ရာသီအဖွင့် (၃) ပွဲကစားပြီး (၂) ပွဲနိုင်၊ (၁) ပွဲသရေ၊ (၆) ဂိုးသွင်း ပေးဂိုးမရှိ ဆိုတဲ့ရလဒ်နဲ့အတူ သီယာဂို မော့တာက စီးရီးအေရပ်ဝန်းကို ကိုင်လှုပ်လိုက်တယ်။ အပြောင်းအရွှေ့ဈေးကွက်ထဲမှာလည်း ခပ်ကြမ်းကြမ်း လှုပ်ရှားနေတယ်။ ခီယေဆာလို ကစားသမားမျိုးကို အသင်းမှာ အနာဂတ်မရှိတော့ဘူးလို့ ခပ်ပြတ်ပြတ်ပဲ ပြောလိုက်တယ်။ နစ်ကိုးလက်စ်ဂွန်ဇာလက်ဇ်၊ ဖရန်စစ္စကိုကွန်ဆေးကာအိုတို့ မရောက်သေးခင်မှာတောင် အမ်ဘန်ဂူလာလို လူငယ်ကစားသမားနဲ့ အစားထိုးပြနေပြီး မော့တာဟာ ဂျူဗင်တပ်စ် ခေတ်သစ်တစ်ခုအတွက် ရောင်နီတွေ ခင်းကျင်းပြနေပါတယ်။