ဘဏ်နှင့် ငွေရေးကြေးရေးအဖွဲ့အစည်းများအနေနှင့် ကနဦး စတင်ငွေလွှဲပြောင်းရာတွင် လွှဲပြောင်းသူနှင့် အကျိုးခံစားခွင့်ရှိသူတို့၏ လိုအပ်သော သတင်းအချက်အလက်များ မပါရှိသော ကြေးနန်း သို့မဟုတ် ငွေကြေးလွှဲပြောင်းမှုတစ်ရပ်ကို ဆောင်ရွက်ပေးခြင်း၊ ငြင်းပယ်ခြင်း၊ ဆိုင်းငံ့ခြင်း၊ ငွေကြေးဆိုင်ရာ စုံစမ်းထောက်လှမ်းရေးတပ်ဖွဲ့သို့ သတင်းပို့ခြင်းနှင့် စီးပွားရေးဆိုင်ရာ ဆက်ဆံဆောင်ရွက်မှုကို ကန့်သတ်ခြင်း/ရပ်စဲခြင်း စသည့် အချက်များ ပါဝင်သည့် နောက်ဆက်တွဲအရေးယူမှုများဆိုင်ရာ အန္တရာယ်အခြေပြု ကြိုတင်ကာကွယ်ရေးလုပ်ငန်းများ ထားရှိရမည့် အချက်ပါဝင်သည့် ငွေကြေးခဝါချမှု တိုက်ဖျက်ရေးနည်းဥပဒေအား ပြည်ထဲရေးဝန်ကြီးဌာနက ထုတ်ပြန်လိုက်သည်။
 
“ငွေကြေးခဝါချမှု တိုက်ဖျက်ရေးနည်းဥပဒေများ” အဖြစ် ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီးကိုကိုက ၂၀၁၅ ခုနှစ် စက်တင်ဘာ ၁၁ ရက် ရက်စွဲဖြင့် လက်မှတ်ရေးထိုး ထုတ်ပြန်သည့် အဆိုပါ နည်းဥပဒေကို စက်တင်ဘာ ၂၅ ရက်တွင် ပြည်သူများ သိရှိလေ့လာနိုင်ရန် ထုတ်ပြန်ခဲ့ခြင်းဖြစ်ပြီး အဆိုပါ ဥပဒေတွင် အခန်းပေါင်း ၁၃ ခန်းနှင့် ပုဒ်မပေါင်း ၈၁ ပါဝင်သည်။
 
ငွေကြေးခဝါချမှုကို စုံစမ်းစစ်ဆေးရန် တာဝန်ရှိသူများသည် မြန်မာနိုင်ငံရဲတပ်ဖွဲ့ ၏ လုပ်ပိုင်ခွင့်များနှင့် အထူးစုံစမ်း စစ်ဆေးရေးဦးစီးဌာန၏ လုပ်ပိုင်ခွင့်များကိုပါ ရယူသုံးစွဲနိုင်ရန် ငွေကြေးခဝါချမှုတိုက်ဖျက်ရေး နည်းဥပဒေများ ပုဒ်မ ၇၅ တွင် ပြဋ္ဌာန်းထားပြီး သက်ဆိုင်ရာ အစိုးရဌာန အဖွဲ့အစည်းများ စုံစမ်းစစ်ဆေးခြင်းနှင့် စစ်ဆေးစီရင်ခြင်းများ လုပ်ဆောင်နေသည့် မှုခင်းကိစ္စရပ်များမှ တစ်ဆင့် ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှု ကျူးလွန်ဖွယ်ရာရှိသည်ဟု ယုံကြည်ရန် အကြောင်းရှိပါက ငွေကြေးဆိုင်ရာ စုံစမ်းထောက်လှမ်းရေးတပ်ဖွဲ့သို့  ဆောလျင်စွာ အကြောင်းကြားရမည်ဟု ငွေကြေးခဝါချမှု တိုက်ဖျက်ရေး နည်းဥပဒေများ ပုဒ်မ ၇၇ တွင် ပါဝင်ပြဋ္ဌာန်းထားသည်။
 
