X လူမှုမီဒီယာပလက်ဖောင်းကို ပိုင်ဆိုင်သည့် အီလွန်မာ့စ်သည် ကိုယ်ရေးအချက်အလက် လုံခြုံမှုနှင့် လုံခြုံရေးကို အထူးအလေးထားပြီး ဒီဇိုင်းထုတ်ထားသည့် XChat အမည်ရှိ သီးခြား Messaging application တစ်ခုကို ဧပြီ ၁၇ ရက်တွင် တရားဝင် စတင်မိတ်ဆက်ခဲ့သည်။

XChat ကို သီးသန့် Messaging ဝန်ဆောင်မှုအဖြစ် လုပ်ဆောင်နိုင်ရန်အတွက် ပင်မ X ပလက်ဖောင်းမှ ခွဲထုတ်ထားခြင်းဖြစ်သည်။

အဆိုပါ application ကို ဧပြီလအတွင်းတွင် iPhone နှင့် iPad များ၌ စတင်ထုတ်ပေးခဲ့ပြီး ယင်းသည် X လူမှုမီဒီယာပလက်ဖောင်း၏ ဆက်သွယ်ရေးစွမ်းဆောင်ရည်ကို ချဲ့ထွင်ရန်အတွက် မဟာဗျူဟာမြောက် ခြေလှမ်းတစ်ခုလည်းဖြစ်သည်။

XChat ကို ပင်မပလက်ဖောင်းမှ ခွဲထုတ်လိုက်ခြင်းသည် စကားပြောဆိုမှုများအတွက် အထူးရည်ရွယ်ထားသော နေရာတစ်ခုအဖြစ် ဖန်တီးလိုသည့် ၎င်း၏ရည်ရွယ်ချက်ကို ထင်ဟပ်စေသည်။

အဆိုပါ application သည် ရိုးရှင်းမှု၊ မြန်ဆန်မှုနှင့် အရေးအကြီးဆုံးဖြစ်သည့် အသုံးပြုသူ၏ ကိုယ်ရေးလုံခြုံမှုကို အဓိကထားပြီး တီထွင်ထုတ်လုပ်ထားခြင်းဖြစ်သည်။

XChat ၏ အဓိကထူးခြားချက်မှာ End-to-end encryption ဖြစ်ပြီး စာများအားလုံးကို ပေးပို့သူမှ လက်ခံသူထံသို့ လုံခြုံစွာ ပေးပို့နိုင်ရန် အာမခံပေးထားသဖြင့် မိမိတို့ ပေးပို့ထားသည့်စာများ၊ စကားပြောဆိုထားသည့်အကြောင်းအရာများကို X ကို ပိုင်ဆိုင်သည့် အီလွန်မာ့စ် အပါအဝင် မည်သူမျှ ဝင်ရောက်ကြည့်ရှုနိုင်မည်မဟုတ်ပေ။

ထို့ပြင် XChat application တွင် ကြော်ငြာများ မပါဝင်သည့်အပြင် အသုံးပြုသူ၏ ဒေတာများကိုလည်း ခြေရာခံခြင်းမပြုလုပ်သောကြောင့် ပိုမိုရှင်းလင်းပြီး လုံခြုံသော အတွေ့အကြုံကို ရရှိစေမည်ဖြစ်ကြောင်း ကုမ္ပဏီက ပြောကြားခဲ့သည်။

Screenshot ရိုက်ယူခြင်းကို တားဆီးခြင်း၊ စာတိုများ အလိုအလျောက် ပျောက်ကွယ်သွားစေခြင်းနှင့် Passcode ဖြင့် လော့ခ်ချခြင်းကဲ့သို့သော အဆင့်မြင့် ကိုယ်ရေးလုံခြုံမှု လုပ်ဆောင်ချက်များလည်း ပါဝင်သည်။

XChat တွင် အုပ်စုဖွဲ့စကားပြောခြင်း (Group chats)၊ ဖိုင်များ မျှဝေခြင်းနှင့် ဗီဒီယိုကောလ် ခေါ်ဆိုခြင်းတို့ကိုလည်း ပြုလုပ်နိုင်မည်ဖြစ်သည်။

Ref: Bangkok Post