ကျောင်းသားကျောင်းသူများအား တရားရုံးထုတ်ရာတွင် လက်ထိတ်ခတ်ခေါ်ဆောင်ခြင်းသည် အပြည်ပြည်ဆိုင်ရာ လူ့အခွင့်အရေး ကြေညာစာတမ်းပါအချက်များနှင့် ညီညွတ်ခြင်းမရှိကြောင်း အမျိုးသားဒီမိုကရေစီအဖွဲ့ချုပ်မှ ပြည်သူ့လွှတ်တော်ကိုယ်စားလှယ် ဦးဝင်းမြင့်က ဆွေးနွေးသည်။
 
ဇွန် ၁၆ ရက်ကပြုလုပ်သည့် ပြည်ထောင်စုလွှတ်တော်အစည်းအဝေးတွင် မြန်မာနိုင်ငံအမျိုးသားလူ့အခွင့်အရေးကော်မရှင်၏ နှစ်ပတ်လည်အစီရင်ခံစာ (၂၀၁၄ ခုနှစ်) အား ကော်မရှင်ဥက္ကဋ္ဌ ဦးဝင်းမရက တင်သွင်းခဲ့ပြီး အဆိုပါ အစီရင်ခံစာအား ဦးဝင်းမြင့်က ဆွေးနွေးစဉ် ထည့်သွင်းပြောကြားခဲ့ခြင်း ဖြစ်သည်။
 
ဦးဝင်းမြင့်က အပြည်ပြည်ဆိုင်ရာ လူ့အခွင့်အရေးကြေညာစာတမ်းကို နိုင်ငံတိုင်း၊ အဖွဲ့အစည်းတိုင်းက၊ လူတိုင်းက နှလုံးသွင်းလျက် ကြိုးပမ်းအားထုတ်ရမည်ဖြစ်ကြောင်း၊ လူ့အခွင့်အရေးများကို အရေးမထားခြင်းမှာ ရက်စက်ကြမ်းကြုတ်သည့် အပြုအမူများကို ဖြစ်ပေါ်စေကြောင်း၊ တရားလက်လွတ်ပြုမှု၊ ဖိနှိပ်ချုပ်ချယ်မှု၊ နှိပ်စက်ညှဉ်းပန်းမှုများကို မဖြစ်စေရန် လူ့အခွင့်အရေးများကို ဥပဒေဖြင့် ထိန်းသိမ်းကာကွယ်ပေးရမည်ဖြစ်ကြောင်း ဆွေးနွေးသည်။
 
လူ့အခွင့်အရေး ကာကွယ်စောင့်ရှောက်ရေးဆိုင်ရာ လုပ်ဆောင်မှုများ၊ အကြံပြုချက်များနှင့် စပ်လျဉ်းပြီး ဆွေးနွေးလိုကြောင်း၊ ပဲခူးတိုင်းဒေသကြီး လက်ပံတန်းမြို့တွင် မတ်လ ဒုတိယပတ်ခန့်၌ ဒီမိုကရေစီပညာရေး သပိတ်စစ်ကြောင်းကို နှိမ်နင်းဖြိုခွဲခဲ့ကြောင်း၊ ကျောင်းသားကျောင်းသူများအား ရဲတပ်ဖွဲ့၏ အချုပ်ကားများပေါ်သို့ တင်ဆောင်ချိန်တွင် တန်းစီထားသည့် ရဲတပ်ဖွဲ့ဝင်များ၏အကြားသို့  ကျောင်းသားကျောင်းသူများ ရောက်ရှိသည့်အချိန်တွင် တုတ်ချောင်းများဖြင့် ရိုက်နှက်ခြင်း၊ ဖိနပ်များဖြင့် ကန်ကျောက်ခြင်း၊ဆဲဆိုကြိမ်းမောင်းခြင်းများကို ပြုလုပ်ခဲ့ကြကြောင်း၊ ယင်းသို့ပြုမူခြင်းသည် လူ့အခွင့်အရေးကြေညာစာတမ်း၏ အပိုဒ် (၅) တွင် ပါရှိသည့် မည်သူ့ကိုမျှ ညှဉ်းပန်းနှိပ်စက်ခြင်း မပြုရဆိုသည့်အချက်နှင့် ကွဲလွဲနေကြောင်း၊ ၁၉၉၅ ခုနှစ် ပြည်သူ့ရဲတပ်ဖွဲ့ စည်းကမ်းထိန်းသိမ်းရေးဥပဒေပါ ပြဋ္ဌာန်းချက်များကို ကျူးလွန်ခြင်းဖြစ်ကြောင်း ဦးဝင်းမြင့်က ဆွေးနွေးသည်။
 