ငွေကြေးခဝါချမှု တိုက်ဖျက်ရေးဥပဒေအရ သတင်းပို့ရန် သတ်မှတ်ထားသည့် သတင်းပို့အဖွဲ့အစည်းများဖြစ်သည့် ဘဏ်နှင့် ငွေရေးကြေးရေးအဖွဲ့အစည်းများအပါအဝင် လုပ်ငန်းစုများအနေနှင့် ဝန်ထမ်းများ ငှားရမ်းရန်လိုအပ်ပါက ကျွမ်းကျင်မှုအရည်အချင်း မြင့်မားခြင်း၊ သတင်းပို့အဖွဲ့အစည်း၏ လုပ်ငန်းများဆောင်ရွက်ရန် သင့်လျော်သည့် အရည်အချင်းနှင့်ဂုဏ်သိက္ခာ၊ ဝန်ထမ်း၏ ဘဏ္ဍာရေးနောက်ခံအခြေအနေနှင့် အကျိုးစီးပွားများ ပဋိပက္ခဖြစ်လာနိုင်သည့် အလားအလာများ၊ ညီညွတ်သည့် ကျင့်ဝတ်ပိုင်းဆိုင်ရာလိုအပ်ချက်များနှင့် လိမ်လည်မှု၊ မရိုးဖြောင့်မှု နှင့် အလားတူပြစ်မှုများဖြင့် တရားစွဲဆိုခံထားရသူများနှင့် ပြစ်မှုစီရင်ခံရသူများအား သတင်းပို့အဖွဲ့အစည်းများက ဝန်ထမ်းအဖြစ် ခန့်အပ်ခြင်းမပြုလုပ်ရန် ငွေကြေးခဝါချမှု တိုက်ဖျက်ရေးနည်းဥပဒေများ ပုဒ်မ ၅၈ ၏ ပုဒ်မခွဲများတွင် ဖော်ပြထားသည်။
 
ဘဏ်နှင့် ငွေရေးကြေးရေးအဖွဲ့အစည်းများအနေနှင့် ငွေလွှဲပြောင်းမှုများတွင် အန္တရာယ်အခြေပြု ကြိုတင်ကာကွယ်ရေး လုပ်ငန်းများအတွက် ကနဦး ငွေလွှဲပြောင်းစဉ်က ငွေကြေးလွှဲပြောင်းမှုအတွက် ငွေလွှဲလက်ခံသည့်ဘဏ်သည် ယခင်က မှတ်ပုံတင်အထောက်အထားအား စိစစ်ခဲ့ခြင်းမရှိပါ က အကျိုးခံစားခွင့်ရှိသူအား စိစစ်ရမည့်အပြင် မှတ်တမ်းများကို ထိန်းသိမ်းထားရန် လိုအပ်မည်ဖြစ်ကြောင်း ငွေကြေးခဝါချမှုတိုက်ဖျက်ရေးနည်းဥပဒေများ ပုဒ်မ ၄၈ တွင် ပြဋ္ဌာန်းထားပြီး သတ်မှတ်ပမာဏထက် ကျော်လွန်သည့် မည်သည့် နိုင်ငံခြားငွေလွှဲပြောင်းမှုမဆို နိုင်ငံဖြတ်ကျော်ကြေးနန်း (သို့မဟုတ်) အီလက်ထရွန်နစ်နည်းလမ်းဖြင့် ငွေလွှဲပြောင်းမှု၊ သတ်မှတ်ပမာဏထက် ကျော်လွန်သည့် ပြည်တွင်းငွေလွှဲပြောင်းမှုများနှင့် ကနဦး စတင်လွှဲပြောင်းသူ၏ အချက်အလက်များ မရရှိမှုနှင့် မပြည့်စုံသည့် အနေအထားများတွင် ငွေကြေးဆိုင်ရာ စုံစမ်းထောက်လှမ်းရေးအဖွဲ့သို့ ဆောလျင်စွာ သတင်းပို့ရမည်ဖြစ်ကြောင်း ငွေကြေးခဝါချမှုတိုက်ဖျက်ရေးနည်းဥပဒေများ ပုဒ်မ ၄၉ နှင့် ယင်း၏ ပုဒ်မခွဲများတွင် ဖော်ပြထားသည်။