားဒေ့ရှ်ဘက်မှ ပြန်ပို့သည့်ပုံစံများသည် သတ်မှတ်ထားသောပုံစံများ မဟုတ်ကြောင်းကို ဘင်္ဂလားဒေ့ရှ်နိုင်ငံခြားရေးဝန်ကြီး သိရှိသွားသည့်အတွက် နှစ်ဖက်သဘောတူထားသည့်ပုံစံအတိုင်း ပြန်ပို့နိုင်ရန်အတွက် ဘင်္ဂလားဒေ့ရှ်ဝန်ကြီးက ၎င်းတို့ဘက်တွင် မှာကြားမှုများ ပြုလုပ်ပြီးဖြစ်ကြောင်းနှင့် မြန်မာဘက်သို့လည်း အမြန်ဆုံးပြန်ပို့မည်ဟု ပြောဆိုကြောင်း ဒေါက်တာဝင်းမြတ်အေးက ပြောကြားသည်။
