အပူပိုင်း မုန်တိုင်းဒက်ဘီသည် သြဂုတ် ၅ ရက်တွင် ဖလော်ရီဒါကို ရွှဲရွှဲစိုစေခဲ့ပြီး ယင်းပြည်နယ်တွင် အနည်းဆုံး လူလေးဦးသေဆုံးစေခဲ့ကာ သည်းထန်သောမိုးများ၊ ကြီးမားလှသော ရေကြီးမှုများနှင့်အတူ အမေရိကန် အနောက်ပိုင်းပြည်နယ်များကို ခြိမ်းခြောက်လျက်ရှိသည်။

ဒက်ဘီသည် ဟာရီကိန်းမုန်တိုင်းပြင်းအား အဆင့်တစ်ရှိသော မုန်တိုင်းအဖြစ်သြဂုုတ် ၅ ရက်တွင် ဖလော်ရီဒါ၏ Gulf Coast ကုန်းတွင်းကို ဝင်ရောက်ပြီးနောက် လဗီးကောင်တီ၌ ရွှေ့လျားနေထိုင်သော အိမ်ပေါ်ကို သစ်ပင်လဲကျသဖြင့် အသက် ၁၃ နှစ်အရွယ် ကောင်လေးတစ်ဦးသေဆုံးခဲ့သည်ဟု ယင်းကောင်တီ၏ဥပဒေထိန်းသိမ်းရေးအရာရှိက ပြောကြားခဲ့သည်။

ဟေးလ်ဘရော့ကောင်တီတွင် ၁၈ ဘီး ကားတစ်စီး ရေမြောင်းထဲထိုးကျသွားသဖြင့် ကားမောင်းသူသေဆုံးသွားခဲ့သည်ဟု အာဏာပိုင်များက ပြောကြားခဲ့သည်။ ဒေဇီကောင်တီတွင် ကားတိုက်မှုဖြစ်ပွားသဖြင့် အသက် ၃၈ နှစ်အရွယ် အမျိုးသမီးနှင့် ၁၂ နှစ်အရွယ်ကောင်လေးတို့ သေဆုံးသွားခဲ့ သည်ဟု အာဏာပိုင်များက ပြောကြားသည်။

မုန်တိုင်းသည် သြဂုတ် ၅ ရက်ညပိုင်းတွင် ဂျော်ဂျီယာပြည်နယ်ကို ရွေ့လျားသွားခဲ့သည်။ မုန်တိုင်းသည် သြဂုတ် ၇ ရက်တွင် တောင်ကာရိုလိုင်းနားကမ်းရိုးတန်းကို ချဉ်းကပ်မလာမီ ကမ်းလွန်ပိုင်းကို ရောက်သွားမည်ဟု ခန့်မှန်းထားကြောင်း အမျိုးသားဟာရီကိန်းစင်တာ(NHC)၏ထုတ်ပြန်ချက်အရ သိရသည်။

“ဒါဟာ လွန်ကဲမိုးရေချိန်အတွက် အန္တရာယ် အဆင့်လေးရှိတဲ့အထဲက အဆင့်လေးရှိနေတာဖြစ်ပါတယ်”ဟု NHC ညွှန်ကြားရေးမှူး မိုက်ကယ်ဘရင်နန်က သတင်းထောက်များကို ပြောကြားခဲ့သည်။

“ဒါဟာ ဂျော်ဂျီယာနဲ့တောင်ကာရိုလိုင်းနားတို့ရဲ့ကမ်းရိုးတန်းဒေသတွေကနေ မြောက်ကာရိုလိုင်းနားအထိတောင် ပြင်းထန်ရေကြီးတာတွေဖြစ်လာနိုင်တဲ့ ကာလရှည် ထူးကဲမိုးရေချိန်ဖြစ်လာမယ့်အနေအထားပါပဲ”ဟု ၎င်းက ဖြည့်စွက်ပြောကြားခဲ့သည်။

ဖလော်ရီဒါပြည်နယ်တွင် ပြည်သူ ၂၅၀,၀၀၀ ခန့်သည် လျှပ်စစ်ဓာတ်အားမရဟု ပြည်နယ်အုပ်ချုပ်ရေးမှူး ရွန်ဒီဆန်းတစ်က ပြောကြားခဲ့သည်။

“အပြင်ထွက်တဲ့အခါ သတိနဲ့ထွက်ကြပါ”ဟု ဒီဆန်းတစ်က ပြောကြားခဲ့ပြီး ဒက်ဘီမုန်တိုင်း၏လေများသည် ဖလော်ရီဒါကို ဝင်ရောက်ခဲ့သော ယခင်ဟာရီကိန်းမုန်တိုင်းတို့၏လေများကဲ့သို့ ပြင်းထန်ခြင်းမရှိသည်ကို တွေ့ရသည်ဟု ၎င်းက ဖြည့်စွက်ပြောကြားခဲ့သည်။

သမ္မတဂျိုးဘိုင်ဒင်သည် ဖလော်ရီဒါ၊  တောင်ကာရိုလိုင်းနား၊ဂျော်ဂျီယာတို့အတွက် အရေးပေါ်အခြေအနေများကို အတည်ပြုပေးခဲ့သည်။ ယင်းသို့အတည်ပြုပေးခဲ့ခြင်းကြောင့်

ဘေးအန္တရာယ်ကယ်ဆယ်ရေး ကြိုးပမ်းမှုများကို ချိတ်ဆက်ဆောင်ရွက်ရာတွင် ဖက်ဒရယ်အကူအညီများကို ခွင့်ပြုပေးနိုင်တော့မည်ဖြစ်သည်။

ဖလော်ရီဒါပြည်နယ် အုပ်ချုပ်ရေးမှူး ဒီဆန်းတစ်သည် ပြည်နယ်၏အမျိုးသား အစောင့်တပ်ကို အသက်သွင်းခဲ့ပြီး မုန်တိုင်းကယ်ဆယ်ရေးကိစ္စများကို ဆောင်ရွက်ရန် အဖွဲ့ဝင် ၃,၀၀၀ ကျော်ကို စုစည်းခဲ့သည်။

သြဂုတ် ၅ ရက်ညနေပိုင်းတွင် မုန်တိုင်းသည် ဂျော်ဂျီယာပြည်နယ်ထဲကို ဝင်ရောက်သည့်အခါ တစ်သမတ်တည်းရှိနေသည့် အမြင့်ဆုံးလေတိုက်နှုန်းသည် တစ်နာရီ ၄၅ မိုင်(တစ်နာရီ ၇၅ ကီလိုမိတာ)ရှိသည်ဟု NHC က ပြောကြားခဲ့သည်။

ဂျော်ဂျီယာ၊ တောင်ကာရိုလိုင်းနား၊ မြောက်ကာရိုလိုင်းနားတို့၏ဒေသများတွင် မုန်တိုင်းနှင့်အတူ ရေတက်လာနိုင်ခြင်းကြောင့် အသက်အန္တရာယ်ရှိသော ရေကြီးမှုများရှိလာနိုင်သည်ဟု သတိပေးထားသည်။

ဒက်ဘီမုန်တိုင်းသည် မြောက်ဘက်ကို ရွေ့လျားလျက်ရှိစဉ် ယခင်ကမရှိခဲ့သော မိုးရေချိန်ပမာဏ လက်မ ၃၀ အထိ ရွာချနိုင်သည်ဟု အမေရိကန်အမျိုးသားဟာရီကိန်းစင်တာက သတိပေးထားသည်။

Ref: AFP