ယူဂန်ဒါတာဝေးအပြေးသမား ဘင်ဂျမင်ကီပလာဂတ်ကို ဓားဖြင့်ထိုးသတ်ခဲ့သူနှစ်ဦး ထောင်ဒဏ် ၃၅ နှစ်စီ ချမှတ်ခံရကြောင်း သိရသည်။
မီတာ ၃၀၀၀ တားဆီးကျော်အပြေးပြိုင်ပွဲများတွင် ယှဉ်ပြိုင်သည့် ယူဂန်ဒါအိုလံပစ်ကစားသမား ကီပလာဂတ် (၃၄ နှစ်) သည် ပြီးခဲ့သည့် ၂၀၂၃ ခုနှစ် ဒီဇင်ဘာ ၃၁ ရက်က ကင်ညာနိုင်ငံ၊ အယ်လ်ဒိုရတ်မြို့အနီးတွင် ဓားထိုးခံရခြင်းဖြစ်ပြီး ၄င်း၏ရုပ်အလောင်းကို ကားအတွင်းတွေ့ရှိခဲ့ရသည်။
အဆိုပါဖြစ်စဉ် နှင့်ပတ်သက်၍ အမျိုးသားနှစ်ဦးကို ရဲတပ်ဖွဲ့က ဖမ်းဆီးထိန်းသိမ်းခဲ့ပြီး တစ်နှစ်နီးပါးအကြာတွင် ပြစ်ဒဏ်ချမှတ်ခဲ့ခြင်းဖြစ်သည်။
ကီပလာဂတ်၏ မိခင်ဖြစ်သူက ကျူးလွန်သူနှစ်ဦးကို ထောင်ဒဏ်တစ်သက်ချမှတ်ရန် တောင်းဆိုခဲ့သော်လည်း တရားသူကြီး အန်ယာခွန်ဒီက ထောင်ဒဏ် ၃၅ နှစ်စီ ချမှတ်ကြောင်း အမိန့်ချမှတ်ခဲ့သည်။
ကင်ညာနိုင်ငံတွင် ပြီးခဲ့သည့်နှစ်များအတွင်း ထိပ်တန်းအဆင့် အားကစားသမားများ အသတ်ခံရမှု မကြာခဏဖြစ်ပွားခဲ့သည်။
