စင်ကာပူသို့ ရောက်ရှိနေသည့် မြန်မာများ နိုင်ငံကူးလက်မှတ်သက်တမ်းတိုးလိုပါက မှတ်ပုံတင်ယူလာရန် စင်ကာပူနိုင်ငံရှိ မြန်မာသံရုံးက ထုတ်ပြန်သည်။
စင်ကာပူနိုင်ငံတွင် အလုပ်လုပ်ကိုင်လျက်ရှိသည့် မြန်မာနိုင်ငံသားများ၏ နိုင်ငံကူးလက်မှတ်များကို သက်တမ်းတိုးရာတွင် ဝင်ငွေခွန်ဆောင်ပြီးမှသာ ဆောင်ရွက်ပေးလျက်ရှိကြောင်း၊ ဝင်ငွေခွန်ပေးဆောင်မှုစာရင်းသွင်းရာတွင် မြန်မာနိုင်ငံသားအချို့မှာ နိုင်ငံသား စိစစ်ရေးကတ်ပြား(မှတ်ပုံတင်) အမှတ်များမှားယွင်းနေကြောင်း၊ အခြားသူတစ်ဦး၏ နိုင်ငံသားစိစစ်ရေးကတ်ပြားအမှတ်များကို အသုံး ပြုနေကြောင်း စိစစ်တွေ့ရှိရသည်ဟု သံရုံးက ဆိုသည်။
ယင်းကဲ့သို့ဖြစ်စဉ်များရှိနေသဖြင့် နိုင်ငံကူးလက်မှတ်သက်တမ်းတိုးလိုသူများအနေဖြင့် မဖြစ်မနေနိုင်ငံသားစိစစ်ရေးကတ်ပြားမူရင်း သို့မဟုတ် မိတ္တူများယူဆောင်လာရန်၊ ပျောက်ဆုံးပါက အသစ်လျှောက်ထားခြင်းများပြုလုပ်ထားရန်လိုအပ်ပြီး အခြားမဆိုင်သူများ၏ နိုင်ငံသားစိစစ်ရေးကတ်အမှတ် များကိို အသုံးပြုပြီး ဝင်ငွေခွန်ဆောင်ခြင်းများ လုံးဝရှောင်ရှားရန် သံရုံးက အသိပေးထားသည်။
လက်ရှိတွင် ပြည်ပတွင်အလုပ်လုပ်ကိုင်သူများအနေဖြင့် နိုင်ငံကူးလက်မှတ်သက်တမ်းတိုးလိုပါက ဝင်ငွေခွန်ထမ်းဆောင်ပြီးမှသာ သက်တမ်းတိုးနိုင်မည်ဖြစ်ကြောင်း သက်ဆိုင်ရာ သံရုံးများက ထုတ်ပြန်ထားသည်။
စင်ကာပူနိုင်ငံမှာ မြန်မာလုပ်သားအများဆုံးသွားရောက်လုပ်ကိုင်လျက်ရှိသည့် နိုင်ငံများတွင် တစ်ခုအပါအဝင်ဖြစ်သည်။
