မြိတ်မြို့တွင် ဘက်ထရီဆိုင်ကယ်များအားသွင်းထားရာမှ အပူလွန်ကဲကာ မီးလောင်မှုဖြစ်ပွားပြီး သုံးဦးဒဏ်ရာရရှိခဲ့ကြောင်း သိရသည်။
ဇန်နဝါရီ ၂၁ ရက် ညနေ ၅ နာရီခန့်တွင် မြိတ်မြို့ အလယ်ကျွန်းရပ်ကွက် မင်္ဂလာလမ်းရှိ ဦးမင်းဇော် (၅၃ နှစ်)၏ နေအိမ်တွင် ဘက်ထရီဆိုင်ကယ်များ အားသွင်းရာမှ မီးလောင်မှုဖြစ်ပွားခဲ့ခြင်းဖြစ်ကြောင်း သိရသည်။
မီးလောင်မှုဖြစ်ပွားရာနေရာသို့ ခရိုင်မီးသတ်စခန်းမှ မီးငြှိမ်းသတ်ယာဉ်သုံးစီး၊ အရန်မီးသတ်စခန်းများမှ မီးငြှိမ်းသတ်ယာဉ်ရှစ်စီးနှင့် ရေသယ်ယာဉ်များစွာဖြင့် ဝိုင်းဝန်းငြှိမ်းသတ်မှုကြောင့် ညနေ ၅ နာရီခွဲတွင် မီးငြိမ်းခဲ့ကြောင်း သိရသည်။
မီးလောင်မှုကြောင့် ဘက်ထရီဆိုင်ကယ် ငါးစီး၊ ရေခဲသေတ္တာတစ်လုံး မီးလောင်ကျွမ်းခဲ့ပြီး ဦးမင်းဇော်၏သားကြီးဖြစ်သူ ကိုမင်းစည်သူ (၂၀ နှစ်)၊သားငယ်ဖြစ်သူ ကိုထွန်းမင်းပိုင် (၁၉ နှစ်)နှင့် မီးငြိှမ်းသတ်ရာတွင် လာရောက်ကူညီပေးသူ ဦးမြင့်သောင်း (၄၀ နှစ်)တို့တွင် ဒဏ်ရာ (မစိုးရိမ်ရ) အသီးသီးရရှိခဲ့ပြီး မြိတ်ပြည်သူ့ဆေးရုံကြီး၌ ဆေးကုသမှုပေးထားကြောင်း သိရသည်။
မီးလောင်မှုဖြစ်စဉ်နှင့်ပတ်သက်ပြီး တာဝန်ရှိသူများက စစ်ဆေးဆောင်ရွက်လျက်ရှိကြောင်း သိရသည်။
