ဂျာမနီအသင်းက ယူရိုပြိုင်ပွဲရဲ့ အအောင်မြင်ဆုံးအသင်းပါ။ ချန်ပီယံဆုရရှိမှုမှာ စပိန်အသင်းနဲ့ (၃)ကြိမ်စီ တူညီနေပေမဲ့ စပိန်က ဒုတိယတစ်ကြိမ်သာရရှိပြီး ဂျာမနီက ဒုတိယ(၃)ကြိမ် ရရှိထားတာကြောင့်ပါ။ ပြီးတော့ ဂျာမနီအသင်းက ယူရိုပြိုင်ပွဲကို အကြိမ်အများဆုံး ယှဉ်ပြိုင်ထားတဲ့အသင်းလည်း ဖြစ်နေပါသေးတယ်။ ကျင်းပပြီးခဲ့တဲ့ ယူရို ပြိုင်ပွဲ(၁၆)ကြိမ်မှာ ဂျာမနီက (၁၃)ကြိမ်အထိ ယှဉ်ပြိုင်ခဲ့တာပါ။ အစောဆုံးပြိုင်ပွဲ(၃)ကြိမ်နဲ့သာ လွဲခဲ့တာဖြစ်ပြီး ယူရို-၁၉၇၂ ပြိုင်ပွဲကနေ လက်ရှိအချိန်အထိိ တောက်လျှောက်ယှဉ်ပြိုင်နိုင်ခဲ့တာပါ။ ဒါပေမဲ့ ဂျာမနီအသင်း ယူရိုချန်ပီယံဆုကို နောက်ဆုံးရရှိခဲ့တာက ယူရို-၉၆ ပြိုင်ပွဲမှာဖြစ်တာကြောင့် အောင်ပွဲနဲ့တော့ အတော်လေး အလှမ်းဝေးနေခဲ့ပါပြီ။ နှစ်ပေါင်း(၃၀)နီးပါး  ရှိနေပြီဖြစ်ပြီး အတိအကျဆိုရရင်တော့ (၂၈)နှစ်ရှိပါပြီ။ အခု အိမ်ရှင်အဖြစ် ကျင်းပခွင့်ရမယ့် ပြိုင်ပွဲမှာ ဝေးကွာနေတဲ့ ချန်ပီယံဆုကို ပြန်လည်ရယူနိုင်မလားဆိုတာ စောင့်ကြည့်ရမှာပါ။ ဒါဟာ ယူရို-၂၀၂၄ ပြိုင်ပွဲရဲ့ စိတ်ဝင်စားစရာအကြောင်းအရာများစွာထဲက တစ်ခုသောအကြောင်းအရာလို့လည်း ဆိုနိုင်ပါတယ်။