ဥပဒေစိုးမိုးရေးနှင့် အဂတိလိုက်စားမှု တိုက်ဖျက်ရေးကို ဦးစားပေးလုပ်ဆောင်ခြင်းအားဖြင့် လက်ရှိတွင် အဆင့် ၁၇၁ ရရှိကာ နိမ့်ကျနေသော စီးပွားရေးလုပ်ကိုင်ရ လွယ်ကူမှုအဆင့်ကို တိုးတက်လာစေနိုင်ကြောင်း တယ်လီနော၏ ဒစ်ဂျစ်တယ်မြန်မာအစီရင်ခံစာတွင် ဖော်ပြထားချက်အရ သိရသည်။
ဥပဒေစိုးမိုးရေးနှင့် အဂတိလိုက်စားမှု တိုက်ဖျက်ရေးကို အစိုးရက ဦးစားပေးလုပ်ဆောင်ခြင်းသည် ကမ္ဘာတွင် မြန်မာနိုင်ငံ၏ လက်ရှိစီးပွားရေး လုပ်ကိုင်ရလွယ်ကူမှုအဆင့် ၁၇၁ မှ ပိုမိုကောင်းမွန်သောအဆင့်သို့ တိုးတက်လာရန် အခွင့်အလမ်းကောင်းဖြစ်ကြောင်း အစီရင်ခံစာတွင် သုံးသပ်ထားသည်။
အစိုးရဌာနများတွင် တရားဥပဒေစိုးမိုးရေးအစား ပုဂ္ဂလိကဆန်ဆန် မညီညွတ်၊ မလျော်ကန်သော ဆုံးဖြတ်ချက်ချမှတ်ခြင်း ပြုလုပ်ခြင်းကြောင့် ပွင့်လင်းမြင်သာမှုမရှိခြင်း ဆက်လက်ဖြစ်ပေါ်နေပြီး ကမ္ဘာ့အဆင့်ညွှန်းကိန်းများတွင် မြန်မာနိုင်ငံ အဆင့်မြင့်လာစေရန် ကြိုးပမ်းမှုမှာ ခက်ခဲနေမည်ဖြစ်ကြောင်း ဖော်ပြထားသည်။
ဥပဒေနှင့် စည်းမျဉ်းစည်းကမ်းများကို တရားဥပဒေစိုးမိုးရေးနှင့် သက်ဆိုင်သော နိုင်ငံတကာကွန်ဗင်းရှင်းများနှင့်အညီ ရေးဆွဲပြဋ္ဌာန်းကာ အသက်ဝင်စေရမည်ဖြစ်ကြောင်း အကြံပြုထားသည်။ ထိုသို့လုပ်ဆောင်ခြင်းအားဖြင့် ဒစ်ဂျစ်တယ်စီးပွားရေးကို ဖွံ့ဖြိုးတိုးတက်စေနိုင်မည့်အပြင် ကမ္ဘာ့ဘဏ်၏ မြန်မာနိုင်ငံတွင် စီးပွားရေးလုပ်ကိုင်ရန် လွယ်ကူမှုအညွှန်းကိန်းကို မြင့်တက်စေကာ နိုင်ငံခြားရင်းနှီးမြှုပ်နှံမှုကို ဆွဲဆောင်နိုင်မည်ဖြစ်ကြောင်း သုံးသပ်ထားသည်။
စီးပွားရေး လုပ်ကိုင်ရလွယ်ကူမှုညွှန်းကိန်းတွင် ထိုင်းမှာ အဆင့် ၂၆၊ အင်ဒိုနီးရှားမှာ အဆင့် ၇၂၊ စင်ကာပူမှာ အဆင့် ၂၊ မလေးရှားမှာ အဆင့် ၂၄ နှင့် ဗီယက်နမ်မှာ အဆင့် ၆၈ ဖြစ်ကာ မြန်မာနိုင်ငံမှာ အဆင့် ၁၇၁ သာရရှိပြီး ဒေသတွင်းနိုင်ငံများအနက် များစွာအဆင့်နိမ့်ကျနေကြောင်း သိရသည်။
ထို့ပြင် ဥပဒေနှင့်စည်းမျဉ်းများကို လိုက်နာမှုရှိစေရေးအတွက် ကြီးကြပ်ရန် ဖွဲ့စည်းထားသော စည်းကမ်းထိန်းသိမ်းရေးအဖွဲ့များကို လိုအပ်သော လုပ်ပိုင်ခွင့်ပေးသင့်ကြောင်း အကြံပြုထားသည်။ အပြည်ပြည်ဆိုင်ရာ စံချိန်စံညွှန်းများနှင့်အညီ ၎င်းတို့အား မွမ်းမံလေ့ကျင့်ပေးပြီး အစိုးရနှင့်အမှီအခိုကင်းစေမှသာ ရေရှည်စီးပွားရေးတိုးတက်ဖွံ့ဖြိုးမှုအတွက် ဆုံးဖြတ်ချက်များ ချမှတ်နိုင်မည်ဟုဆိုသည်။ ၂၀၁၅ ခုနှစ်အကုန်တွင် လွတ်လပ်သောအဖွဲ့အစည်းအဖြစ် ရပ်တည်ရန် ဆက်သွယ်ရေးဥပဒေတွင် ပြဋ္ဌာန်းထားသော်လည်း ယင်းသို့လွတ်လပ်စွာ ရပ်တည်နိုင်ခြင်းမရှိသေးသော အဖွဲ့အစည်းများထဲတွင် ဆက်သွယ်ရေးကြီးကြပ်မှုကော်မရှင်မှာလည်း တစ်ခုအပါအဝင်ဖြစ်ကြောင်း ဥပမာပေးထားသည်။
