ဒီရာသီလေဗာကူဆင်ရဲ့ အမြင့်ပျံခရီးက စိတ်ဝင်စားစရာကောင်းတယ်။ သူတို့က ဘွန်ဒစ်လီဂါအမှတ်ပေးဇယား ထိပ်ဆုံးမှာ ရပ်တည်နေတယ်။ ချန်ပီယံဆုအတွက် ခဏထားဦး။ လာမယ့် ရာသီချန်ပီယံလိဂ်ဝင်ခွင့်အတွက် အကောင်းဆုံးအနေအထား တစ်ခုကို ပိုင်ဆိုင်နေပြီ။ နည်းပြ အလွန်ဆိုရဲ့ လက်အောက်မှာ နေ့ချင်းညချင်း ဥရောပဘောလုံးကမ္ဘာရဲ့ ချီးကျူးမှုတွေကို ရလာခဲ့တယ်။ ဒါ့အပြင် ဂျာမန်ဘောလုံးရပ်ဝန်းမှာ လေဗာကူဆင်ရဲ့ Wing-back ကစားသမားတွေဖြစ်တဲ့ ဖရင်းပေါင်နဲ့ ဂရိုင်မယ်လ်ဒိုတို့ အကြောင်းတွေကိုလည်း အကျယ်တဝင့်ဖော်ပြလာကြပါတယ်။ သူတို့ (၂)ယောက်စလုံးက လေဗာကူဆင်ရဲ့ အားထားရာ Wing-back ကစားသမားတွေဖြစ်ပြီး အသင်းကို အကောင်းဆုံးအကျိုးပြုနေသူတွေလို့ ဆိုရင်လည်း မမှားပါဘူး။ ပေါက်ကွဲအားကောင်းတဲ့ လေဗာကူဆင်ရဲ့ တောင်ပံတစ်စုံဖြစ်ပြီး သူတို့က ပြိုင်ဘက်ကစားသမားတွေကို ဖရိုဖရဲဖြစ်စေခဲ့တယ်။ ဒါကြောင့်လည်း ဂျာမန်မီဒီယာတွေက ဘိုင်ယန်မြူးနစ်မှာ ဆာနေးနဲ့ ကိုးမန်းဆိုရင် လေဗာကူဆင်မှာ ဖရင်းပေါင်နဲ့ ဂရိုင်မယ်လ်ဒိုလို့ ချီးမွမ်းခန်းဖွင့်ခဲ့ကြပါတယ်။