ကျောက်ဆည်မြို့ သီတင်းကျွတ်ဆင်လှူပွဲတော် ကို ၁၃၈၆ ခုနှစ်၊ သီတင်းကျွတ်လဆန်း ၁၄ ရက်( အောက်တိုဘာ ၁၆ ရက်)တွင် ကျင်းပသွားမည်ဖြစ်ကြောင်း ပွဲတော်ကျင်းပရေးမှ တာဝန်ရှိသူတစ်ဦးက ပြောကြားသည်။
“ဆင်ပြိုင်ပွဲက သီတင်းကျွတ်လဆန်း ၁၄ ရက်နေ့ကျင်းပမှာပါ။ ဒီနှစ် ပြိုင်ပွဲဝင်အရေအတွက်က နည်းပါတယ်။ ၁၀ စီးလောက်ပဲရှိပါတယ်။ ဆုတွေက ပထမ၊ ဒုတိယ၊ တတိယ ပေးသွားမှာပါ။ ဖွင့်ပွဲက ၈ နာရီလုပ်ပြီး ၉ နာရီလောက်စမှာပါ။ နောက်ရက်ကျ တောင်ပေါ်တက်ဘုရားဖူးကြ၊ ဆင်လှူပွဲတွေ လုပ်ကြမှာပါ”ဟု ပွဲတော်ကျင်းပရေးမှ တာဝန်ရှိသူတစ်ဦးကပြောကြားသည်။
ကျောက်ဆည်မြို့ဆင်အကပြိုင်ပွဲတွင် ခုံဒိုင် ၁ (ဗဟိုခုံ)တွင် ၁။ ဘိုကေ (ရိုးရာ ကလေးတန်း) ၂။ ပဏ် (သဘာဝဆင်) ၃။ ရွှေဝါဦး (ဘော်ကြယ်) ၄။ မြတ်ဂုဏ်ရောင်(ရိုးရာ အကြီးတန်း) ၊ ခုံဒိုင် ၂( မြို့လယ်လက်ပြတိုင်)တွင် ၁။ မြင်စိုင်းဇာနည်(ရိုးရာ အကြီးတန်း) ၂။ ဒွေး(ဘော်ကြယ်) ၊ ခုံဒိုင် ၃(လေးမျက်နှာ ဘုရားကွင်း)တွင် ၁။ ခေတ်သစ်မာန်(ရိုးရာ ကလေးတန်း) ၂။ ဂရုဏာရှင်(သဘာဝဆင်) ၃။ ပိတောက်မြိုင်(ရိုးရာ အကြီးတန်း) ၄။ သားဇော်ဂျီ (ဘော်ကြယ်)တို့သည် အမှတ်စဉ် အတိုင်း ခုံဒိုင် ၃ ခုလုံးတွင်ယှဉ်ပြိုင်သွားမည်ဖြစ်ကြောင်းနှင့် ဒိုင်ခုံ ၃ ခုလုံး ယင်းနေ့ နံနက် ၉ နာရီတွင်ပြိုင်ပွဲစမည်ဖြစ်ကြောင်း သတင်းထုတ်ပြန်ချက်အရ သိရသည်။
ကျောက်ဆည်မြို့ ဆင်လှူပွဲတော်သည် နှစ်စဉ်ရိုးရာအစဉ်အလာမပျက် ရိုးရာပွဲတော်အဖြစ် သီတင်းကျွတ်လဆန်း ၁၄ ရက်နေ့တွင် ဆင်အကအလှပြိုင်ပွဲ ကျင်းပကာလပြည့်နေ့ တွင် ဆွမ်းတော်ကြီးကပ်လှူပွဲ၊ ရွှေဆင်၊ ငွေဆင် လှူဒါန်းပွဲ ကျင်းပလေ့ရှိကြောင်း သိရသည်။
