ထိုင်းနိုင်ငံ ၏ ဖွဲ့စည်းပုံအခြေခံဥပဒေဆိုင်ရာ တရားရုံးက ပီတာလင်ဂျာရွန်ရတ် ကို နိုင်ငံရေးလောကမှ ၁၀ နှစ် ပိတ်ပင်လိုက်ပြီး ၎င်း၏  Move Forward ပါတီကိုလည်း ဖျက်သိမ်းလိုက်ကြောင်း သိရသည်။

ဘုရင်ကို အသရေဖျက်မှု ဥပဒေများအား ပြုပြင်ပြောင်းလဲရန် ကြိုးပမ်းမှုများကြောင့်  သြဂုတ် ၇ ရက်တွင် ဘန်ကောက်မြို့ရှိ ဖွဲ့စည်းပုံအခြေခံဥပဒေဆိုင်ရာ တရားရုံးက  ထိုင်းနိုင်ငံ၏ လူကြိုက်အများဆုံး နိုင်ငံရေးသမား ပီတာလင်ဂျာရွန်ရတ်ကို   နိုင်ငံရေး လောကမှ ၁၀ နှစ် ပိတ်ပင်လိုက်ပြီး ၎င်း၏ Move Forward ပါတီကိုလည်း ဖျက်သိမ်းလိုက်ခြင်း ဖြစ်သည်။

Move Forward ပါတီ ကို ဖျက်သိမ်းရန်နှင့် ပါတီခေါင်းဆောင် ဟောင်း ပီတာလင်ဂျာရွန်ရတ် ပါဝင်သော ပါတီအမှုဆောင်ဘုတ်အဖွဲ့ကို ၁၀ နှစ်ကြာ ပိတ်ပင်လိုက်သည်ဟု တရားသူကြီး ပူညာအူချာချွန်က ပြောကြားခဲ့သည်။

ပီတာသည် ရွေးကောက်ပွဲမတိုင်မီ စည်းရုံးရေးဆင်းရာတွင် ထိုင်းနိုင်ငံ၏ တင်းကျပ်သော တော်ဝင်စော်ကားမှု ဥပဒေကို ပြင်ဆင်မည်ဟု ပြောကြားခဲ့သောကြောင့် ၎င်းင်းကို လူကြိုက်များမှု မြင့်တက်လာခဲ့သည်။

သို့ရာတွင် ဝန်ကြီးချုပ်ဖြစ်ရေးအတွက် ပီတာ၏ကြိုးပမ်းမှုကို ဆီးနိတ်ရှိ ရှေးရိုးစွဲအင်အားစုများက ပိတ်ဆို့ခဲ့သည်။

ထိုင်းနိုင်ငံ ရွေးကောက်ပွဲကော်မရှင်ကလည်း Move Forward ပါတီကို ဖျက်သိမ်းရန် ထိုင်းဗဟိုတရားရုံးထံ မေတ္တာရပ်ခံ ခဲ့သည်။

Ref: AFP

Photo: AFP