ချယ်လ်ဆီးအသင်း၏ ဆီနီဂေါတိုက်စစ်မှူး နီကိုလက်စ်ဂျက်ဆင်သည် အသင်းအတွက် ပရီးမီးယားလိဂ် ဂိုး(၂၀) အမြန်ဆုံးသွင်းယူနိုင်သည့် (၅)ဦးမြောက်ကစားသမားအဖြစ် မှတ်တမ်းဝင်ခဲ့ကြောင်း သိရသည်။
နီကိုလက်စ်ဂျက်ဆင်(၂၃ နှစ်)သည် ၂၀၂၃ နွေရာသီတွင် ဗီလာရီးယဲလ်မှ ချယ်လ်ဆီးသို့ ပြောင်းရွှေ့လာသူဖြစ်ပြီး ပြီးခဲ့သည့်ရာသီ၌ ပရီးမီးယားလိဂ်(၃၅)ပွဲတွင် (၁၄)ဂိုးသွင်းယူနိုင်ခဲ့ပြီး ယခုရာသီ၌ (၉)ပွဲကစားအပြီးတွင် (၆)ဂိုး သွင်းယူနိုင်ခဲ့ခြင်းဖြစ်သည်။
ထို့ကြောင့် ၎င်းအနေဖြင့် ပရီးမီးယားလိဂ် ဂိုး (၂၀)ကို (၄၄)ပွဲကစားကာ သွင်းယူနိုင်ခဲ့ခြင်းဖြစ်သောကြောင့် (၅)ဦးမြောက် အမြန်ဆုံးကစားသမားအဖြစ် မှတ်တမ်းဝင်ခဲ့ခြင်းဖြစ်သည်။
ချယ်လ်ဆီးအသင်းအတွက် ပရီးမီးယားလိဂ်ဂိုး(၂၀)ကို ပွဲအရေအတွက်အနည်းဆုံးဖြင့် အမြန်ဆုံးသွင်းယူနိုင်သည့်ကစားသမားမှာ စပိန်လက်ရွေးစင်တိုက်စစ်မှူးဟောင်း ဒီယေဂိုကော်စတာဖြစ်ပြီး (၂၆)ပွဲကစားကာ သွင်းယူနိုင်ခဲ့ခြင်းဖြစ်သည်။
ဒုတိယအမြန်ဆုံးအဖြစ် ဟက်ဆယ်ဘိန့်က (၂၇)ပွဲဖြင့် ရပ်တည်နေပြီး ကိုးလ်ပါလ်မာက (၃၃)ပွဲဖြင့် တတိယနေရာ၊ မာ့ခ်စတိန်းက (၃၇)ပွဲဖြင့် စတုတ္ထနေရာတွင် ရှိနေသည်။
ဂျက်ဆင်၏ သွင်းဂိုးများထဲ၌ ပယ်နယ်တီဂိုး ပါဝင် ခြင်းမရှိကြောင်းလည်း သိရသည်။