ပြည်သူ့လွှတ်တော်ကိုယ်စားလှယ် ဦးဝင်းမြင့်က “ကျောင်းသူကျောင်းသားတွေကို တရားရုံးထုတ်တဲ့အခါမှာ မိဘတွေနဲ့ တွေ့ဆုံစဉ် နှစ်ယောက်တစ်တွဲ  လက်ထိတ်ခတ်တာတွေ ရှိခဲ့ပါတယ်။ မိဘတွေအနေနဲ့ လွန်စွာ စိတ်မချမ်းသာဖြစ်ကြရပါတယ်။ ကျောင်းသူ ကျောင်းသားတွေဟာ ထွက်ပြေးဖို့ ကြမ်းတမ်းစွာ ခုခံမှုပြုလုပ်ကြမယ့်သူတွေ မဟုတ်လို့ လက်ထိတ်မခတ်သင့်ပါဘူး။ အပြည်ပြည်ဆိုင်ရာ လူ့အခွင့်အရေး ကြေညာစာတမ်းရဲ့ အပိုဒ် (၅) မှာပါရှိတဲ့ မည်သူ့ကိုမျှ လူ့သိက္ခာညှိုးနွမ်း စေတာတွေကို ပြုမူဆက်ဆံခြင်း မပြုရဆိုတဲ့ အချက်နဲ့လည်း ညီညွတ်ခြင်းမရှိပါ။ ရဲလက်စွဲ (ဒုတိယတွဲ) မှာ ပါရှိတဲ့ လက်ထိတ်မခတ်ရမယ့် ညွှန်ကြားချက်တွေနဲ့လည်း ဆန့်ကျင်နေပါတယ်”ဟု ဆွေးနွေးသည်။
 
ထို့ပြင် ဖမ်းဆီးခြင်းခံခဲ့ရသည့် ကျောင်းသားကျောင်းသူများပိုင်ဆိုင်သည့် ငွေ၊ လက်ဝတ်ရတနာ အသုံးအဆောင်ပစ္စည်းအချို့ ပျောက်ဆုံးသည်ဟု ကြားသိရကြောင်း၊ ယင်းကိစ္စတွင် အပြည်ပြည်ဆိုင်ရာ လူ့အခွင့်အရေးကြေညာစာတမ်း၏ အပိုဒ် (၇) တွင်ပါရှိသည့် မည်သူမျှ မိမိပိုင်ပစ္စည်းဥစ္စာကို မတရားသိမ်းယူခြင်း မခံထိုက်စေရဆိုသည်နှင့် ဆန့်ကျင်နေကြောင်း၊ ရဲလက်စွဲ (ဒုတိယတွဲ) တွင် ပါရှိသည့် ရှာဖွေသိမ်းဆည်းသည့်ပစ္စည်းများ မပျောက်ဆုံးမပျက်စီးစေရန် ညွှန်ကြားချက်ကို လိုက်နာဆောင်ရွက်ခြင်းမရှိသည်မှာ ထင်ရှားနေကြောင်း ဦးဝင်းမြင့်က ဆွေးနွေးသည်။
 
လူ့အခွင့်အရေးကာကွယ်စောင့်ရှောက်ရေးလုပ်ငန်းများကို ကျယ်ပြန့်စွာဆောင်ရွက်ရန်၊ လူ့အခွင့်အရေးဆိုင်ရာ သဘောတရားများ ကျယ်ကျယ်ပြန့်ပြန့် ရောက်ရှိစေရေး၊ သက်ဆိုင်ရာဝန်ကြီးဌာနများက ဂရုစိုက်၍ ပူးပေါင်းဆောင်ရွက်ရန်နှင့် အကျိုးသက်ရောက်မှုရှိစေရေးအတွက် ဦးဝင်းမြင့်က ဆွေးနွေးသည်။
 
လက်ရှိတွင် လူ့အခွင့်အရေး ကာကွယ်ရေးဆိုင်ရာ လုပ်ဆောင်မှုများရှိကြောင်း၊ ပြည်ထဲရေးဝန်ကြီးဌာနမှလည်း စုံစမ်းစစ်ဆေးရေး၊ တရားစွဲဆိုရေးဆိုင်ရာ အလုပ်ရုံဆွေးနွေးပွဲများ ကျင်းပခဲ့ကြောင်း၊ ညှဉ်းပန်းနှိပ်စက်မှုနှင့် အခြားသော ရက်စက်စွာ၊ လူမဆန်စွာ သို့မဟုတ် လူ့ဂုဏ်သိက္ခာကို ညှိုးနွမ်းစေသည့် ပြုမူဆက်ဆံမှု သို့မဟုတ် ပြစ်ဒဏ်ပေးမှုများကို ဘာသာပြန်ဆိုပြီး အတည်ပြုနိုင်ရေး ဆောင်ရွက်နေမှုများကို ကြိုဆိုပါကြောင်း ဆွေးနွေးသည်။