![](https://news-eleven.com/sites/news-eleven.com/files/styles/news_detail_image/public/news-images/adsadasdasd.jpg?itok=S1i3xqWy)
မွန်ပြည်နယ် သံဖြူဇရပ်မြို့နယ် သံဖြူဇရပ် - အနန်းကွင်း - ဘုရားသုံးဆူ ကားလမ်းဘေးရှိ ရဲတံခွန်ကျေးရွာမှ အမျိုးသမီးတစ်ဦးမှာ ဩဂုတ် ၃၀ ရက် ညနေပိုင်းက လက်လုပ်မြေမြှုပ်မိုင်း နင်းမိပေါက်ကွဲခဲ့သည့်အတွက်ကြောင့် ထိခိုက်ဒဏ်ရာများရရှိခဲ့ကြောင်း ဒေသခံများ၏ ပြောကြားချက်များအရ သိရသည်။
သံဖြူဇရပ်မြို့နယ် ရဲတံခွန်ကျေးရွာနေ အသက် (၃၂) နှစ်အရွယ် မငယ်ငယ်ထွေး ဆိုသူမှာ ဩဂုတ်လ (၃၀) ရက်နေ့ ညနေ (၅) နာရီအချိန်ခန့်က ခင်ပွန်းသည်နှင့်အတူ ရဲတံခွန်ကျေးရွာ ဘုန်းကြီးကျောင်းအနီး ရော်ဘာတောအတွင်း ဝဥသွားတူးစဉ် လက်လုပ်မြေမြှုပ်မိုင်းနင်းမိခဲ့ခြင်းဖြစ်ကြောင်း ဒေသခံတစ်ဦး ပြောကြားသည်။
“မြေမြှုပ်မိုင်းပေါက်ကွဲတဲ့အရှိန်နဲ့ မငယ်ငယ်ထွေးရဲ့ ညာဘက်ခြေနဲ့ လက်တွေမှာ ထိခိုက်ဒဏ်ရာတွေရသွားပါတယ်။ သူ့ကို ခင်ပွန်းဖြစ်သူက ထမ်းထုတ်လာပြီးတော့ ရွာနားရောက်တော့မှ ဒေသခံလူမှုကူညီကယ်ဆယ်ရေးအဖွဲ့က သံဖြူဇရပ်မြို့နယ်ဆေးရုံကိုလိုက်ပို့လိုက်ကြတယ်” ဟု ၎င်းဒေသခံက ဆက်လက်ပြောကြားသည်။
လက်လုပ်မြေမြှုပ်မိုင်း နင်းမိပေါက်ကွဲမှုကြောင့် မငယ်ငယ်ထွေး တွင် ညာဘက်လက်မောင်း ပေါက်ပြဲဒဏ်ရာ (၁) ချက်၊ ညာဘက်ပေါင် ပေါက်ပြဲဒဏ်ရာ (၅) ချက်၊ ညာဘက်ပါး တွင် ပွန်းပဲ့ဒဏ်ရာ (၁) ချက်ရရှိခဲ့ကြောင်း ၎င်းဒေသခံက ဆိုသည်။
ပြီးခဲ့သည့် ဩဂုတ်လ (၂၂) ရက်နေ့ကလည်း သံဖြူဇရပ်မြို့နယ် ရဲတံခွန်ကျေးရွာရှိ ဘုန်းကြီးကျောင်းအနီး ရော်ဘာခြံအတွင်း ထင်းခုတ်သွားသည့် ကိုစိုးသန်း ဆိုသူမှာလည်း လက်လုပ်မြေမြှုပ်မိုင်း နင်းမိပေါက်ကွဲမှုကြောင့် ခြေထောက်နှင့် လက်များတွင် ထိခိုက်ဒဏ်ရာများရရှိခဲ့သေးကြောင်း သိရသည်။